¹ Loko svilitano, lesvi hingayendliwa lavalulameke hi mhaka ya kupfumela, hi ni kurhula ka Xikwembu, hi Hosi ya hina Yesu Kriste; ² nasvona hi kupfumela, hikotile kukuma ha yena timpsalu leti hiyimeke ka tona svosvi, kutani hitikulisa kulanguteleni ka hina ka kuyaveliwa kukwetsima ka Xikwembu. ³ Kungali svosvo ntsena, kambe hitikulisa ni le kuxanisekeni ka hina, hi kutiva lesvaku kuxaniseka kupsala kutiyisela, ⁴ kutiyisela kupsala kuhlula miringo, ni kuhlula miringo kupsala kulangutela; ⁵ kutani kulangutela akuhikhomisi tingana, hikuva Xikwembu xichelile rirhandzu ra xona timbilwini ta hina hi Moya Lowokwetsima lowu hinyikiweke wona ⁶ Loko hahali ni gome, Kriste afele lavohomboloka, hi nkama lowuvekiweke hi Xikwembu. ⁷ Svingakarhata ka munhu kufela munhu mun'wana lweyi alulameke; kumbexana mun'wana aatatiyisa mbilu afela munhu lwenene. ⁸ Kambe Xikwembu xikombisa rivaleni rirhandzu ra xona ka hina, hi lesvi Kriste angahifela loko hahali vajohi. ⁹ Loko svilitano, lesvi hingayendliwa lavalulameke svosvi, hi mhaka ya rifu ra yena, ngopfungopfu hitaponisiwa ha yena ka mahlundzu ya Xikwembu. ¹⁰ Loko hahali valala ka Xikwembu, hiyendliwile lavavuyelelaneke na xona hi kufa ka N'wana wa xona; kutani, lesvi hingavuyelelana na xona, ngopfungopfu hitaponisiwa hi mhaka ya vutomi bza Kriste. ¹¹ Kungali svosvo ntsena, kambe hatitlakusa ka Xikwembu ha Hosi ya hina Yesu Kriste, lweyi svosvi hiyamukeleke kuvuyelelana loku ha yena ¹² Kutani-ke, kufana ni lesvi kujoha kungheneke misaveni hi munhu ali mun'we, na rona rifu ringhenile hikolaho ka kujoha, hi mukhuva wolowo rifu ritlulele vanhu hinkwavu, hikuva hinkwavu vajohile. ¹³ Kujoha akuli kona misaveni kukondza kufika Nawu, hambilesvi kujoha kungavuliwiki lesvaku i kujoha, loko kungasiva ni Nawu ¹⁴ hambi svilitano, rifu rive kona kusukela ka Adamu kuyafika ka Moxe, rifumile ni lavavokala vangajohanga hi kutlula svileriso sva Xikwembu kukota Adamu. Kutani Adamu aafanisa munhu lweyi aahali ndleleni. ¹⁵ Kambe ntirho wa timpsalu lowutirhiweke hi Xikwembu awupimanisiwi ni nandzu lowungayendliwa hi Adamu; hikuva, loko nandzu wa munhu mun'we ntsena wudlayisile vanhu lavanyingi, timpsalu ta Xikwembu ni nyiko ya timpsalu leyiteke hi munhu mun'we ntsena anga Yesu Kriste, svitlulisile ngopfungopfu hi kutala ka vanhu lavanyingi. ¹⁶ Ku ni kuhambana xikarhi ka nyiko ya Xikwembu ni lesvivangiweke hi kujoha ka munhu mun'we lweyi; hikuva kuthethisa loku kuyendliweke hikolaho ka nandzu wun'we, kutisile kubiwa, kasi ntirho wa timpsalu lowuyendliweke ni loko milandzu yili leyinyingi, wutisile kutshunxiwa. ¹⁷ Rifu rifumile hi mhaka ya nandzu wa munhu mun'we ntsena; hi ndlela yoleyo, lava vayamukelaka ntalu wa timpsalu ni nkateko wa kuyendliwa lavalulameke, vatatlulisa ngopfungopfu hi kufuma vuton'wini, hi mhaka ya munhu mun'we anga Yesu Kriste. ¹⁸ Kutani-ke, kufana ni lesvi nandzu wun'we wudlayiseke vanhu hinkwavu lesvaku vabiwa, na wona ntirho wun'we wolulama wuyendla lesvaku vanhu hinkwavu vatshunxiwa, vakuma vutomi. ¹⁹ Nasvona, kufana ni lesvi lavanyingi vahundzuliweke vajohi hikolaho ka munhu mun'we lweyi akalaka angayingisanga, hi mukhuva wolowo, hi kuyingisa ka munhu mun'we, vanhu lavanyingi vatahundzuliwa vava lavalulameke. ²⁰ Nawu wunghenile lesvaku vubihi bziyandza; kambe laha kujoha kutaleke kona, ntalu wa timpsalu wuvile kona hi kutlulisa; ²¹ asvili lesvaku, kukotisa lesvi kujoha kufumeke hi rifu, timpsalu na tona titafumisa xisvosvo hi kululama loku kuyisaka vuton'wini lebzingaheliki, ha Yesu Kriste Hosi ya hina.