¹ Mina Petrosi, mupostola wa Yesu Kriste, nitsalela lavarhurhisiweke ni kuhangalasiwa matikweni ya Ponto, na Galatiya, na Kapadokiya, na Aziya, na Bitiniya, ² vanga lavahlawuliweke khale hi vutivi bza Xikwembu Tatana, vahlawulekisiwa hi Moya lesvaku vayingisa Yesu Kriste ni kuxuviwa hi ngati ya yena, nili: Timpsalu ni kurhula asvive na n'wina hi ntalu. ³ Akukhensiwe Xikwembu, Tatana wa Hosi ya hina Yesu Kriste! Hi timpsalu ta yena letikulu, ahivelekile ra vumbirhi, lesvaku hiva ni kulangutela loku kuhanyaka, hikolaho ka kupfuka ka Yesu Kriste xikarhi ka vafi, ⁴ ni lesvaku hinyikiwa ndzhaka leyingaboliki, leyinganyamisiwangiki, leyingavuniki. Mivekeliwile yona matilweni, ⁵ n'wina lava mipfumeleke, kutani mihlayisiwa hi matimba ya Xikwembu, lesvaku mitakuma kuponisiwa loku kuyimeleke kukombisiwa nkameni wa makumu. ⁶ Mhaka leyi yamitsakisa, hambi loko svosvi mahafanela kutwa kuvava nkarhinyana, hikolaho ka miringo ya tinxakaxaka. ⁷ Miringo leyi yiyendla lesvaku kupfumela ka n'wina, loku kutlulaka golidi hi risima, kuvoneka na kutiyile. Golidi, hambilesvi riringetiwaka hi ndzilo, rawonheka; kambe kupfumela ka n'wina, lokutiyeke, kutadzunisiwa, kutwalisiwa, siku leri Yesu Kriste angatahumelela. ⁸ Ni loko mingasimuvona, mamu rhandza; hambi ni svosvi mingamuvoniki, mapfumela ka yena, kutani mitsaka hi kutsaka loku kuhlamalisaka, lokungahlayekiki, ⁹ na mili karhi mikuma mihandzu ya kupfumela ka n'wina, kunga kuponisiwa ka mimoya ya n'wina. ¹⁰ Vaprofeta lavativiseke sva timpsalu leti atifanele kukombiwa n'wina, valavisisile ni kukambisisa ta kuponisiwa loku; ¹¹ vakambisisile hi kulava kutiva lesvaku xana Moya wa Kriste lowu avali na wona, awukomba mani kumbe nkama wihi ke, loko wuli karhi wutivisa ta mahlomulu ya Kriste lweyi, ni kudzunisiwa loku akutalandzela ndzhaku. ¹² Vakombisiwile hi kuhlavuteliwa lesvaku avangatitirheli, kambe avatirhela n'wana, ka svilo lesvi mitivisiweke svona svosvi. Mitivisiwile svilo svakona hi lava vapaluxeke Evhangeli ka n'wina, hi Moya Lowokwetsima lowurhumeliweke hi le tilweni. Svilo svakona, tintsumi na tona tanavela kusvihlometela. ¹³ Hikolaho, pfukani miyehleketweni! Tikhomeni! Vekani kutshemba ka n'wina hinkwaku henhla ka timpsalu leti mingatakombiwa tona, siku leri Yesu Kriste angatahumelela. ¹⁴ Kufana ni vana lavanga ni kuyingisa, mingalandzeni kunavela ka n'wina lokobiha loku amili nakona na mingasitiva nchumu. ¹⁵ Kambe, lesvi lweyi angamivitana akwetsimeke, kwetsimani na n'wina mahanyeleni hinkwawu ya n'wina. ¹⁶ Hikuva kutsaliwile lesvi: “Kwetsimani, hikuva mina nikwetsimile.” ¹⁷ Loko mikhongela, mimuhlaya “Tatana”, yena lweyi ayavanyisaka munhu mun'wana ni mun'wana, na angayi hi nghohe kambe hi mintirho ya munhu; hi kolaho, hanyani hi xichavu, nkameni hinkwawu wa kuhanya ka n'wina laha misaveni. ¹⁸ Masvitiva lesvaku miponisiwile ka tindlela letingapfuniki nchumu, leti mitikumeke ka vatatana va n'wina; miponisiwile kungali hi svilo lesviwonhekaka kufana ni silivhere kumbe golidi, ¹⁹ kambe hi ngati ya risima ya Kriste, leyifanaka ni ya xinyempfana lexingaliki na vulema kumbe xivati. ²⁰ Lweyi angativiwa hi Xikwembu, na misava yingasitumbuluka, akombisiwa hikolaho ka n'wina, minkameni leyi ya makumu. ²¹ Hikolaho ka yena, mi ni kutshemba ka Xikwembu, lexi ximipfuxeke xikarhi ka vafi, xinyika kudzuneka, kuyendlela lesvaku kupfumela ka n'wina ni kulangutela ka n'wina sviva ka Xikwembu. ²² Lesvi mibasiseke mimoya ya n'wina hi kuyingisa ntiyiso ni kurhandza vamakwenu hi rirhandzu ra ntiyiso, rhandzananani svinene hi timbilu ta n'wina hinkwatu. ²³ Mipsaliwile ra vumbirhi, kungali hi mbewu leyibola ²⁴ Hikuva, “Nyama hinkwayu yifana ni bzanyi, ni kusaseka ka yona kufana ni xiluva xa nhova. Bzanyi bzavuna, ni xiluva xiwela hansi, ²⁵ kambe Rito ra Hosi ritshama hilaha kungaheliki.” Rito lero i Evhangeli leyi mijondzisiweke yona.