¹ Vaghgunyande, ntjene mwakara na lipuro mwa Hompa wetu Yesus Kristus, Hompa wa ghuyerere, walye mwa tekuranga vantu muma ruha maviri. ² Nkene muntu angene mukatji kenu ana dwata linga ya gorodo na vyuma vya viwa, ntani mungene muntu waruhepo wa vyuma vya kunyata. ³ Anwe kumona muntu ana dwata vyuma vya viwa kughamba, ''Ove shungira pano papawa,'' ano ngoli anwe kughamba kwa muhepwe, ''yimanena kunya'' ndipo '' shungira pa livhukumpadi dande,'' ⁴ Ogho meshi makutoghoro mukatji kenu? Anwe muna kara vapanguli va maghayaro ama dona? ⁵ Tukuteghererenu, vaghunyande vakuhora, nane kapishi Karunga a toghororo vahepwe va mughudjuni vakare va ngagho mu lipuro ngava ka kare vapingwa va ghuntungi ogho va twenyidira kwavo vamuhora. ⁶ Ano ngoli anwe mwanyenga vahepwe? Nane kapishi vangagho mbo vamu hepe kango? Nani kapi mbo vamu koka-kokango vamu tware kumbara? ⁷ Kapi mbo vashwaghurango lidina lya liwa olyo vamu yititanga? ⁸ Ano nkene ashi munatikitamo vata kutwara mumatjangwa, ''Ghuna hepa kuhora ghunyoye yira naghumoye,'' ghuna hungiki. ⁹ Ano ngoli nkene tupu anwe kuruwana uwa kuvamwe, anwe muna tura ndjo, ntani veta ngayi mupangura ashi anwe muva djoni. ¹⁰ Kwa kehe ghuno wa kulimburukwa ku veta nadintje, nkwandi alimbuke po yimwe na mpili kadidi, ghuye mudjoni ana tjora veta nadintje. ¹¹ Ogho aghamba, ''wa shashondera,'' ndje aghambo nka, ''washa dipagha muntu,'' ntjene ashi kapi wa shondera, ano ngoli ove wa dipagha muntu, ove ghumudjoni ku veta nadintje. ¹² Ghambenu na kurughana yira mbovo ngayi kapangura veta ya ku manguruka. ¹³ Opo ngali tika lipanguro kapi nga kukara nkenda kwavo va piliro kufera nkenda vaghunyavo. vana nkenda kukaponda unene vadine lipanguro. ¹⁴ Vinke vya kawana mo, vaghunyande, ntjene ove kughamba ashi wajara nalipuro, ano ngoli ove wa hana shirughana ? Lipuro lya ngoli kuvhura likuyoghore ndi? ¹⁵ Ntjene pana kara mughunyoye wa mukamali ndi muka fumu wa nkagi ntani kapi ana kara na ndya olyo liyuvha. ¹⁶ Ghumwe mukatji kenu aghambe ku keavo, ''yenda nambili, kadwate ntani kalye ghuka kute,'' Ove wa hana kutapa ovyo rwa hepa rutu rwendi, vinke vivhure kukwafa? ¹⁷ Shimpe waro na lipuro pana ghumwalyo, ntjene kundereko shirughana, lya fa. ¹⁸ Ghumwe kuvhura aghambe, ''Ove kwa kara nalipuro, ame kwara na virughana,'' Neghede ko lipuro lyoye lya kupira shirughana, ame niku neghede lipuro lyande lya muvirughana. ¹⁹ Ove wapura ashi Karunga ghumwe tupu; mughuhunga nampili mpepo da didona nado mo dapura, ano ngoli dado kukankama. ²⁰ Kuna horo ghuye ove ligiva, ashi lipuro lya hana shirughana kundereko vyaku vhura kukwafa. Mumbapira da kare kwa tjangamo ashi, wa yiva nawa, ove livaya, ntjeneshi lipuro lya kupira shurughana lya fa? ²¹ Nane Aburaham shetu kapishi kwa hungamine mukonda ya virughana vyendi opo atapire monendi Isak amu djambere? ²² Ghuna vimono ashi lipuro lyendi kwa rughanine kumwe na virughana vyendi, muvirughana vyendi lipuro lyendi kwa tikiliremo. ²³ Matjangwa kwa tikiliremo ogho a ghambo, ''Aburaham kwa pulire mwa Karunga, makura ava mu varulire kughuhungami,'' Ghuye ava mutwenya ashi muholi wa Karunga. ²⁴ Muna mono ashi muntu kuhungamena kuvirughana, kapishi kulipuro tupu. ²⁵ Mundjira ndjoyo nka waro, Rehab mukadi wa rukeshe, kwa hungamena kuvirughana vyendi opo atambulire vatumi ava horeke ntani ava tumu va kayende na ndjira ya peke. ²⁶ Momo tupu rwa kara rutu nkene rupira mpepo runa hepa kufa, na lipuro shi nalyo ntjene lipira shirughana lya fa.