¹ Twanani ke, n'wina lavafuweke: Mifanela kurila mikolola hikolaho ka mahlomulu lawa mangatamihumelela. ² Rifuwo ra n'wina ribolile, ni sviyambalu sva n'wina svijiwile hi tinsumba. ³ Golidi ni silivhere ya n'wina svikurhile, kutani kukurha ka svona kutaveka vumboni lebzingatalwa na n'wina, nikuja nyama ya n'wina kufana ni ndzilo. Mihlengeletile rifuwo nkarhini lowu masiku ya makumu mafikeke. ⁴ Vonani! Ahakelo ya vatirhi lavatshoveleke masin'wini ya n'wina, leyi mingavakanganyisa, yahuwelela; nasvona svirilo sva vatshoveli svifikile tindleveni ta Hosi ya matimba hinkwawu. ⁵ Misaveni, mihanyile vutomi bzotsakisa na mili karhi mitiphina; kambe minonisile ntsena timbilu ta n'wina, milungisela siku ra kudlayiwa ka n'wina. ⁶ Miyavanyisile ni kudlaya munhu lweyi wolulama, kambe yena angatilwelanga. ⁷ Loko svilitano, vamakwerhu, lehisani timbilu, Hosi yikondza yita. Vonani, murimi arindzela mihandzu leyinene ya misava, ayilehisela mbilu yikondza yikuma mpfula yosungula ni leyi yohetelela. ⁸ Na n'wina, lehisani mbilu mitiyisela, hikuva kuta ka Hosi ku kusuhi ⁹ Vamakwerhu, mingamangalelaneni, lesvaku mitakala mingayavanyisiwi. Vonani, muyavanyisi ayimile nyangweni. ¹⁰ Loko milava xikombiso xa kulehisa mbilu maxangwini, vamakwerhu, landzani svikombiso sva vaprofeta lavavulavuleke hi vito ra Hosi. ¹¹ Langutani, lava hivulaka lesvaku vakatekile, hi lava vatiyiseleke. Mitwile ta kutiyisela ka Yobe, nasvona mivonile lesvi Hosi ayikongomile svona, ni hilaha Hosi yitaleke musa ni timpsalu hakona. ¹² Kambe, henhla ka svona hinkwasvu, vamakwerhu, mingahlambanyeni hi tilo, hambi hi misava, kumbe hi mahlambanyela man'wana ni man'wana. Kambe loko miku: “Ina”, aave “Ina” ni loko miku: “Ahihim”, aave “Ahihim”, lesvaku mingaweli kuyavanyisiweni ¹³ Xana ku ni mun'we ka n'wina lweyi axanisekaka? Aakhongele. Xana ku ni lweyi atsakeke? Aayimbelele tinsimu ta kudzunisa. ¹⁴ Xana ku ni lweyi avabzaka xikarhi ka n'wina? Aavitane vakulukumba va kereke lesvaku vatamukhongelela, vamutota mafurha hi vito ra Hosi; ¹⁵ kutani xikhongelo lexiyendliwaka hi kupfumela xitahanyisa muvabzi; Hosi yitamupfuxa, kutani loko ali ni svijoho lesvi asviyendleke, atarivaleliwa svona. ¹⁶ Hikolaho, tivuleni kujoha ka n'wina mun'we ka mun'wana, mikhongelelana mun'we ka mun'wana lesvaku mitahanya. Xikhongelo xa munhu wolulama xi ni matimba ngopfu, xatirha. ¹⁷ Eliya aali munhu kufana na hina, aali ni kutwa kofana, kambe akhongelile hi kuhiseka lesvaku mpfula yingani, kutani hi malembe manharhu ni tihweti ta ntlhanu ni yin'we, mpfula ayinanga misaveni. ¹⁸ Ndzhaku atlhela akhongela kambe, kutani tilo rinisa mpfula, ni misava yihumesa mihandzu ya yona. ¹⁹ Vamakwerhu, loko mun'we ka n'wina ahuma ntiyisweni, kutani mun'wana amuvuyisela ndleleni leyinene, ²⁰ tsundzukani lesvi: Mani na mani lweyi avuyiselaka ndleleni mujohi lweyi aalahlekile, ataponisa moya wa munhu lweyo kufeni, kutani atafunengeta svijoho lesvotala.