¹ Pakugumisira, hama, tikumbirirei kuti izwi raMambo rihambiskwe nokukudzwa, kudai ngezverinoita pakati penyu, ² zve, kuti tinunurwe kubva kuvanhu vasikazi kunaka nevakashata, ngekuti andivopi veshe vanokugonda. ³ Asi Mambo unogondeka nekuti unozomugwinyisa nekumungwarira kune uwo wakashata. ⁴ Nesu tine gonda munaMambo ndimwi, kuti munoita munozoitazve zviro zvetinomupanga. ⁵ Mambo ngaatungamirire mwoyo yenyu kurudo rwaMwari nomukusengerera kwaKristu. ⁶ Nokuti hama, muzita raMambo wedu Jesu Kristu, kuti mupauke kubva kunehama yeshe inenungo, isikahambi kudai ngemipango yevakaashira kubva kwetiri. ⁷ Ngokuti imwimwi mwemene munozia njira yokutiedzerera ndiyo isusu; ngokuti atizi kuita nungo pakati penyu, ⁸ atizi kurha chingwa chomunhu nokuti ngouri tisikazi kuchitenga, asi takashanda techitambudzika usiku nemasikati kuti tisazoita mutwaro kunoumwe wenyu. ⁹ Haiwa ngokuti tainga tisina simba, asi kuti tidziite chionero kwomuri, kuti imwimwi mutedzerere. ¹⁰ Petainga tichirinemwi takamupanga kuti: “Kudai aripo munhu usikadi kushanda, asazorha.” ¹¹ Ngokuti tinozwa kuti vamweni vanoita nungo pakati penyu, vasikashandi, asi vanokangaidza vanhu. ¹² Zvino avo vakadaro tinovapanga nokuvapota munaMambo Jesu Kristu kuti vashande mushando yavo ngekunyarara, varhe chingwa chawo. ¹³ Hama, musaremba kuita zvakanaka. ¹⁴ Kudai aripo munhu usikazkwii izwi redu reiyi tsamba, muringisisei munhuwo, kutimmusazkwanana naye, kuti ena adaniskwe. ¹⁵ Musazomuerenga kuti igaa, asi mumupange kudai ngehama. ¹⁶ Mambo weronyararo emene ngaamupe kunyarara nguva dzeshe nenjira dzeshe. Mambo ngaagare nemwi mweshe. ¹⁷ Inini Phauri ndanyora kutambisa uku ngenyara yangu yemene. Ichi chioniso chiri mutsamba yangu yeshe; ndiyo njira yendinonyora ndiyo. ¹⁸ Nyasha dzaMambo wedu Jesu Kristu ngadzigare nemwi mweshe.