¹ Vamakwerhu, loko mun'wana akumiwa na ali karhi ayendla xihoxo, n'wina lava minga va Moya, muvuyiseni hi moya wa musa. Ka mun'wana ni mun'wana wa n'wina, nili, tivonele lesvaku na wena ungaringiwi. ² Rhwalelanani mindzhwalu, kutani, hi kuyendlisa svosvo, mitava mihetisa Nawu wa Kriste. ³ Hikuva loko mun'wana ayanakanya lesvaku yena xanchumu, kasi ahi nchumu, watikanganyisa. ⁴ Mun'wana ni mun'wana aakambisise ntirho wa yena, kuli kona angakotaka kutidzunisa hi sva yena, kungali hi sva mun'wana; ⁵ hikuva mun'wana ni mun'wana atarhwala ndzhwalu wa yena. ⁶ Lweyi ajondzisiwaka Rito, aapambulele mujondzisi wa yena svilo svosaseka hinkwasvu lesvi anga na svona. ⁷ Mingatshukeni mitixisa: Xikwembu axivungunyiwi; xin'wana ni xin'wana lexi munhu axibzalaka, atatshovela xona; ⁸ lweyi abzalaka sva kutsakisa ntumbulukwini wa yena wa nyama, atatshovela sva kubola lesvihumaka ka ntumbuluku wa yena wolowo; kambe lweyi abzalaka svakutsakisa Moya, atatshovela lesvihumaka ka Moya, bzinga vutomi lebzingaheliki. ⁹ Loko hili karhi hiyendla lesvinene, hingakarhaleni, hikuva hitatshovela hi nkama wakona, loko hingaheli mbilu. ¹⁰ Hikolaho, minkama hinkwayu loko svikoteka, ahiyendleleni vanhu hinkwavu lesvinene, ngopfungopfu va njangu wa lavapfumeleke. ¹¹ Vonani maletera makulu lawa ni mitsalelaka hi wona! Kutsala mina hi nexe, hi voko ra mina. ¹² Hinkwavu lavaringetaka kutikomba vali lavanene ni kutidzunisa hi svilo sva laha misaveni, hi vona lava vamisindzisaka kuyimba; vayendlela ntsena lesvaku vatakala vangaxanisiwi hikolaho ka xihambanu xa Kriste; ¹³ hikuva hambi valilava vasindzisaka sva kuyimba, avahlayisi Nawu, kambe vanavela ntsena lesvaku miyimba, vatakota kutidzunisa hi kuvula lesvaku mi ni mfungu wakona mirini wa n'wina. ¹⁴ Loko ali mina, asvive kule na mina kutidzunisa, loko kungali hi xihambanu xa Hosi ya hina Yesu Kriste, hikuva hikolaho ka xihambanu xa yena, sva misava ka mina svivambiwile svifa, na mina nifile hi tlhelo ra sva misava. ¹⁵ Hikuva, hambi munhu ayimbile kumbe angayimbanga, asvihlayi nchumu. Mhaka leyikulu i kuva xivumbiwa leximpsha. ¹⁶ Kurhula ni kutsetseleliwa asvive henhla ka hinkwavu lavafambaka hi nawu lowu, ni ka vanhu hinkwavu va Xikwembu. ¹⁷ Kusukela svosvi, aningahakarhatiwi hi munhu hikuva svivati lesvi ninga na svona mirini, i mfungu wa lesvaku ni xikarawa xa Yesu. ¹⁸ Timpsalu ta Hosi ya hina Yesu Kriste ative ni mimoya ya n'wina vamakwerhu. Amen!