15 ¹ ای برأرأن هَسَه خَأیم انجیلی کی شمرَه بشارت بدمَ شمرَه به خاطر بأورم، هو انجیلی کی قبول بوکودید و اونِ میَأن اُستوار ایسَأئید، ² و بواسطۀ ایمانِ به اون نجات پیدا کونید، البته بشرطی کی اون کلامی کی شمرَه بشارت بدمَ قائم بدَأرید، وگرنه هَچین ایمان بأورده اید. ³ من انجیلِ مهمترین مطالبَ هوطویی کی مرَه برسَأنه بود شمرَه اعلام بوکودم، یعنی اَ حقیقتَ کی مسیح مُطابقِ کیتاب مقدسِ پیشگویی یان اَمی گوناهانِ وَسی بمرد، ⁴ و اَنکی دفن بوبُست و سومین روزِ رِه هوطویی کی کیتاب مقدسِ دورون بینیویشته بوبُسته بو ویریشت، ⁵ و خورَه پطرسَ آشکارَ کود و بازن باقی اون دوازده شاگردانَ. ⁶ و بازن ایبار دیگر ویشتر جی پونصد نفر جی اَمی برأرأنَ ظاهرَ بوست کی ویشترِ اوشَأن تا هَسَه زنده ید، ولی بعضیشان بمرده دَأرد. ⁷ و بازن یعقوبَ ظاهرَ بوست و بعد هم همه تَه رسولانَ. ⁸ و آخر جی همه یم مرَه کی اوشَأنِ ورجَه ایتَه نارسِ طفلِ مَأنستَأن بؤم ظاهرَ بوست. ⁹ چره کی من همۀ رسولانِ جَه کوچی ترم، و اصلاً لایق اون نییم کی رسول دخَأده بوبوم، چره کی خدا کلیسایَ اذیت کودم. ¹⁰ ولی اونچی کی ایمروز ایسم خدا فیضِ وَسیه کی می نصیب بوبُست و اونِ فیض مرِه هَچین بی ثمر نوبو، برعکس من همۀ اوشَأنِ جَه ویشتر زحمت بکشم، هر چند کی من نوبوم بلکی خدا فیض بو کی می اَمرَه بو. ¹¹ در هر حال، چی من ویشتر زحمت بکشه بم چی اوشَأن فرقی نوکونه، همه هَ پیامَ اعلام کونیم، و شومَأنم هونَ ایمان بأورده اید. ¹² اما اگر موعظه بِه کی مسیح مُرده یانِ جَه ویریشت، چوطویه کی بعضی جی شومَأن گوئیدی مُرده یانِ قیامت وجود نَئره؟ ¹³ اگر مُرده یان وینریزد، پس مسیحم وینریشته دَأره. ¹⁴ و اگر مسیح وینریشته دَأره، هم اَمی موعظه باطله و هم شیمی ایمان. ¹⁵ تازه خدا شاهدینِ دروغینم بوبُستیم، چره کی شهادت بدَأئیم خدا مسیحَ زنده کوده، چونکی اگر مُرده یان وینریزد، پس خدا هم مسیحَ وینریزَأنه دَأره. ¹⁶ اگر مُرده یان وینریزد، پس حتماً مسیحم وینریشته دَأره. ¹⁷ و اگر مسیح وینریشته، شیمی ایمان بی فایده یه و هنوزم شیمی گوناهانِ دورون ایسَأئید. ¹⁸ و اَطو ایماندارانی کی بمرده دَأرد هم نابودَه بوستد. ¹⁹ اگر فقط هَ دونیا میَأن مسیحَه اُمیدواریم، جی همۀ مردم بدبخت تریم. ²⁰ ولی واقعیت اَنه کی مسیح مَردن پسِ رِه زندَه بوست و اولین کسی بو کی مُرده یانِ جَه ویریشت. ²¹ چون هوطو کی مرگ بواسطۀ ایتَه انسان بأمو، مُرده یانِ قیامتم بواسطۀ ایتَه انسان آشکارَ بوست. ²² و هوطو کی همه میرد، چون جی آدمِ نسلد، همۀ کسانی هم کی مسیح اَمرَه مُتحدد، زندَه بود. ²³ ولی هر کی به خو نوبه: اولین کسی کی زندَه بوست مسیح بو، و بازن اونِ وَأگردستَأنِ موقع اوشَأنی کی مسیح شیند. ²⁴ بازن آخرت فأرسه، یعنی اونموقعی کی همۀ ریاستان و قدرتان و قوّتانَ نابودَ کونه و پادشاهی یَ خدایِ پئرَ واگذار کونه. ²⁵ چون تا زمانی کی همۀ دوشمنانَ خو پا جیر تَأنوَأده دَأره، وَأستی سلطنت بوکونه. ²⁶ و آخرین دوشمنی کی جی میَأن شِه، مرگه. ²⁷ چره کی خدا «همه چیَه اونِ پا جیر تَأوَأدَه دَأره» ولی وختی گوفته بِه: همه چیَه اونِ پا جیر تَأوَأدَه دَأره، معلوم بِه کی خدا خودش همه چیَه اونِ پا جیر تَأوَأدَه دَأره، پس خدا خودش جزءِ اون همه چی حیساب نیبه و مسیحِ تحتِ فرمان نِئسَه. ²⁸ ولی وختی همه چی مسیحِ تحتِ فرمان قرار بیگیفت، اونموقع پسر خودش هم اون کسی مطیع بِه کی همه چیَه اونِ پا جیر تَأوَأدَه بو، تا اَطو خدا کُلِ عالمِ هستی یَ حاکم بیبه. ²⁹ و اگر اَطو نیبه، اوشَأنی کی مُرده یانِ رِه تعمید گیرد چی بوکوند؟ اگر مُرده یان اصلاً وینریزد پس چی وَأستی بعضیان اوشَأنِ رِه غُسلِ تعمید گیرد؟ ³⁰ یا چی وَأستی اَمَأن هر ساعت اَمی جانَ به خطر تَأوَأدیم؟ ³¹ به هون افتخاری کی اَمی خداوند مسیحِ عیسی ورجَه دربارۀ شومَأن دَأرم قسم خورم، کی هر روز مرگِ اَمرَه روبرو بؤم. ³² اگر فقط دلایلِ انسانی وَسی اون وحشیانِ اَمرَه اَفَسُسِ میَأن جنگ بوکودم، چی سودی بوبوردم؟ اگر مُرده یان وینریزد «بأئید بوخوریم و وَأخوریم، چره کی فردا میریم» ³³ ، ولی گول نوخورید، دوستانِ بد، اخلاقِ خوبَ فاسدَ کوند. ³⁴ سرِ عقل بأئید و دِ گوناه نوکونید، چره کی بعضی جی شومَأن خدایَ نشنَأسید و اَنَ گوفتَأن درم تا شرمنده بیبید. ³⁵ ولی شاید اینفر وَأورسه:«مُرده یان چوطو ویریزد و کَ بدنِ اَمرَه اَید؟» ³⁶ ای نادان، وختی دانه ایی زمینِ دورون کاری، تا اول نیمیره زندَه نیبه. ³⁷ وختی ایتَه چیَه کاری، اونچی کی بازن سبز بِه یَ نکاری، بلکی فقط ایتَه کوچدانه دانه یَ کاری، هَسَه گندم بیبه یا هر دانۀ دیگری. ³⁸ ولی خدا بر حسبِ خو ایراده، اون بدنی کی خودش تعیین بوکوده یَ اونَ بخشه، و هر دانه یَ ایتَه بدنِ مخصوص فَأده. ³⁹ همۀ بدنانم ایتَه جور نیید، آدمان ایتَه جور گوشت دَأرد، حیوانان ایتَه جور، پرنده یان ایتَه جور و ماهیانم ایتَه جورِ دیگر. ⁴⁰ و هَطو بدنِ آسمانی بدنِ زمینی مرَه فرق کونه، و اوشَأنِ قشنگی هم همدیگرِ اَمرَه فرق دَأره. ⁴¹ خورشیدِ قشنگی ایجوره، ماهِ قشنگی ایجور، و ستاره یانِ قشنگی هم ایجورِ دیگر، حتی هر ستاره قشنگی اوی تَه ستاره مرَه فرق کونه. ⁴² مُرده یانِ زنده بوستَأنم هَطویه، اونچی کی بکاشته بِه فاسدَه بِه و جی میَأن شِه، و اونچی کی ویریزه هیچ موقع فاسدَه نیبه. ⁴³ ذلتِ میَأن بکاشته بِه، و جلالِ میَأن ویریزه، ضعفِ میَأن بکاشته بِه و قوّتِ میَأن ویریزه. ⁴⁴ بدنِ طبیعی بکاشته بِه و، بدنِ روحانی ویریزه، اگر بدنِ طبیعی وجود دَأره، بدنِ روحانی هم وجود دَأره. ⁴⁵ هوطو کی بینیویشته بوبُسته:«اولین انسان یعنی آدم، موجود زنده بوبُست» ولی آخرین آدم، روحی بوبُست کی زندگانی بخشه. ⁴⁶ ولی اونچی کی روحانی بو اول نَأمو، بلکی اول جسمانی بأمو و بازن روحانی اَیه. ⁴⁷ اولین انسان زمینِ خاکِ جَه چَأکوده بوبُست، دومین انسان جی آسمان بأمو. ⁴⁸ هر چیزی کی انسانِ خاکی اونِ لایق بو خاکیانِ دورون وجود دَأره، و هر چیزی کی انسانِ آسمانی دَأره، اوشَأنی کی آسمانی بود دریافت کوند. ⁴⁹ و هوطو کی انسانِ خاکی شکلَ بیگیفتیم، انسانِ آسمانی شکلم گیریم. ⁵⁰ ای برأرأن، می منظور اَنه کی گوشت و خون نتَأنه خدا ملکوتِ وارث بیبه، و چیزی کی فاسدَه بِه، نتَأنه زندگی اَبدی وارث بیبه. ⁵¹ گوش بوکونید، خَأیم ایتَه رازَ شمرَه بوگویم: اَمَأن همه تَه نیمیریم، بلکی فقط تبدیل بیهیم. ⁵² ایمرتبه و ایتَه چوم بهم زَئَنِ میَأن، اونموقعی کی آخرین شیپور صدا کونه، اَ ایتفاق دکفه. چره کی وختی شیپور صدا کونه، مُرده یان حیاتِ اَبدی رِه ویریزد و اَمی بدنم تبدیل بِه. ⁵³ چون اَ بدنِ فاسد بوستَأنی، وَأستی بدنی کی فاسد نیبه یَ دوکونه، و اَ بدنِ فانی وَأستی زندگی اَبدی اَمرَه آرایش بیبه. ⁵⁴ وختی اَ فساد حیاتِ جاودانَ دوکود، و اَ خاکی بدن، آسمانی بدنَ تبدیل بوبُست، اونموقع کیتاب مقدسِ اَ پیشگویی عملی بِهه کی گویه: ⁵⁵ « ای مرگ، تی پیروزی کَ یَ نَهه؟ ای گور، تی نیش چی بوبُست؟» ⁵⁶ مرگِه نیش گوناهه، و گوناه هم شریعتِ جَه قدرت گیره. ⁵⁷ ولی خدایَ شُکر کی اَمرَه پیروزی ببخشه دَأره بواسطۀ اَمی خداوند عیسی مسیح. ⁵⁸ پس ای می عزیزِ برأرأن، همیشه پابرجا و اُستوار بِئسید و همۀ وجودِ اَمرَه خداوندِ کارَ مشغول بیبید. چره کی دَأنید شیمی زحمت خداوندِ رِه هَچین نییه و شیمی خدمتِ نتیجه یَ دینید.