¹ Kambe wena, ufanela kujondzisa lesvi jondzo leyinga yona ya ntiyiso yilavaka svona. ² Vavanuna lava vajuhaleke vafanela kutiva kutikhoma vava lava vaxiximekaka, vava ni kuyehleketa lokunene, vava ni rirhandzu ni kupfumela loku kuhanyaka ni kulehisa mbilu. ³ Na vona vavasati lavajuhaleke avave ni matshamela lawa makhensekaka, vangali ni mahlevo, kumbe lavatinyiketaka bzaleni; vava vajondzisi va lesvi sva kululama, ⁴ lesvaku vatajondzisa vavasati lavampsha kurhandza vanuna va vona ni vana va vona, ⁵ vakota kutikhoma ni kutenga, vava lavahlayisaka minjangu ya vona hi mfanelo, vava ni timpsalu, vayingisa vanuna va vona, lesvaku Rito ra Xikwembu ritakala ringasandziwi hi munhu. ⁶ Hi mukhuva wolowo, khutaza majaha lesvaku makota kutikhoma. ⁷ Rhanga wena uva xikombiso xa mintirho leyinene hi matlhelo hinkwawu. Kujondzisa ka wena akuve loku kubaseke ni kutshembeka; ⁸ tirhisa marito lawa manga wona ya ntiyiso, lawa mangasolekiki, lesvaku lweyi alwaka na wena atakhomiwa hi tingana hi kupfumala svobiha lesvi angasvivulaka ha hina. ⁹ Svikarawa svifanela kuyingisa vinyi va svona, svivanyika kutsaka timhakeni hinkwatu. Svingaphikizani na vona, ¹⁰ kumbe kuvayivela, handle ka lesvo avakombise lesvaku valulamile ni kutshembeka masiku hinkwawu, kutani ka hinkwasvu lesvi vasviyendlaka vatakomba kusaseka ka lesvijondzisiwaka hi tlhelo ra Xikwembu Muponisi wa hina ¹¹ Hakunene timpsalu ta Xikwembu ta kuponisa vanhu hinkwavu, tihumeseliwe rivaleni; ¹² tihijondzisa kutshika kusandza sva Xikwembu ni kunavela sva misava, kutani hihanya misaveni leyi hi kutikhoma, ni kululama, ni vukhongeli, ¹³ na hili karhi hilangutela minkateko leyi hitshembisiweke yona, siku leri kungatahumelela kukwetsima ka Xikwembu Nkulukumba, ni Muponisi wa hina Yesu Kriste. ¹⁴ Hi yena lweyi atinyiketeke hikolaho ka hina, lesvaku ahikutsula kuhombolokeni hinkwaku, ahiyendla vanhu lavatengeke, lava vanga va yena ntsena, ni lava vachivirikelaka kuyendla lesvinene. ¹⁵ Jondzisa timhaka leti, utirhisa matimba hinkwawu lawa unganyikiwa wona kukhutaza ni kutshinya van'wana. Ungachipisiwi hi munhu.