¹ Pawulo, nandza wa Xikwembu ni mupostola wa Yesu Kriste, nirhumiwile kuseketela kupfumela ka vanhu lavahlawuliweke hi Xikwembu, ni kuvapfuna kutiva ntiyiso lowujondzisiwaka hi vukhongeli bza hina, ² bzinga lebziyakiweke henhla ka kulangutela vutomi lebzingaheliki. Xikwembu lexingaliki na kuhemba xihitshembisile vutomi lebzi, na minkarhi yingasiva kona; ³ kutani xibzihumesile rivaleni hi dlela ya kuchumayela, loko nkarhi lowunene wufikile, hikuva ninyikiwile mahungu lawa, hi kulerisa ka Xikwembu Muponisi wa hina. ⁴ Nitsalela Tito, n'wananga wa xiviri, kupfumeleni loku hinga nakona svin'we, nili: Timpsalu ni kurhula, asvive na wena, svihuma ka Xikwembu Tatana, ni ka Yesu Kriste Muponisi wa hina! ⁵ Mhaka leyiyendleke lesvaku nikusiya le Kreta, aniyendlela lesvaku usala uhetisa lesvi asvahalava kululamisiwa, nasvona uhlawula vakulukumba va kereke doropeni rin'wana ni rin'wana. Tsundzuka lesvi nikuleriseke svona: ⁶ Mukulukumba afanela kuva munhu lweyi angaliki na xisandzu, anga ni nsati mun'we ntsena; vana va yena vafanela kuva vapfumeli, lavangasoliwiki hikolaho ka mahanyela ya vona ya mpfilumpfilu, ni kutiyalisa ka vona, ⁷ hikuva bixopo wa kereke afanela kuva munhu wopfumala xisandzu, lesvi anga mulanguteli wa ntirho wa Xikwembu. Angatshuki ava munhu lweyi atikulisaka, kumbe munhu wa xikwatisana. Angavi lweyi atinyiketaka bzaleni, kumbe munhu wa vukarhi, hambi kunavela sva van'wana; ⁸ kambe afanela kuva munhu lweyi atsakelaka kuyamukela vayendzi, lweyi arhandzaka svilo lesvinene, lweyi atikhomaka, lweyi alulameke, lweyi ahlawulekeke, lweyi akotaka kutikhoma mahanyeleni ya yena; ⁹ aave munhu lweyi anamarhelaka Rito leritshembekeke, lerifambelanaka ni lesvi svijondzisiwaka, atakota kutiyisa van'wana hi jondzo leyinga ya ntiyiso, nikukomba kuhoxa ka lava valwaka na yona. ¹⁰ Hikuva vatele lavatiyalisaka, ni kukanganyisa van'wana hi kuvulavula ka vona ka hava, ngopfungopfu xikarhi ka vapfumeli lavahumaka xiyudeni. ¹¹ Svafanela lesvaku volavo vamiyetiwa, hikuva vakokela kule vanhu hinkwavu va minjangu yin'wana, vajondzisa lesvi vangafanelangiki kusvijondzisa, hi kunavela rifuwo rohomboloka. ¹² Ku ni Mukreta, mun'we wa vaprofeta wa vona, lweyi angatshama aku: “Vakreta i vanhu va mavunhwa; i sviharhi lesvobiha, ni malolo lawa manga ni makolo.” ¹³ Kunene lesvi asvivuleke svitiyile. Hikolaho wena ufanela kuvatshinya hi matimba, lesvaku vatava ni kupfumela loku kuhanyaka, ¹⁴ vatakala vangayingisi minkaringana ya xiyuda, ni kulerisa ka vanhu lavafularheleke ntiyiso. ¹⁵ Svilo hinkwasvu svitengile ka lava vatengeke; kambe aku na lexitengeke ka lavanyameke, ni ka lava vangapfumeliki, hikuva miyehleketo ya vona ni mapfalu ya vona svinyamisiwile. ¹⁶ Hi milomo ya vona, vavula lesvaku vativa Xikwembu, kambe hi mintirho ya vona vaxilandzula. Hikolaho vanyenyentsa, vayala kuyingisa, avakoti kuyendla ntirho ni wun'we lowunene.