¹ Kutsala mina Pawulo, mutirhi wa Kriste Yesu, mupostola lweyi angahlawuliwa ni kuvitaneliwa Evhangeli ya Xikwembu. ² Evhangeli leyi, hi yona leyi Xikwembu xiyitshembiseke khale, hi vaprofeta va xona, Matsalweni layohlawuleka; ³ yivulavula hi N'wana wa xona, Hosi ya hina Yesu Kriste, lweyi angahuma rixakeni ra Davhida hi tlhelo ra kuva munhu wa nyama ⁴ kambe, hi tlhelo ra moya wa yena lowukwetsimaka, svitikombile lesvaku i N'wana wa Xikwembu lweyi anga ni matimba hinkwawu, hi kupfuka ka yena xikarhi ka vafi. ⁵ Ha yena, hinyikiwile nkateko wa kuva vapostola vitweni ra yena, lesvaku vanhu va matiko hinkwawu vapfumela, vatlhela vayingisa; ⁶ na n'wina mapatsiwa ka svona, n'wina mingavitaniwa kuva va ka Yesu Kriste. ⁷ Namixeweta, n'wina hinkwenu lava minga Roma, lavarhandziwaka hi Xikwembu, lavavitaniweke kuva vahlawuliwa va xona, nili: Timpsalu ni kurhula asvive na n'wina, svihuma ka Xikwembu Tatana wa hina, ni ka Hosi Yesu Kriste ⁸ Xa kusungula, nikhensa Xikwembu xa mina ha Yesu Kriste hikolaho ka n'wina hinkwenu, hikuva kupfumela ka n'wina kutwakalile misaveni hinkwayu. ⁹ Xikwembu lexi nixitirhelaka moyeni wa mina hi kuvula Evhangeli ya N'wana wa xona, i mboni ya mina: Animirivali, ¹⁰ namikhongelela masiku hinkwawu, na nili karhi nikombela lesvaku, loko kuli kurhandza ka Xikwembu, ni kateka riyendzweni ra mina, nikondza nifika ni le ka n'wina svosvi; ¹¹ hikuva ninavela ngopfu kumivona lesvaku nihlengela na n'wina ka nyiko yin'wana ya Moya, mitatiyisiwa hi yona; ¹² kumbe ningaku: Ninavela lesvaku hitiyisana loko nili koseyo ka n'wina, hi kupfumela loku mina na n'wina hinga nako ¹³ Nilava lesvaku mitiva mhaka leyi, vamakwerhu: Minkama leyinyingi, nibohile makungu ya kuta ka n'wina, kutaringeta kuhundzula vanhu vangali vangani va ka n'wina lesvaku vapfumela, kukotisa lesvi nisviyendleke matikweni man'wana; kambe kufika svosvi nisiveliwile hi svin'wana. ¹⁴ Nibohekile kutirhela Vagirika ni lavangaliki Vagirika, lavojondza ni lavokala vangajondzanga. ¹⁵ Hikolaho nihisekelaka kuvula Evhangeli ni le ka n'wina lava minga seyo Roma. ¹⁶ hi lesvaku a ni na tingana hi Evhangeli, hikuva i matimba ya Xikwembu yoponisa hinkwavu lavapfumelaka, kusukela ka Vayuda, kuyafika ka vamatiko. ¹⁷ Ka yona kuhlavuteliwa hilaha vanhu vayendliwaka lavalulameke hi Xikwembu hakona; lesvi svikumiwa ntsena hi kupfumela, nkama hinkwawu, hilaha Matsalwa mahlayaka hakona maku: “Lweyi ayendliwaka lweyi alulameke hi kupfumela, atahanya.” ¹⁸ Svosvi-ke, vukarhi bza Xikwembu bzitavonaka bzihuma hi le tilweni, bziwela henhla ka vubihi ni vuhomboloki hinkwabzu bza vanhu lavasivelaka van'wana kutiva ntiyiso, hikolaho ka kuhomboloka ka vona. ¹⁹ Hikuva lesvi svingativiwaka sva Xikwembu svi le rivaleni ka vona: Xikwembu hi xoxe, xivakombisile svona. ²⁰ Hikuva kusukela loko misava yitumbuluka, lesvingavonakiki sva Xikwembu, manga matimba ya xona lawa mangaheliki ni vukwembu bza xona, svavoneka svinene loko kutsundzukiwa mintirho ya xona; hi kolaho, vapfumala xotilandzula ha xona. ²¹ Hambi loko vativile Xikwembu, avaxidzunisanga vaku i Xikwembu, avaxikhensanga; kambe vapimisile lesvokala svingapfuni nchumu, ni timbilu ta vona letingaliki na kutwisisa tibihisiwile ²² Vali vatlharihile, kuve vahundzuke sviphukuphuku; ²³ kutani vatshikile kukwetsima ka Xikwembu lexingafiki, vatiyendlela svifaniso lesvinga ni xivumbeko xa munhu lweyi afaka, ni xa tinyanyana, ni xa sviharhi, ni xa tinyoka. ²⁴ Hikolaho-ke Xikwembu xivanyiketile chakeni ra kunavela ka timbilu ta vona, kukondza vayendlana svilo sva tingana mirini wa vona. ²⁵ Vatshikile ntiyiso wa Xikwembu, valandza mavunhwa, vagandzela ni kutirhela lesvivumbiweke, matshan'wini ya Muvumbi lweyi afanelaka kudzunisiwa hi masiku ni masiku. Amen! ²⁶ Hikolaho ka svona, Xikwembu xivanyiketile kunaveleni lokukhomisaka tingana; vavasati va vona vatshikile svihena sva vona sva ntumbuluku, hi lesvaku vavanuna vafambelana masangu ni vavanunakulobze; ²⁷ hi mukhuva wolowo, na vona vavanuna, vatshikile kuhanya ni vasati va vona hi nawu wa ntumbuluku, kutani vahanyela kunavelana hi xivona, hi lesvaku vavanuna vafambelana masangu ni vavanunakulobze, kutani vativangela kubiwa loku kuringanaka vuhunguki bza vona. ²⁸ Kutani lesvi vanhu lava vangayala kutiva nchumu hi tlhelo ra Xikwembu, Xikwembu xivanyiketile kupimiseni lokungalavekiki, vakondza vayendla ni lesvingafaneliki. ²⁹ Vatele kuhomboloka hinkwaku, ni lesvobiha, ni kuphanga, ni mona; vatele mavondzo, ni kudlaya, ni kuphikizana, ni kukanganyisa, ni kuxengana; i vahlevi ³⁰ ni valumbeti; i vavengi va Xikwembu, va mona lavatitivaka ni lavatidzunisaka; i vanhu lavasungulaka tindlela letobiha letimpsha, lavangayingisiki vapsali va vona; ³¹ ava na ripfalu, ava na nomo lowutshembekeke, ava na vunene, ava na timpsalu; ³² vanhu lava, hambi loko vativa kulerisa ka Xikwembu lesvaku lavayendlaka lesvotano valulameliwa hi rifu, avayimi ka svosvo ntsena, kambe vayengetela hi kuseketela lava vasviyendlaka.