¹ Loko svilitano, wena munhu lweyi athethisaka van'wana, awu na kutitsetselela, hambi ungava mani na mani, hikuva loko uli karhi uyavanyisa van'wana, na wena watiyavanyisa, hikuva wena muthethisi wa van'wana, uyendla lesvi vona vasviyendlaka. ² Hasvitiva lesvaku Xikwembu axihoxi loko xithethisa lavayendlaka lesvotano. ³ Wena munhu lweyi athethisaka lavayendlaka lesvotano, wasviyendla na wena! Xana upimisa lesvaku utapona kuthethiseni ka Xikwembu ke? ⁴ Kumbe, xana usola vunene lebzikulu bza xona, ni bza kutsetselela ka xona, ni bza mbilu ya xona yoleha ngopfu, ungativi lesvaku vunene bza Xikwembu bzikukokela kuhundzukeni, ke? ⁵ Hi mbilu ya wena leyi ya kunonon'hwa, leyingalaviki kuhundzuka, utiyengetelela vukarhi lebzingatakuwela hi siku lerochavisa, leri kuthethisa loku kululameke ka Xikwembu kungatahumelela ha rona. ⁶ Hikuva xona xitlhelisela mun'wana ni mun'wana hi kuya hi mintirho ya yena: ⁷ Lava vatiyiselaka kuyendla lesvinene, na vali karhi vanavela kuva lavakwetsimaka ni lavadzunekaka ni lava vangahafiki, Xikwembu xitavanyika vutomi lebzingaheliki; ⁸ kambe lavanga ni moya wa kutirhandza, vayalaka ntiyiso, vafambaka hi kuhomboloka, xitavahlundzukela ni kuvakarihela. ⁹ Kuxaniseka ni vusiwana svitawela vanhu hinkwavu lavayendlaka lesvobiha, kusungula hi Vayuda, kuyafika ni ka vamatiko ¹⁰ kambe kukwetsima, ni kudzuneka, ni kurhula, kutanyikiwa hinkwavu lavayendlaka lesvinene, kusungula hi Vayuda, kuyafika ni ka vamatiko; ¹¹ hikuva Xikwembu axi na xihlawuhlawu. ¹² Hinkwavu lavajoheke na vangativi Nawu, vatahelisa xisvosvo, na vangali na Nawu; kambe hinkwavu lavajoheke na vativa Nawu, vatathethisiwa mayelanu ni Nawu. ¹³ Hikuva ahi vatwi va Nawu lavavoniwaka na vali lavalulameke mahlweni ka Xikwembu, kambe lavafambaka hi kulandza wona, hivona lavangatahlayiwa lesvaku valulamile. ¹⁴ Loko vamatiko lavangaliki na Nawu, vayendla mayelanu ni kutumbuluka ka vona lesvi Nawu wuleletaka svona, vativekela nawu hi voxe, hambi loko vangali na Nawu. ¹⁵ Vakombisa lesvaku lesvi Nawu wuleletaka svona, svitsaliwile timbilwini ta vona; ripfalu ra vona ritiyisa svosvo, hambi yili miyanakanyu ya vona, loko yiphikizana, yivaveka nandzu kumbe yiyima na vona; ¹⁶ svitava tano hi siku leri Xikwembu xingatathethisa svihundla sva vanhu ha Yesu Kriste, hilaha Evhangeli leyi niyijondzisaka yihlayaka hakona. ¹⁷ Wena lweyi utivulaka Muyuda, wena utshembeke Nawu, utitlakusaka hi Xikwembu, ¹⁸ wena utivaka kurhandza ka xona, utivaka kulavisisa timhaka letitlulaka tin'wana hi vunene, hi lesvi ujondzisiweke hi Nawu, ¹⁹ wena ukholwaka lesvaku umufambisi wa lava vafeke mahlo ni kuvonakala ka lava vanga munyameni, ²⁰ wena ukholwaka lesvaku umuleleti wa lava vangativiki nchumu, ni mujondzisi wa svihlangi, hi lesvi unga ni jondzo ya xiviri, ya vutivi ni ya ntiyiso, Nawini, ²¹ wena lweyi ujondzisaka van'wana, awutijondzisi ke? Wena lweyi uhlayaka lesvaku kungatshuki kuyiviwa, awuyivi ke? ²² Wena lweyi unge: “Kungatshuki kuwosviwa”, awuwosvi xana ke? Wena lweyi unyenyaka svikwembu sva hava, awuyivi sva le titempeleni ke? ²³ Wena lweyi utitlakusaka hikolaho ka Nawu, xana awusolisi Xikwembu loko utlula Nawu wolowo ke? ²⁴ vito ra Xikwembu risoliwa xikarhi ka vamatiko hinkwavu hikolaho ka n'wina, hilaha Matsalwa mahlayaka hakona ²⁵ Svatwala lesvaku kuyimba kapfuna, loko uhlayisa Nawu; kambe loko utlula Nawu, kuyimba ka wena kutofana ni loko ungayimbanga. ²⁶ Kambe loko munhu lweyi angayimbangiki ahlayisa svileriso sva Nawu, atahlayiwa lweyi ayimbeke, hambi loko angayimbanga. ²⁷ Kutani loko munhu lweyi angayimbangiki afamba hi Nawu, atakuthethisa wena lweyi utlulaka Nawu, hambi loko uli ni lesvitsaliweke sva Nawu, kumbe hambi uyimbile ²⁸ Kuva Muyuda wa xiviri, asvitikombi hi le handle ntsena; ni kuyimba ka xiviri, akuvonaki handle, mirini. ²⁹ Kambe Muyuda wa xiviri, hi lweyi anga yena xihundleni xa mbilu, ni kuyimba ka xiviri, i kuyimba ka mbilu, loku kuyendliwaka moyeni, kungali hi lesvitsaliweke sva Nawu; kudzunisiwa ka munhu lweyi akuhumi ka vanhu, kambe kuhuma ka Xikwembu.