¹ Hi svosvo, n'wina vavasati lavatekiweke: Titsongahateni ka vanuna va n'wina, lesvaku van'wana vakokiwa hi mahanyela ya n'wina vasati va vona, hambi loko vangayingisi Rito avangabzeliwi hi munhu, ² hikuva vatavona xichavu xa n'wina ni kutenga ka n'wina. ³ Xa n'wina, kungavi kutibombisa hi sva le handle, hi misisi leyisasekisiweke, ni kutisasekisa hi svilo sva golidi, ni kuyambala tinguvu ta risima. ⁴ Kutibombisa ka n'wina, akuve ka vumunhu bza n'wina lebzinga xihundleni xa mbilu; akuve ka moya lowungawonhekiki wa kunabzala ni kurhula, lowunga ni risima lerikulu mahlweni ka Xikwembu. ⁵ Khale, vavasati lavohlawuleka lava avatshembile Xikwembu, avatolovela kutibombisa hi mukhuva lowu, kutani avatitsongahata ka vanuna va vona. ⁶ Svivile tano na Sara, lweyi ayingiseke Abrahamu, amuvula “hosi yanga”. Kutani svosvi, mi vana va yena loko miyendla lesvolulama, na mingachavisiwi ha nchumu. ⁷ Hi ndlela yoleyo, na n'wina vavanuna, hanyisanani ni vasati va n'wina hi kutwisisana, hikuva vafana ni svibza lesvingatiyangiki, nasvona mivaxixima, hikuva vataja ndzhaka ya timpsalu ni vutomi svin'we na n'wina. Vaxiximeni lesvaku mikhongelo ya n'wina yitakala yingasiveliwi. ⁸ Kuheteleleni: N'wina hinkwenu mifanele kuva ni moya wun'we, mitwelana vusiwana, miva ni rirhandzu ka vamakwenu, miva ni mbilu ya vumunhu ni miyehleketo ya kutitsongahata. ⁹ Mingatlheliseleni vubihi hi vubihi, kumbe kurhuka hi kurhuka, kambe matshan'wini ya svosvo, katekisani, hikuva hi lesvi mingavitaneliwa kuyendla svona, lesvaku mitakuma nkateko na n'wina. ¹⁰ Hikuva, hilaha Matsalwa mahlayaka hakona, “Lweyi anavelaka kuhanya vutomi lebzitsakisaka, ni kuvona masiku lamanene, aafume ririmi ra yena richava sva kubiha, ni nomo wa yena wungavulavuli mavunhwa; ¹¹ aatshike lesvohomboloka ayendla sva kululama; aalave kurhula atiyisela ndleleni yakona. ¹² Hikuva mahlo ya Hosi matsakela lavolulama, ni tindleve ta yona tipfulekele svikhongelo sva vona, kambe Hosi yifularhela lavayendlaka sva kubiha.” ¹³ Hi svosvo ke, xana i mani lweyi angamiyendlaka lesvobiha, loko n'wina mihisekela kuyendla lesvilulameke ke? ¹⁴ Kambe ni loko mixanisiwa hikolaho ka lesvolulama, mikatekile; mingachaveni vanhu, nasvona mingakarhatekeni. ¹⁵ Timbilwini ta n'wina, kombisani xichavu ka Kriste, lesvi anga Hosi; masiku hinkwawu tilungiseleni kutihlamulela ka mun'wana ni mun'wana lweyi amivutisisaka henhla ka kulangutela loku minga nakona, ¹⁶ kambe misviyendla hi moya wa kutenga. Nasvona, mitshama na mili ni ripfalu leribaseke, lesvaku loko mihembeliwa, lavasandzaka mahanyela ya n'wina layolulama ka kriste, vatakhomiwa hi tingana. ¹⁷ Hikuva svayampsa kutwa kuvaviseka hi mhaka ya kuyendla lesvolulama, loko svosvo svili lesvi Xikwembu xisvirhandzaka, kutlula kutwa kuvaviseka hi mhaka ya kuyendla lesvingalulamangiki. ¹⁸ Kriste na yena afele svijoho kan'we, afela n'wina; yena munhu lowolulama afele lavangalulamangiki, lesvaku atamifikisa ka Xikwembu; adlayiwile hi tlhelo ra miri, kambe ayendliwile lweyi ahanyaka hi tlhelo ra moya. ¹⁹ Hi moya, ayile ayatwalisa rito ka mimoya leyinga jele, ²⁰ leyi kusunguleni yikalaka yingayingisanga Xikwembu loko xilehisa mbilu xiyima xingayendli nchumu, nkameni lowu Nowa angayaka ha wona ngalawa. Ngalaweni leyi kunghenile vangali vangani, hi lesvaku vanhu va ntlhanu ni vanharhu, lavaponisiweke ha yona matini. ²¹ Ntsakamiso wuyelana ni mhaka leyi; svosvi wa miponisa, kungali hi kususa nsila mirini, kambe hi kuyendla lesvaku mikombela ripfalu leribaseke ka Xikwembu. Ntsakamiso wa miponisa hi mhaka ya kupfuka ka Yesu Kriste kufeni, ²² yena lweyi ayeke tilweni, kutani svosvi anga vokweni ra xinene ra Xikwembu, na tintsumi ni vafumi ni lesvi sva matimba svili hansi ka yena.