¹ Hama, ngendaa yekuuya kwaMambo wedu Jesu Kristu nokuunganidzwa kwedu kwaari, ² tinokumbira kuti musazokasira kuzunguniswa mumipinimidzo nokuti kushamiswa, kunyazwi ngomweya nokuti ngeizwi nokuti ngetsamba, yakadai ngeinobva kwetiri, yechiti zuva raMambo raguma. ³ Musazochengedzerwa ngemunhu kunyazwi ngeiri njira; ngekuti zuva iro arizogumi kusati kwaapo kupauka kutanga, nemunhu wokushaisha asati aoniswa, Mwanakomana wekurashwa. ⁴ uwo unorwisa nokudzitunhumadza padera pazvo zveshe zvinozwi zvimwari nepadera pezvinodirwa, ndizvo unogara pachigaro chake mutemperi raMwari, echidziita Mwari. ⁵ Amuchakarakadzi here kuti apo ndichiriipo nemwi ndakamureketera izvi zviro? ⁶ Nazvino munozia icho chinomurambidza, kuti uwo aoniswe ngenguva yake yaguma. ⁷ Ngokuti chakafishika chisikazi kunaka choshanda; asi zvichaitika metsa uwo unorambidza zvino abviswa. ⁸ Apo wakashata unozooneswa, uwo unozoparadzwa ndiMambo Jesu ngemweya womuromo wake, nekumuparadza ngokuoneka kwokuuya kwake. ⁹ Kuuya kwouwo usikazi kunaka kwakadai ngekushanda kwaSathani, unoshandisa simba reshe, zvioniso, mishamiso yemanyepo, ¹⁰ ngembeu yeshe yokuchengedzera kweshe kwokusikanaka kwavari vanorashika, ngokuti vanoramba kuda gwinyiso kuti vaponeswe. ¹¹ Ngeiyi ndaa Mwari unovatumira simba guru rekuvapausa, kuti vatende manyepo, ¹² kuti veshe vasikatendi gwinyiso, asi vechidakadzwa ngekusakatendeka vatongwe. ¹³ Asi kunodikanwa kuti tibonge Mwari nguva dzeshe ngendaa yenyu, hama dzinodikanwa munaMambo, ngekuti Mwari wakaketera kuita muchero yekutanga yeruponeso kubudikidza ngokucheneswa kwoMweya nokubudikidza ngekutenda gwinyiso. ¹⁴ Ngekuti izvi ndizvo zvaakamudaidzira kubudikidza ngevhangeri redu, kuti muashire uthende waMambo wedu Jesu Kristu. ¹⁵ Ndizvo, hama, emai mwakagwinya, mubate mupango yemwakadzidziswa tisu, kunyazwi ngeizwi nokuti ngetsamba yedu. ¹⁶ Zvino, ndizvo, Mambo wedu Jesu Kristu emene naMwari Baba edu, uwo wakatida nokubudikidza ngenyasha wakatipa kuembedzerwa kusikaperi negonda rakanaka, ¹⁷ ngaaembedzere mwoyo yenyu nekuigwinyisa kumushando yeshe nekumazwi eshe akanaka.