¹ Kwanga kuno mukuru umweni kunyica ye Cesareia waizwi Kornerio, wanga ari musodja wairikira nokuzwi Itariano. ² Wanga ane usisi, waithya Mwari, ne nyumba yake yese, waipawo zvijinji kune anhu, way rumbwa ectchi namata nguwa yese. ³ Wakawona patchena mutchioneso, munguwa fhembamwe dze masikati, wakaona ngirosi yeiuaa kwaanga ariyo, yetchimubvunza: ''Cornelio!'' ⁴ Uye iyena, akanyatsa kuinangisa, waitya, etchiti: ''Ishe! Tchii?'' Ngirosi yakazoti minamato yako nokupasakwako zwazika kumurangariro waMwari''. ⁵ Tuma anhu zwinozwinoku aende kumutanha we Jope, dhaidza Simau okaa Pedro. ⁶ Murendo okumba kwaa Simiau muiti womatewe, uye nyumba yake iriduze nemubhahari''. ⁷ Payakaenda Ngirosi yaibuyanayo na Cornelio, wakadhaidza mabhitchu ake anokwana airi, nomusodja umwe akanyatsa kurongeka, waairumbwa anaye nguwa iri yese. ⁸ Paakapedza kua tsanangurira masoko ese, wakaatuma kuti aende Jope. ⁹ Uye mangwanafumi, ari mugwanza, uye akaguma paduze no mutanhewo, Pedro wakakwira padhenga po nyumba kuti anamate munguwa yetchitanhatu. ¹⁰ Uye wakazwa nzara, waydha tchokurhya, munguwa yaai gadzirira kuti atchite paangaaripo wakawirhua no tchitutumusso. ¹¹ Yena wakaona dhenga rakafunguka, wakaona tchiro, tchaidzaka kubva mudhenga tchakaita hingana djira mheto dzakona dzaikwana matiwi marongomuna enyka. ¹² Apona panga pana zvinyama zvese zviri panyca, zvino hamba no mirenje mirongomuna, no zvinyama zvomushango uye, zvinokambaira, pamwepo no shiri dzomudhenga. ¹³ Rakamuzira izwi reyti: Pedro, uraya urhe. ¹⁴ Asi pedro wakati: ''Ishe Handitodhi, ngokuti handisati ndakamborya tchandisikazi kutendedzwa kanakuti tchakaswipa''. ¹⁵ Izwi rakaphindazwe kureketa, kotchipiri: ''Zwakasikwa naMwari azwiiti kuti iwewe uzwiti azwizi kutenderwa. ¹⁶ Izwii zwakaitika katatu, tchirotcho tchakazo zwirizwa kudhenga. ¹⁷ Pedro paairangaridza ngokudha ko zwaakaoneswa uye wakazwiwona mo tchioneso, anga aripoo anhu anga akatumwa aya na Kornerio, akabvunzisa kumba kwa Simau, akaima ngopamusuwo. ¹⁸ Etchidhaidza, akabvunzisa kuti ndipo here pano panomurendo anozwi Simao okaa Pedro. ¹⁹ Pedro paaifunga ngokudha ko kokuwoneswa, mweya wakamubvunza: ''Urukutswakwa ne anarume atatu. ²⁰ Hino woymuka; dzaka uende nawo, usabvunzise, ngokuti ndini ndaatuma''. ²¹ Pedro paakadzaka kuendera anhu aya wakati: ''Ndini wakhona wamurikutswaka; murukutswakei pano?'' ²² Atumwa akati: "'Kornerio, mutereri weakuru ye masodja wakarongeka, mutsweni anotya Mwari, anopupuriruha ngokuita zwakanaka naanhu ese emunyka dze maMdjuda, wakazvi bvunzwa no ngirosi itswene ya Mwari kuti uyende kumba kwakeyo, kuti azwe zwaunomubvunza''. ²³ Wakaadhaidzira mumba, woatambira panyumbepo. Mangwana fumi wakmuka Pedro wakaenda nawo, wakaenda pamwepo no hama nganani dzokuJope. ²⁴ Mu tsuku yotchipiri akaguma muCezareia. Cornelio wanga wakaaimira, wanga wakakoka otchinyaukama ake, anyarumbi aaidhisisa. ²⁵ Zwakazoitika ngozwokuti Pedro pakupinda munyumba mwakemo, Kornerio wakasongana naye, omugodhamira mumirenje wakamunamata. ²⁶ Pedro wakazomumutsa etchimubvunza: ''Muka hako, inini ndirimunhuwo hake''. ²⁷ Paaitchedza, akapinda, wakaona ajinji anga akaungana Wakazoabvunza. ²⁸ Wakati: ''Munozwiziya kuti azwiiti mubharwa omuDjuda kuvengana kana kuti kukwedhererana noanhu okunza? asi Mwari wakandipangidzira kuti azviiti kureketa kuti haazi kurongeka kanakuti akaswipa. ²⁹ Uye inini, ndinosodhaidzwa, ndauya ndisikazi kubvunzisa, hino ndotchimubvunzisai: Mwandidhaidzirei?'' ³⁰ Kornerio wakazoti: ''Kwaakupinda tsuku murongomuna kuguma nguwa ino ndaitsanya, uye ndetchinamata kuguma nguwa ye tchi pfembamwe mumba mwangu. ³¹ Panomunhu wakauya kwendiri, wanga wakapfeka matchira akadjekereka, wakanditi: ''Minamato yako yazika kuna Mwari, uye kupa kwako kwarangarirwha kuna Mwari. ³² Tuma aende Djope, uye dhaidzisa Simao okaa Pedro; murendo kumba kwaa Simiao unogara muduze no bhahari''. ³³ Ndizvo zvakaita ndikudhaidzise, uye waita zvakanaka ngokuuya kuno, hino tese tiripano pamberi pa Mwari, tizwe, Mwari zvaarikudha kutitsanangurira''. ³⁴ Pedro wakafungura muromo etchiti: Ndinozwiziya kuti zvirokwazvo, Mwari haanangisi anhu. ³⁵ Asi, pasi pese, uya anotya, anoita zwiripamutemo, ndiye anodhakadza Mwari. ³⁶ Soko raaka tumira Mwari kuana eIziraeri, etchiziisa soko rorunyararo gnokudha kwa Djesu, ndi ishe waese. ³⁷ Munorizia soko rakapinda muDjudeia wese, kubvira muGarireia, mukupera ko kubabatidzwa kway paridzwa naDjohani. ³⁸ Uye ngokudha kwa Djesu we Nazareta; uye Mwari wakamudzodza no mwya mutsweni, no masimba, uwo waihamba etchiita zwakanaka, uye eirapa ese anga akasungwa na Sathani. Mwari wanga anaye. ³⁹ Tisupano tchapupu tcho zwiro zwese zwaiita, munyika yomaDjuda, pamwepoo no ekuDjerusarema, uwo waakauraya, womukhomera patabhwa. ⁴⁰ Mutsuku yotchitatu wakamutswa na Mwari. Wakaita kuti anhu anyangararike. ⁴¹ Kuanhu esepi nee, asi kuaya apupuri anga akasanangurwha kare na Mwari: Kwatiri, takandya nokumwa pamwepo nae, kubva pakumuka kwake muakafa. ⁴² Wakatituma kuparidzira anhu, nokuziisa kuti ndiye wakasanangurwha na Mwari kuti azoite mutongi weapenyu no akafa. ⁴³ Uye maphorofiti ese anomupupurira, kuti ese anotenda kwaari anozoregererwha zwitema zwawo, ngokudha kwezina rake. ⁴⁴ Pedro paaibuya masoko aya, mweya mutsweni wakapinda kwesse aizwa soko irona. ⁴⁵ Uye noatendi anga akaita hutchekeri, no ese anga akaenda na Pedro, akagomba nazvo kuti kumahedeniwo kwaka dhururwhao tchipo tcho muya mutswene. ⁴⁶ Ngokuti awona aiazwa etchireketa nomitauro yakasiana siana, etchikudza Mwari. Hino pedro wakazodhaira: ⁴⁷ Zwingaita here kuti munhu harambe nomvura, kuti aya asa babatidzwe, nazwo kuti, pamwepo naisusu, akatambira mwea mutsweni? ⁴⁸ Uye wakaa tuma kuti ababatidzwe muzina raDjesu. Kuzobvepo wakazowa kumbira kuti andorumbwe ari ese ku mazuwa manganani.