¹ Ndzhaku ka malembe ya khume ni mune, nitlhele ni tlhantukela Yerusalema na nili na Barnaba, kutani niteka na Tito. ² Nitlhantukele kona hi kuhlavuteliwa hi Xikwembu. Nivonanile ni vafambisi vakona hi tlhelo, kutani nivahlayela Evhangeli leyi niyitwaliseke ndzeni ka vamatiko. Aningalavi lesvaku lesvi nisvitirheke, ni lesvi nisvitirhaka svosvi, svihundzuka ntirho wa mahala. ³ Na Tito lweyi anili na yena, hambilesvi anga Mugriki, angasindzisiwanga kuyimba. ⁴ Mhaka yipfuxiwile hikolaho ka vanhu van'wana lavatiyendlaka vakriste, vangalava ngheneke xikarhi ka hina hi kukanganyisa, valava kuvona kutshunxeka loku hinga nakona ka Yesu Kriste; avalava kuhiyendla svikarawa; ⁵ ahipfumelanga ni siku ni rin'we kutiveka hansi ka vona, kambe hilavile lesvaku ntiyiso wa Evhangeli wuhlayiseliwa n'wina svinene. ⁶ Kambe lava avavoneka onge hi vona vafambisi kumbe avali vona, kumbe avangali vona, ka mina ahi mhaka, Xikwembu axiyi hi nghohe, nili: Vafambisi vakona avayengetelanga nchumu ka mina. ⁷ Matshan'wini ya svosvo, vasvivonile lesvaku ni rhwexiwile ntirho wojondzisa Evhangeli ka lavangayimbangiki, tani hi Petrosi ka lavayimbeke. ⁸ Hikuva Xikwembu lexinyikeke Petrosi matimba ya kuva mupostola ka lavayimbeke, na mina xininyikile matimba ya kuva mupostola ka vamatiko. ⁹ Hikolaho, Yakobe, na Petrosi, na Yohani, lavalangutiwaka vali vona vafambisi va kereke, vawuvonile nkateko lowu Xikwembu xininyikeke wona, kutani vahikhome hi xiyandla, mina na Barnaba, kufunga kutirhisana ka vona na hina: Hina hitaya ka vamatiko, vona vaya ka lavayimbeke. ¹⁰ Ntsena vahikhongotele lesvaku hiyanakanya svisiwana, kutani hi svolesvi na mina anihisekela kuyendla svona. ¹¹ Kambe loko Petrosi atile le Antiyoka, nimukongomile, nimulaya hikuva aahoxile. ¹² Hikuva loko kungasifika van'wana lavarhumiweke hi Yakobe, aaja ni vamatiko; kambe loko varhumiwa lava vafika, asuka, ayatshama tlhelweni, hi kuchava kuvoniwa hi ntlawa wa lavayimbeke. ¹³ Vayuda van'wana lava avali kona, na vona vatluleliwile hi vukanganyisi bza Petrosi, Barnaba akondza akokiwa na yena hi kukanganyisa koloko. ¹⁴ Kambe loko nivonile lesvaku lesvi avasviyendla asvingafambelani ni ntiyiso wa Evhangeli, nibzelile Petrosi mahlweni ka vona hinkwavu, niku: “U Muyuda wena hi kuvelekiwa, kambe uhanya hi mukhuva wa vamatiko, kungali wa Vayuda; hikolaho ka yini usindzisa vamatiko kuhanya hi mukhuva wa Vayuda ke?” ¹⁵ Hina hi Vayuda hi kuvelekiwa, ahi vamatiko vanga “vajohi”. ¹⁶ Hambi svilitano, hitiva lesvaku munhu angayendliwi lweyi alulameke mahlweni ka Xikwembu hi kuhlayisa Nawu, kambe kuli ntsena hi kupfumela ka Yesu Kriste; kutani hina hipfumelile ka Yesu Kriste, lesvaku hiyendliwa lavalulameke hi kupfumela ka yena, kungali hi kuhlayisa Nawu; hikuva kutsaliwile lesvi: “Aku na munhu ni mun'we lweyi angatayendliwa lweyi alulameke hi kuhlayisa Nawu.” ¹⁷ Kambe, hi kuringeta ka hina kuyendliwa lavalulameke ka Kriste, hikumiwa na hili “vajohi” na hina, xana svihlaya lesvaku Kriste aseketela kujoha ke? Nikutsongo! ¹⁸ Loko nitlhela nipfuxa mikhuva leyi aniyihahlulelile, hi kona ningatatikomba na nili muhoxi hakunene. ¹⁹ Loko ali mina, Nawu wunidlayile. Hi tlhelo ra Nawu mina anifile, lesvaku nitahanyela Xikwembu. Kriste avambiwile kutani nivambiwile na yena; ²⁰ hi kolaho, angahali mina lweyi ahanyaka, kambe i Kriste lweyi ahanyaka ka mina. Svosvi, loko nihanya mirini, nihanya hi kupfumela, kunga kupfumela ka N'wana wa Xikwembu lweyi anirhandzeke, ava atinyiketa hikolaho ka mina. ²¹ Anifularheli timpsalu ta Xikwembu, hikuva loko vanhu vangayendliwa lavalulameke hi mhaka ya kuhlayisa Nawu, svihlaya lesvaku kufa ka Kriste akupfunanga nchumu.