¹ Hapana kutongwa ku wese munhu airi muna Kirisitu Djesu. ² Ngokuti Mutemo dzo Mweya wo upenyu muna Djesu Kirisitu wandi tsudzunura kubva pamutemo wozviro zvisikadhi Mwari norufu. ³ Mutemo zwawaka konerwa kuita, asi Mwari wakazwiita, ngokuti wanga wakaremba ngokudha kwo nyama yo tchianhu. Wakatumira Mwana wake sa tchifananidzo tcho nyama yotchitema, kuti aite tchipiriso tcho zwitema, ⁴ Mwari waka sunga zvitema munyama. Mwari wakaita izwi kuitira kuti tiiite zwinodha mutemo, zwisiripi mukudha kwo nyama asi mukudha kwo mweya. ⁵ Anhu anoraramira munyama anoita zwidho zwo nyama, asi anoraramira zwoMweya, unoita kudhaa kwo mweya. ⁶ Ndangariro dzo nyama irufu, asi ndangariro dzo Mweya ndiwo upenyu no rugare; ⁷ ngokuti ndangariro dzo nyama dzakashata kuna Mwari, ngokuti hatenderi zvinodha Mwari , asikateereri zvaanoha. ⁸ Anhu ari munyama haakoni kufhadza Mwari. ⁹ Musa raramire mu nyama, asi raramirai muMweya, kudhai Mweya wa Mwari wetchi raramira metiri. Asi kudhai munhu asina Mweya wa Kirisitu, munhu iyena angwakepi. ¹⁰ kudhai muri muna Kirisitu, miwiri yenyu yakafa mu zvitema, asi Mweya unorarama nokudha kwe kururama ka Mwari´. ¹¹ Kudhai Mweya wa Uyewakamutsa Djeso kuakafa uri kurarama pakati penyu, Ndiyena Djesu waka muka kuakafa atchapao upenyu ku miwiri yenyu, ngokudha kwo mweya wake, wokuti urikuraramira paki peatnyu. ¹² Hino, hama, tino magawa asiripi onyama, kuti tiraramire munyama. ¹³ Ngokuti mukararamira mu nyama, munofa, asi no mweya mukauraya zvito zvo nyama, mutchararama pa Mweya. ¹⁴ Ano tungamirirwa no Mweya wa Mwari ndio ana aMwari. ¹⁵ Ngokuti hamuzii kutambira patsa mweya woku dvinyirirwa kuti mutye, asi makatambira mweya wokuzwi ana aMwari, watinodhaidzira kuti: "Abba, Bhabha!" ¹⁶ Mweya wa Mwari unobhatana no wedhu kutendera kuti tiri ana aMwari. ¹⁷ Tiriana aMwari, ndizvo zvitchaita kuti titambire makomborero aarikutchengetera ku anhu ake, uye titcha tambira kubva kuna Djeso zviya zvaka tchengetwa na Mwari, kudhay tika tora nhamo ya a Djeso kuita yedhu, nesuwo ticha rumbidzwao naye. ¹⁸ Ndinofunga kuti nhamo yatinayo mukati me ndaramo dzedhu, ainga enzaniswi norukudzo ratitcha ona mu ramangwana. ¹⁹ Zvinoimirwa ne rugondeso, nguwa itcha pangidzirwa na Mwari ana ake otchokwadhi. ²⁰ Zwisikwa zwese zwakazwi azwina bhasa, zwisiripi mukudha kwazwo, asi ngokudha kwo uya wakazwisika kuti zwidharo, ²¹ ngokuti panorukariro rokuti zvisikwa zvitcha sunungurwa mukudvinyirirwa rusununguko rokukudzwa nokuzwii ana aMwari. ²² Tinozwiziya kuti zwisikwa zwese zwinotetemera nokurwadziwa hingana mai pakubhara nyamasi uno. ²³ Zwisiripi bhasi zwisikwa, asi nesuo, tine zwibhereko zwokutanga zvo Mweya - bhudhikidze nesu tino tetemerao ngomukati, kuimira kuti Mwari aite kuti tiri ana ake noku sunungura miwiri yedhu patchose. ²⁴ Ngokuti taka nunurwa ngokudha kworukariro. zwatiri kuimira kuti zviitike azwisati zwaonekwa, zvingaitika kudhini kuimira zwiro zwaakuti onekwa? ²⁵ Asi zwatiri kuimira zwatisika onekwi, tinozwiimira norukariro. ²⁶ Ngomushobho umweo, Mweya uno bhatsira pakupera kwedhu simba. Ngokuti hatikoni kunamata, asiMweya unoti namatira noku tetemera, kusika reketeki ngo mazwi. ²⁷ Mwari anoona zviri mukati memoyo, anoziya ndangariro yoMweya, ngokuti unonamata kubhetsera atsweni, ngokudha kwa Mwari. ²⁸ Tinozviziya kuti zwiro zwese zwino senza pamwepo kuitira zvakanaka kuno anodha Mwari, noaka dhaidzwa ngo kudha kwo tchinangwa tcha MWari. ²⁹ Ngokuti anhu akasanangurwa na Mwari pokutanga, wakaasika kuti afananidzwe se zvakaita Mwana Wake, kuti aite dhangwe pakati pehama jinji. ³⁰ Mwari waka dhaidza anhu anga abhararika. Wakaatendera aite ana ake pamwepo nokua kudza. ³¹ Hino toreketa kutii pazviro zvese izvi? Kudhai Mwari ari ku dhii redhu, ndiani utchadha kutirwisa? ³² Hazi kusiya Mwana wake, asi Wakamuperekera kwetiri, ndipo paaga tama kukona kutipa zvese izvi? ³³ Ndiani utcha pumha munhu waka sanganurwa na Mwari? NdiMwari utchatambira. ³⁴ Ndiani utchasunga? Kirisitu ndiye wakatifira, pamwepo nokumuka. iyena uri ku dhii romoko kwao wa Mwari, ndiena unoti namatira. ³⁵ Ndiani ungati paradzanisa no rudo rwaDjeso? Kungaita kushuphika, kutama, kuteererwa, nzara, urombo, zvinothyisa kana kuti rufu? ³⁶ Se zva zvinorea zvitarwa kuti: Ngokudha kwako, tiri kufa mazuwa ese. Tirikuizwa sa mabhira pakwenda kourahwa ³⁷ Muzwiro zwese izwi, taka kunda ngokudha koUya wakatidha. ³⁸ Ndinozwiziya kuti kunyangwe rufu, Ngirosi, atungamiriri, zwiro zwa nyamasi, zwamangwana, masimba, ³⁹ kurebha, kudzika, na tchimwe hatcho tchinganti paradzanisa norudho rwa Djeso Kirisitu Ishe wedhu.