¹ Hikolaho, tshikani mona hinkwawu, ni vubihi hinkwabzu, ni vukanganyisi, ni mavondzo, ni kulumbeta hinkwaku. ² Kufana ni vatsongwana lava vahakuvelekiwaka, mifanele kunavela ntswamba lowubaseke wa moya, lesvaku ha wona mitakota kukula miya kuponisiweni, ³ hikuva minampsile vunene bza Hosi. ⁴ Tanani ka yena, hikuva yena i ribze lerihanyaka, lerinyenyiweke hi vanhu, kasi mahlweni ka Xikwembu hi lerihlawuliweke, ra risima. ⁵ Kutani, kufana ni maribze lamahanyaka, na n'wina mifanele kuyakiwa miyendla yindlo ya moya, lesvaku mitava vaprista lavahlawulekeke, mihumesa timhamba ta moya letiyamukelekaka ka Xikwembu ha Yesu Kriste. ⁶ Hikuva ka Matsalwa, ku ni lesvinge: “Vonani, niveka ribze le Siyoni, ribze ra yinhla lerihlawuliweke, ra risima; kutani lweyi apfumelaka ka rona, angakala angakhomiwi hi tingana.” ⁷ Hikolaho, ka n'wina mipfumelaka, i ra risima, kambe ka lavangapfumeliki, “Ribze leri vayaki vangarinyenya, hi rona ringayendliwa ribze lerikulu ra yinhla.” ⁸ Nasvona, “I ribze leringatakhunguvanyisa vanhu, i ribze leringatavawisa.” Vakhunguvanyisiwa vawa, hikuva vayala kuyingisa Rito, hilaha svingabohiwa hakona khale, lesvaku vatayendla svona. ⁹ Kambe n'wina, mi rixaka lerihlawuliweke, mi vaprista va Hosi, mi tiko lerihlawulekeke, vanhu lavanga va Xikwembu hi ntiyiso, lesvaku mitakota kutwalisa mintirho leyosaseka ya lweyi amivitaneke kuhuma munyameni, mitanghena kuvonakaleni ka yena loku kuhlamalisaka. ¹⁰ Khale amingali tiko, kambe svosvi mi tiko ra Xikwembu; khale amingatsetseleliwi, kambe svosvi mikumile kutsetseleliwa. ¹¹ Varhandziwa, lesvi minga vatshami ni vayendzi misaveni, namikhongotela hi matimba lesvaku mihambana ni kunavela ka miri, lokulwaka ni mimoya ya n'wina. ¹² Hanyani hi mukhuva lowolulama xikarhi ka vamatiko, lesvaku loko vatshuka vamilumbeta, vaku mivajohi, vatavona mintirho ya n'wina leyosaseka, vadzunisa Xikwembu, hi siku leri xingatata ha rona. ¹³ Hikolaho ka Hosi, titsongahateni ka lavafambisaka tihuvu ta tiko, kufana ni hosi leyikulu ya tiko leyinga henhla ka tin'wana tihosi, ¹⁴ hambi tili tindhuna letirhumiweke hi yona kukhatisa lavayendlaka lesvobiha ni kudzunisa lavayendlaka lesvolulama. ¹⁵ 1Hikuva i kurhandza ka Xikwembu lesvaku, hi kuyendla lesvolulama, mitamiyeta lavangativiki nchumu, hi mhaka ya vuphukuphuku bza vona. ¹⁶ Hanyani kufana ni vanhu lavatshunxekeke; mingatekeni kutshunxeka ka n'wina yili ndlela yokanganyisa ha yona, yoyendla lesvobiha, kambe hanyani kufana ni vatirhi va Xikwembu. ¹⁷ Xiximani vanhu hinkwavu. Rhandzani nhlengeletanu ya vamakwenu. Chavani Xikwembu. Xiximani hosi leyikulu ya tiko. ¹⁸ N'wina vatirhi, titsongahateni ka vinyi va n'wina hi xichavu lexilavekaka, kungali ntsena ka lavanga ni timpsalu ni vunene, kambe ni lava vokarhata. ¹⁹ Hikuva wakhenseka munhu lweyi avekaka Xikwembu mbilwini, kutani atiyisela mahlomulweni na ali karhi atwa kuvaviseka na angawonhanga nchumu. ²⁰ Xana loko mibiwa hikolaho ka kujoha ka n'wina, kutani mitiyisela, svi ni kudzunisiwa svosvo ke? Kasi, loko miyendla lesvilulameke, kutani mitiyisela na mili karhi mitwisiwa kuvava hikolaho ka svona, svosvo svakhenseka ka Xikwembu. ²¹ Mivitaneliwe svona, hikuva Kriste na yena atwile kuvaviseka hikolaho ka n'wina, amiboxela ndlela lesvaku mitamulandzelela. ²² Angajohanga nchumu, angavulanga svokanganyisa van'wana. ²³ Loko arhuketeliwa, angatlheliselanga hi kurhuketela; loko vamuxanisa, angahlayanga lesvaku atatirihisela, kambe asvitshikele mavokweni ya lweyi ayavanyisaka hi kululama. ²⁴ Yena hi yexe, arhwele svijoho sva hina mirini wa yena le xihambanwini, lesvaku na hina hifa hi tlhelo ra kujoha, hihanyela kululama. Miholisiwile hi svilondza sva yena. ²⁵ Khale, amipepetseka kufana ni tinyempfu, kambe svosvi mivuyile ka bixopo ni mulanguteli wa mimoya ya n'wina.