¹ Vana, purutanai vabari venyu munaMambo, ngokuti izvi zvakarurama. ² Remedzai baba, ako namai ako, (uyu uri mupango wokutanga une chingondiso.;) ³ Kuti zvinake kwouri, nokuti upone mukuwo wakareba munyika. ⁴ Nemwi madzibaba, musatsamise vana venyu, asi muvarere mukudzidza nomukupanga kwaMambo. ⁵ Hloko, purutanai avo vari madzimambo enyu ngokwenyama, ngokutva nokuhuta, ngomwoyo wakarurama, kudai ngevanoitira Kristo; ⁶ musikachadi ngokuoneka ngemadziso, kudai ngevanodekedza vanhu, asi kudai ngehloko dzaKristo, mechita kuda kwaMwari mumwoyo; ⁷ Mechishada ngokunda kudai ngevanoitira Mambo haiwa kuvanhu. ⁸ Mwechizia kuti kunyazwi chinyi chakanaka chaanoita munhu, unozochipuwa kubva kunaMambo, kunyazwi hloko, nokuti wakasunhurika. ⁹ Nemwiwo madzimambo, itai zvakadaro kwavari, murekere kuvatyisidzisa, mwechizia kuti Mambo wavo nowenyuwo uri mudenga, kwaari akuna mutsanaguro wevanhu. ¹⁰ Pakungumisira, itai vakagwinya munaMambo nomukugwinya kwesimba rake. ¹¹ Pfekai nhumbi deshe dzokurwa ndizvo dzaMwari, kuti mukone kuema kurwasana nemazano akashata aDhiabhorosi. ¹² Ngokuti atidzipani nenyama nengazi, asi tinodzipana noumambo nevane simba nevanotonga nyika yechidima chino nomweya yakachata yomundau dzomudenga. ¹³ Ndizvo torai nhumbi dzese dzokurwa ndizvo dzaMwari, kuti mukone kurwisa pazuva rakashata nokuramba mwakaema apo mwapedza zvese. ¹⁴ Ndizvo, emai, mwakasimira gwinyiso muzviunu zvenyu, mwaisa chilangu chepaditi chokururama; ¹⁵ Mwapfeka mutsoka dzenyu kunasirirwa kwevhangeri rokunyarara. ¹⁶ Muneizvi zvese torai cihlangu chokungonda, chomuzokona kudzima ndicho misee yeshe yemirazvu yomuriro youwo wakachata. ¹⁷ Ashirai chiqoko choruponeso neshoti yoMweya iri izwi raMwari; ¹⁸ Mukumbire nguva dzese muMweya, nokukumbira kweshe nokupota. Muneizvi mumipinimidzo ngwarai nekungerera kwese nokukumbira vakacherswa vese, ¹⁹ Neniwo mundikumbirirevo, kuti ndipuve izwi rokuereketa ngokushinga, kuti ndiduzire zvakafishika zvevhangeri, ²⁰ Ngendaa yaro inini ndiri muemerei wakasungwa ngemaketani; kudai ngezvinosisira kuti ndierekete. ²¹ Zvino kuti muziewo magarire angu nezvinoita, Tiquio, munuuna unondikawa nenhunge inogondeka munaMambo, unozomuronzera zviro zvese. ²² Ndamutumira kwomuri ngendaa iyi, kuti mazie kugara kwedu nokuti agwinyise mwoyo yenyu. ²³ Kunyarara ngakungare nevakoma, rudo pamwepo nokungonda, zvinobva kuna Baba naMambo Jesu Kristo. ²⁴ Nyasha ngadzingare kwavari vese vanomuda Mambo wedu Jesu Kristo ngorudo rusikaperi.