¹ Mina Pawulo ninga mupostola, kungali hi kuhlawuliwa hi vanhu kumbe kurhumiwa hi munhu, kambe hi kurhumiwa hi Yesu Kriste ni Xikwembu Tatana lweyi amupfuxeke xikarhi ka vafi, ² nitsala na nili ni vamakwerhu hinkwavu lavanga na mina halenu, hitsalela tikereke ta Galatiya, hili: ³ yena lweyi atinyiketeke hikolaho ka svijoho sva hina, lesvaku atahiponisa ka nguva leyobiha ya masiku lawa. ⁴ Ayendle svosvo hi kuyingisa kurhandza ka Xikwembu Tatana wa hina; ⁵ Ka xona akuve kudzuneka hilaha kungaheliki! Amen. ⁶ Manihlamalisa: Hi nkamanyana wutsongo, mifularhele lweyi amivitaneke hi timpsalu ta Kriste, kutani mitsutsumela ka evhangeli yin'wana. ⁷ Kasi Evhangeli yin'wana ayikona. Nihlaya lesvi hikuva ku ni van'wana lava vamipfilunganyisaka tinhloko, lavaringetaka kujikisa Evhangeli ya Kriste. ⁸ Kambe hambi loko hina kumbe ntsumi yohuma tilweni, hingatshuka himijondzisa Evhangeli yin'wana handle ka leyi hitshamaka himijondzisa yona, mujondzisi wotanu aarhukiwe! ⁹ Kufana ni lesvi hitshamaka himibzela, ni svosvi nitlhela nakambe niku: Loko mun'wana amijondzisa Evhangeli yin'wana handle ka leyi miyiyamukeleke, aarhukiwe! ¹⁰ Xana svosvi svikomba lesvaku ninavela kukhensiwa hi vanhu kumbe hi Xikwembu ke? Xana ni vonaka na nili lweyi aringetaka kutsakisa vanhu ke? Loko onge naharingeta kuyendla svosvo, aningatava mutirhi wa Kriste. ¹¹ Namitsundzuxa, vamakwerhu, lesvaku Evhangeli leyi nimijondziseke yona, ayihumanga ka vanhu. ¹² Aniyikumanga ka munhu ni mun'we, anga kona ni mun'we lweyi anijondziseke yona. Yesu Kriste hi xiviri xa yena, hi yena lweyi angayihlavutela ka mina. ¹³ Mitwile lesvi anihanyisa svona khale, loko na ha hanya Xiyuda. Mitiva hilaha ningaxanisa ni kuhelisa kereke ya Xikwembu hakona, ningatsetseleli munhu. ¹⁴ Hikuhanya Xiyuda, anitlula lavotala vatintanga ta mina xikarhi ka va ka hina, nili karhi nihisekela ngopfu mikhuva ya vatatana va hina. ¹⁵ Kambe Xikwembu lexi xinihlawuleke na ningasi velekiwa, xinivitanile hi timpsalu ta xona; ¹⁶ xisvitsakelile kuhlavutela N'wana wa xona ka mina, lesvaku nitamutwalisa ndzeni ka vamatiko. Nkameni wolowo, anivutisanga munhu, ¹⁷ na svona, anitlhantukelanga Yerusalema ka lava vanganirhangela kuva vapostola, kambe niyile xikan'we le Arabiya, ndzhaku nivuyela Damaska. ¹⁸ Kutani, ndzhaku ka malembe manharhu, hi kona ni tlhantukeleke Yerusalema kuyavonana na Petrosi, kutani nixwe na yena masiku ya khume na ntlhanu. ¹⁹ Kambe anivonananga na mun'we wa vapostola lavan'wana, handle ka Yakobe makwavu wa Hosi. ²⁰ Timhaka leti nimitsalelaka tona titiyile, nihlaya svosvo mahlweni ka Xikwembu, anihembi. ²¹ Ndzhaku ka svona niyile matlhelweni ya Siriya na Kilikiya. ²² Kambe nkameni wolowo, tikereke ta Kriste letinga Yudeya, atingasinivona hi mahlo; ²³ ntsena atitwile van'wana loko vaku: “Munhu lweyi khale aahixanisa ni kuringeta kuhelisa ta kupfumela, svosvi ajondzisa tona.” ²⁴ Kutani atidzunisa Xikwembu hikolaho ka mina.