¹ Ndinoti, zwaari mwana mudhoko muridzi we nhaka, azwizi kusiana no musenzi, kunyangwe ari Ishe we zwese. ² Hino ari pasi pe atsigiri no atungamiriri, kuzogumira nguwa yaka temerwa na bhabha. ³ Ndizwoo naisusu, patanga tiri ana adhoko, taisenzeswa pasi pomaitiro enyika. ⁴ Hino payakaguma nguwa, Mwari akatuma mwana wake, wakabharwa no mukadzi, wakabharwa pasi po mitemo, ⁵ kuti aripire anga aripasi pomitemo, kuti tizotorwe kuita ana. ⁶ Uye, zwamuri ana, Mwari wakatumira mweya wa mwana wake mu moyo dzenyu, uwo anodhaidza: "Aba, Bhabha" ⁷ Autchiripi musenzi, asi mwana, zwauri mwana, uye uri mutori wenhaka nokudha kwa Mwari. ⁸ Zwamusikazii Mwari, mutchasenzera ku aya okuti paunhu wao asiripi madziMwari, ⁹ Hino zwamaakuziya Mwari, kupinda izwi, maakuzikanwa na Mwari, ngei maakuhwirirazve kunoakaremba pamwepo no maitiro aanodha, awo amurikudhazwe ku senzera? ¹⁰ Muri kutchengeta mazuwa, mwedzi, nguwa no makore. ¹¹ Ndinotya ngondawa ienyu kuti pamweni ndiri kumusenzerai nyore. ¹² Ndinoku kumbirai, hama, itaiwo sa inini, ngokuti inini ndakaitao sa imwiwi. Hapana zvakatchata zvamandi itira. ¹³ Munozvizia kuti ngokudha ko kutambudzika konyama ndakakuzisai vhangeri pokutangisa. ¹⁴ Amuzi kusiira mukana kumiedzo yokunyozera unhu wangu, kunza kwazvo mwakandi tambira sa mutumwa wa Mwari, kundiitao sa Djesu. ¹⁵ Hino Kudhakara kwenyu, kuripi? Uye ndinokupupurirai kuti, kuday zvaiita kundi kwatchurira madziso enyuwo mondi pasa. ¹⁶ Ndazoita, here murwisi wenyu ngondawa yotchokwadhi tchandinoso reketa. ¹⁷ Ano zwaarikudha kwemuri, muzwakanakapi ne; arikudha kutisyanisa, kuti mupangidzire tchidho nao. ¹⁸ Zwakanaka, kupangidzira tchidho muzvakanaka nguwa dzese, kunuyngwe tisiripi tese pano. ¹⁹ Zwiana zwangu, zwandino tambudzikirazwe nomarwadzo ekubhara, pakuzo guma mukirisiti wa gara mwamuri. ²⁰ Ndaidhao inini kugara nemwi zvino, ndeitchinja izwirangu, ndiri kuganagana ngo ndawa ienyu. ²¹ Ndidhairei, kuti murukudha kugara pasi po mitemo: amuzwi mitemo here? ²² Zvakatarwa kuti Aburahama wanga ano ana airi: Umwe wa musenzi, umweni ngo omusununguki. ²³ Mwana womusenzi wakabharwa ngokudha kwe nyama, asi omusununguki ndie wakabharwa ngokudha kwe rugondeso. ²⁴ Itchi tchipangidziro, tchozvisungo zviiri: tchimwe ngotchopadhunhu, re Sinai, uwo anobhereka ana aite asenzi, ndi Agari. ²⁵ Agari uyu ndi dhunhu reSinai, kuArabia, ndizvoo no Djerusarema ra nyamasi, rinosenzeswa no ana ake. ²⁶ Asi Djerusarema rokumusoro rakasununguka, iri ndiro atswari edhu. ²⁷ Ngokuti zvakatarwa: O mhanje, dhakara hako, usika bhari ana, dhurura khuwa nokupembera, iwewe usiripi pakubhara, ngokuti ana ajinji ngomusiiwa, kupinda uwo anomwanarume . ²⁸ Imwimwi, hama, hingana Izaki, muri ana erugondeso, ²⁹ kudhaiwo nonguwa dziya, tchakabharwa ngokudha ko nyama tchaiteera tchaka bharwa ngokudha ko mweya, kuddharowo na nyamasi. ³⁰ Zwitarwa zwinotii? ''Dzingira musenzi no mwana wake, ngokuti azviiti mwana omusenzi kupinda nhaka pamwepo no mwana owaka sununguka''. ³¹ Hama, atiripi ana emusenzi, asi emusununguki.