¹ Loko svilitano, i ncini lexi Muyuda atlulaka van'wana hi xona, kumbe kuyimba kupfuna yini ke? ² Kapfuna ngopfu, hi matlhelo hinkwawu. Mhaka yosungula hi lesvaku Xikwembu xivekile svitshembiso sva xona mavokweni ya Vayuda ³ Xana hitahlaya yini, loko van'wana va vona vangatshembekanga ke? Xana kutshembeka ka Xikwembu kungahelisiwa hi mhaka ya kukala vangatshembekanga ke? ⁴ Nikutsongo! Xikwembu xifanele kutiviwa xili xa ntiyiso, ni loko munhu mun'wana ni mun'wana ali muhembi. Hi svona lesvingatsaliwa, loko vaku: “Hilaha ungatava lweyi alulameke, loko uvulavula, ni kukumiwa na ungali na nandzu, loko uthethisiwa.” ⁵ Kambe, xana hitakuyini loko kuhomboloka ka hina kuyendla lesvaku kululama ka Xikwembu kukombisiwa rivaleni ke? Xana hitahlaya lesvaku Xikwembu xihombolokile loko xihiba kuhlundzukeni ka xona ke? (Nivulavula hi mukhuva wa vanhu.) ⁶ Nikutsongo! Hikuva loko Xikwembu axihombolokile, axitathethisisa kuyini misava xana? ⁷ Kambe, loko kuhemba ka mina kukombisisa svinene lesvaku Xikwembu xi ni ntiyiso, kutwalisa ni kukwetsima ka xona, hikolaho ka yini nahaya mahlweni nithethisiwa tani hi mujohi ke? ⁸ Nasvona hikolaho ka yini hingayendli lesvobiha, lesvaku kutahumelela lesvosaseka xana? Van'wana vahilumbeta hi mukhuva lowu, vaku hi lesvi hina hihlayaka svona. Kuthethisiwa ka vanhu lavotano, kavafanela! ⁹ Ihim, loko svilitano, hingahlaya yini ke? Xana hina Vayuda hilulamile kutlula van'wana ke? Ihim, nikutsongo. Hahakukomba nandzu wa Vayuda ni wa vamatiko, ni lesvaku hinkwavu vafumiwa hi kujoha. ¹⁰ Matsalwa matiyisa svosvo, maku: ¹¹ “Aku na munhu ni mun'we lweyi alulameke, aku na lweyi atwisisaka, aku na lweyi alavaka Xikwembu. ¹² Hinkwavu vatshikile ndlela, vahundzukile lavangapfuniki nchumu, hinkwavu vafana; aku na lweyi ayendlaka lesvinene, ni mun'we anga kona. ¹³ Minkolo ya vona i masirha lawa mapfuliweke, hi tindzimi ta vona vatolovele kukanganyisa, mahlungu ya tinyoka ma le milon'weni ya vona, ¹⁴ milomo ya vona yitele kurhuka ni kubava; ¹⁵ milenge ya vona yi ni xihantla xa kuyahalata ngati, ¹⁶ tindleleni ta vona ku ni kulahleka ni makhombo, ¹⁷ kutani ndlela ya kurhula avayitivanga. ¹⁸ Ka vona, kuchava Xikwembu asvikona!” ¹⁹ Hasvitiva lesvaku hinkwasvu lesvi Nawu wuhlayaka svona svikongoma lava vativaka Nawu, lesvaku vanhu hinkwavu vapfaliwa milomo, ni lesvaku misava hinkwayu yiyisiwa kuthethisiweni mahlweni ka Xikwembu. ²⁰ Hikuva aku na munhu ni mun'we lweyi angatahlayiwa lweyi alulameke mahlweni ka xona hi mhaka ya lesvi angayendla hi kulerisa ka Nawu; ntiyiso wakona hi lesvaku Nawu wukomba laha kujoha kunga kona ²¹ Kambe svosvi ndlela leyi Xikwembu xiyendlaka ha yona lesvaku vanhu vava lavalulameke, yipfuleteliwile, na yingali yotshemba sva Nawu; vumboni bza wona bzi kona matsalweni ya Nawu ni Vaprofeta: ²² Hi lesvaku Xikwembu xiyendla vanhu vava lavolulama hi kupfumela ka vona ka Yesu Kriste; xiyendla lesvi ka hinkwavu lavapfumelaka, hikuva aku na kuhambana: ²³ Vanhu hinkwavu vajohile, hi kolaho kukwetsima loku avanyikiwile hi Xikwembu, vakupfumala. ²⁴ Kambe vahlayiwa lavalulameke hi timpsalu ta Xikwembu, hi kunyikiwa, ha Yesu Kriste lweyi avaponiseke ²⁵ Xikwembu ximuvekile lesvaku hi kufa ka yena, vanhu va rivaleliwa svijoho, loko vapfumela ka yena; xiyendlele kukomba hilaha xiyendlaka vanhu vava lavalulameke hakona, hikuva axirivalele vanhu kujoha ka vona ka khale, minkameni ya kutsetselela ka xona; ²⁶ asvili lesvaku xikomba kululama ka xona minkameni ya svosvi, xiva Xikwembu lexilulameke, xikan'we ni kuva Xikwembu lexiyendlaka munhu kuva lweyi alulameke loko apfumela ka Yesu. ²⁷ Loko svilitano, kutikulisa kungava kwihi ke? Kudlayiwile! Hi mhaka yihi ke? Hi mhaka ya mintirho leyiyendliweke xana? Ihim! Kudlayiwile hi mhaka ya kupfumela. ²⁸ Hikuva hivonile lesvaku munhu ahlayiwa lweyi alulameke hi kupfumela, kungali hi kuyendla lesvitsemiweke hi Nawu. ²⁹ Xana Xikwembu i xa Vayuda ntsena ke? Xana vamatiko vona, ahi xa vona ke? Ina, na vona vamatiko i xa vona, ³⁰ lesvi kunene Xikwembu xinga xin'we; xitayendla va kuyimba vava lavalulameke hi mhaka ya kupfumela, na vona lavokala vangayimbanga hi mhaka leyi ya kupfumela. ³¹ Loko svilitano, xana hidlaya Nawu hi mhaka ya kupfumela ke? Nikutsongo! Kambe hitiyisa Nawu.