36 ¹ گوناه آدمایِ شریرِ دیلِ میَأن لانه بوکوده، اوشَأن خدا جَه نترسد. ² چون چنان خوشَأنِ جَه مطمئند کی فکر کوند خدا اوشَأنِ گوناهَ نیدینه و اوشَأنَ محکوم نوکونه. ³ همۀ اوشَأنِ گبان فریب و حیله یه. کارایِ دوروست و عاقلانه یَ ترکَ کوده دَأرد. ⁴ شبان خوشَأنِ رختخوابِ دورون بدی رِه نقشه دیچیند و راهِ نادورستِ میَأن اُستوارد و شرارتِ جَه اَشَأنَ بد نَأیه. ⁵ خداوندا، تی محبت تا آسمانان فَأرسه و تی وفاداری تا اَبران. ⁶ تی عدالت کوه هانِ مَأنستَأنه و تی اَحکام دریائانِ مَأنستَأن عمیقه، ای خداوند تویی کی انسانان و حیوانانَ نجات دهی. ⁷ ای خداوند، تی رحمت چقدر عظیمه. همۀ آدمیان تی بالانِ سایه جیر پناه گیرد. ⁸ اوشَأن تی خانه برکتِ جَه سِئرَ بود و تو خودتِ مهربانی چشمه جَه اوشَأنَ وَأخورانی. ⁹ چره کی چشمۀ حیات تی ورجَه نَهه و تی نورِ میَأنه کی اَمَأن روشنایی یَ دینیم. ¹⁰ همیشه تی رحمت اوشَأنی کی ترَه شناسدِ رِه باقی بمَأنه، و تی مهربانی و عدالت دوروستکارانِ اَمرَه همراه بیبه. ¹¹ وَأنَأل کسانی کی مغرورد مرَه حمله بوکوند و یا شریرانِ دس مرَه فراری بده. ¹² بیدین شروران چوطو بکفته دَأرد، اوشَأن جوری خاکِ رو بکفته دَأرد که نِتَأند ویریزد.