¹ Makura Jesusa ayi mupititiri mpepo mumburundu mukuka musheteka mudjonaghuli. ² Apa adililire mayuva dimurongo nee namatiku dimurongo nee, uye yamukwatire ndjara. ³ Musheteki aya nakughamba kukwendi ashi, '' Ntjene ve mona Karunga, rawira ghano mawe a kare mboroto.'' ⁴ Ano ngoli Jesusa a limburura nakughamba kukwendi, '' Vavi tjanga, ' Murwana nakuvhurashi kuparuka kumbororto pantjayo ano ngoli nakukehe nkango yakutunda mukanwa kaKarunga.'' ⁵ Makura mudona a mutwara kushitata shakupongoka nakukamutura pawiru-wiru yaNtembeli, Nakughamba kukwendi, '' ⁶ ntjene ve mona Karunga, kuvhukume naghumoye, vavi tjanga, ' Uye nga nangwira vaEngeli vendi ngava kupakere mbili; ntani ' Vavo ngava kudamuna mumahoko ghavo, mpo ngoli ashi ove kapishi ngaupundure mpadi muliwe.'' ⁷ Jesusa aghamba kukwendi, '' Ntani nka vavi tjanga, ' Washa sheteka Hompa Karunga ghoye.'' ⁸ Ntani nka mudona amutwara kundundu yayire unene nakumunegheda maghuntungi naghantje ghamughudjuni rambangako namaghuyerere ghamo. ⁹ Uye aghamba kukwendi, '' Navintje vino vininke ngani vikupa, ntjene ghuwana kunkarera ame.'' ¹⁰ Makura Jesusa aghamba kukwendi, '' Yenda tunda pano, mudjonaghuli! vavi tjanga, ' Karera Hompa Karunga ghoye ntani nka mukarere pantjendi.'' ¹¹ Makura mudona amushuvu, makura vaEngeli ava ya nakuya mukarera uye. ¹² Weno apa Jesusa ayuvhire ashi Johanesa vana mutapa uye atundu kuGalilea. ¹³ Uye kwa shuvire Nasaretha ntani ayendi nakukatunga muCapernaum, kunya kuviha vyalifuta lyaGalilea mumukunda waSeburoni naNafitali. ¹⁴ Vino kwashorokilire mukutikitamo evi aghambire Jesaya wa muporofete, '' ¹⁵ Livango lyaSeburoni ntani livango lyaNafitali, kuviha vyalifuta, musheli munya ya Jordani, Galilea yavahedana! ¹⁶ Vantu ava vashungiliro mumundema va monine ghukenu waghunene, ntani navo vashungiliro muruha mukunda namumundulye waMfa, pa pavo ghukenu kuna kuva temena.'' ¹⁷ Kutunda paruvede ndoro Jesusa atameke kuyuvita nakughamba, '' Kushighurenu, ghuntungi waliwiru ghunaya papepi.'' ¹⁸ Apa ghuye ayendire kuntere yalifuta lyaGalilea, a mono vaghunyendi vaviri, Simoni oghu kava twenyanga Peturusa, ntani Andreasi mughunyendi, kuna kutegha likwe mulifuta, vavo kwa kalire vashakangcongco. ¹⁹ Jesusa aghamba ku kwavo, '' Yenu, nkwamenu, ntani ame ngani murenka vakwati vavantu.'' ²⁰ Mpopo ngoli ava shuvu makwe nakumukwama. ²¹ Apa Jesusa ayendire kutunda panya a mono nka vaghunyendi vaviri, Jakopo mona Zebede, ntani Johanesa mughunyendi. Vavo kwakalire muwato naZebede shavo kuna kuwapayika makwe. Ava kughu, ²² makura vavo mpopo ava shuvu wato ntani shavo nakumukwama. ²³ Jesusa ayendi muGalilea nayintje, kushonga mushinagoge davo, kuyuvita mbudi yayiwa yaghuntungi nakuverura maghuvera ghakukushuva-shuva mukatji kavantu. ²⁴ Mbudi yakuhamena Jesusa ayi kuhanene muSiriya mudima, ntani vantu ava yita kukwendi navantje ava kava hepango kumaghuvera ghakukushuva-shuva ntani kukora, ovo vakaliro nampepo dadidona, vingondwe ntani virema. Jesusa ava verura. ²⁵ Mbunga yayinene ayi mukwama kutunda kuGalilea, Dekapolisisi, Jerusalema, ntani Judeya, ntani kutunda musheli munya yaJorodani.