¹ Phauri naThimothi, varanda vaKristu Jesu, ndinonyorera kwavari veshe vakacheneswa munaKristu Jesu avo vari muFiripi, pamwepo nevatungamiriri vakuru vechiara nevadetseri. ² Nyasha ngadzigare kwomuri nekunyarara zvinobva kunaMwari Baba edu naMambo Jesu Kristu. ³ Ndinobonga Mwari wangu nguva yeshe yendinokarakadza ndimwi. ⁴ Ngenguva dzeshe mukukumbira kwangu kweshe ndimwi mweshe ndinokumbira ngokudakara. ⁵ Ngendaa yekubatana pamwepo kwenyu mukuhambisa vhangeri kubvira pazuva rekutanga metsa zvino. ⁶ Ndechigonda ichi, kuti uwo wakatanga mushando wakanaka mukati mwenyu unozouita kuti uperere metsa pazuva raJesu Kristu. ⁷ Kudai ngezvezvakanaka kuti ndiwe nomupinimidzo wakadaro ndimwi mweshe, ngokuti ndinemwi mumwoyo mwangu, ngokuti mukusungwa kwangu nokudzirwira nokugwinyisa vhangeri, imwimwi mweshe munokovana neni munyasha. ⁸ Ngokuti Mwari ndiye chapupu changu, munjira yendinomushuwira mweshe ndiyo kakuru ngerudo raKristu Jesu. ⁹ Uyu ndiwo mukumbiro wangu: kuti rudo rwenyu riangirire kuwanda nekuwanziswa mukuzia nekuzwisisa kweshe, ¹⁰ kuti muedze muzie zviri zvakapinda kunaka, kuti muite vakacheneswa vasina ndaa metsa pazuva raKristu, ¹¹ mwechizadzwa ngemuchero yokururama, iyo iripo kubudikidza ndiye Jesu Kristu, mukukudza nokuirikidza Mwari. ¹² Asi ndinoda kuti muzie, hama, kuti izvo zvakaitika kwendiri zvakashanda kuhambisa vhangeri. ¹³ ndizvo kusungwa kwangu ngendaa yaKristu kwakaziikanwa kwavari veshe vari mumhatso yamambo nokunevamweni veshe; ¹⁴ hama jinji dzakaitwa kuti dzigonde munaMambo ngokusungwa kwangu, nadzo dzinopinda kutsunga kureketa izwi raMwari dzisikatkyi. ¹⁵ Ngegwinyiso vamweni vanochumaira Kristu ngegodo nehasha, asi vamweni ngemwoyo unoda. ¹⁶ Vamweni vanoita kudaro ngerudo, vechizia kuti ndakaemeswa kurwira vhangeri. ¹⁷ Asi vamweni vanochumaira Kristu ngehasha, vasikaiti ngegwinyiso, vechipinimidza kututsira kutambudzika kwendiri muusungwa wangu. ¹⁸ Zvinendaa yeyi izvi? Kwega kuti ngenjira dzeshe, kunyazwi ngokudziitisa nokuti ngegwinyiso, Kristu unochumairwa; neni ndinodakara ndizvo. Eya, ndinozoangira kudakara, ¹⁹ ngekuti ndinozia kuti izvi zvinozokunukuka kuita ruponeso rwangu ngokukumbira kwenyu nekudetsera kwoMweya waJesu Kristu. ²⁰ Ndikwo kudisisa nokukarira kwokugonda kwangu, kuti andizotsveruki ngechiro nachimwe, asi kuti ngokureketa kwangu ngokutsunga, kudai ngenguva dzeshe, kuti nazvino Kristu unozokuriswa mumuiri wangu kunyazwi mukurarama nokuti murufu. ²¹ Ngekuti kwendiri kurarama ndiKristu norufu kuuyirwa. ²² Asi kudai ndechipona munyama, zvinoronza muchero yemushando wangu neni; andizii chendichaketa. ²³ Asi ndinomanikidzwa pakati peizvi zviiri. Chidisiso changu ngechokuti ndibve ndiende koogara naKristu, ngekuti ndizvo zvakapindisisa kunaka. ²⁴ Asi kugara munyama kunopinda kufanera ngendaa yenyu. ²⁵ Ndechigonda izvi, ndinozia kuti ndinozogara ndechiangirira kugara nemwi mweshe, mukuenda mberi nokudakara mukugonda, ²⁶ kuti kuganza kwenyu kuwanzwe munaKristu Jesu, ndapetukazve kwomuri. ²⁷ Kwega kuti muhambe kudai ngezvinosisira vhangeri raKristu, kuti kunyazwi ndechiuya koomuona nokuti ndisipo, ndingazwa ngendaa yekugara kwenyu, ndinozozia kuti mwakaema mwakagwinya ngomweya umwewo, ngemwoyo umwe mwechirwira kugondwa kwevhangeri. ²⁸ musikatkyisidzirwi ngechiro nachimwe ngeavo vanorwisana nemwi. Kwavari izvi zviri chioniso chiri pamhene chokurashwa, asi kwomuri zviri chioniso choruponeso, urwu unobva kunaMwari. ²⁹ Ngokuti kwakatenderwa kwomuri nguva ngenyasha, haiwa yokutenda kwega munaKristu, asi yokutambudzika ngendaa Yake, ³⁰ mwechirwawo kurwa kwemwakaona kwendiri namanje munozwa kuti ngekwangu.