¹ Phauro, Sirivhanusi naThimothi, ndinonyorera kuchiara chevaThesaronika chiri munaMwari Baba edu naMambo Jesu Kristu. ² Nyasha ngadzigare nemwi nokunyarara zvinobva kunaMwari Baba edu naMambo Jesu Kristu. ³ Tinofanira kubonga Mwari nguva dzeshe ndimwi, hama, kudai ngezvinosisira, ngokuti kugonda kwenyu kunokura kakuru, norudo rwenyu umwe kunoumweni runowanzwa. ⁴ Ndizvo isusu temene tinoganza ndimwi pakati pezviara zvaMwari ngendaa yokusengerera kwenyu nokugonda kwenyu mukutambudzika kweshe nomumadambudziko omunoshingirira. ⁵ Izvi zvinoonisa kururama kwekutonga kwaMwari, kuti muerengwe muri vanofanira umambo waMwari, uwo womunotambudzikirawo. ⁶ Ngegwinyiso chiri chiro chakatendeka kunaMwari kuti aunzidzire kutambudzika kwavari vanomutambudza, ⁷ nokupa kudzorora kwomuri vanotambudzika pamwepo nesu, apo Mambo Jesu paanooneswa echibva mudenga pamwepo nengirosi dzake dzine simba, ⁸ mumurazvu womuriro unobaka, echiunzidzira kwavari vasikamuzii Mwari nokwavari vasikayaeyii vhangeri raMambo wedu Jesu. ⁹ Avo vatambudzwa ngekuparadzwa kusikaperi, vanozopaurwa kubva kuhope yaMambo nokubva kuuthende wesimba rake, ¹⁰ apo paanouya kooirikidzwa ngevakacheneswa vake nokushamiswa pakati pavo veshe vanotenda, ngeiro zuva, ngokuti uchapupu wedu kwomuri wakatendwa. ¹¹ Ngeiyi ndaa isusu tinomukumbirira nguva dzeshe, techikumbira kuti Mwari wedu amuite vanofanira mukudaidza kwake nokuzadza ngesimba rake rokudisisa kweshe kuita zvakanaka nemushando wekugonda, ¹² kuti zita raMambo wedu Jesu riirikidzwe mwomuri, nemwi muirikidzwe mwaari, dai ngezvakaita nyasha dzaMwari wedu naMambo Jesu Kristu.