¹ Ntjene aghu takamita nakukarera kuliywi Hompa Karunga ghoye ghukwame vipangovyendi ovyo nakumurawira namuntji, Hompa Karunga ghoye ngamu tura kuwiru yadimuhoko nadintje dapalivhu. ² Matungiko naghantje ngaghaya kukwenu nakumupitira kumeho, ntjene ngamu tegherera kuliywi lyaHompa Karunga ghoye. ³ Valirago ngava ka kara mushitata ntani valirago ngava ka kara mulifuva. ⁴ valirago ngava kara va nyango dambira yoye, nyango yalivhu lyoye, ntani nyango yavimuna vyoye, ntani likuvhukito lyaghutanga ghoye ntani ndjwighona doye damushighunda. ⁵ Matungiko ngagha kara mushikumba shoye ntani nkalito yamarongo ghenu. ⁶ Matungiko ngagha kara apa ngaghuya ngena, ntani matungiko ngagha kara apa ngaghuya rupuka. ⁷ Hompa nga renkita vana nkore venu ovo ngava mushapukiro ngava fe kumeho yenu, ngava mu shapukira nalidiro kumukwatitako nandjira yimwe ene ngoli ngava kuhana mundjira ntambiri kumeho yenu. ⁸ Hompa nga rawira matungiko ngagha ye papenu mivishete vyenu ntani nakuntje oku mwa kwatanga namaghoko ghenu; guye ngamu tungika mushirongo eshi ana kumupa. ⁹ Hompa ngamu tura vantu vendi ava aku hangwira kwa naghumwendi, yira momu amu ghanitira kukwenu, ntjene mutikitamo dimuragho daHompa Karunga wenu, nakuyenda mundjira yendi. ¹⁰ Vantu nantje vamughundjuni ngava kenga ashi kwamu kugha nalidina lyaHompa, ntani vavo ngava mu tjira. ¹¹ Hompa ngamu renka mu ragope ghunene munyango damumbira denu, munyango da vimuna vyenu, ntani munyango dalivhu lyamushirongo shenu eli a ghaninine kuvasha venu muku mupa. ¹² Hompa nga gharura kukwenu ndjugho daghupungiro wendi mumawiru muku mupa mvhura yashirongo shenu paruvede rwaghuhunga, nakutungika virughana vyenu navintje vyamaghoko ghenu; ngamu dikorotita kudimuhoko dadingi, ene ngoli ngoli kapi ngamu romba. ¹³ Homap ngamu renka anwe mukare dimutwe, ntani kapishi dimushira; anwe ngamu kara tupu kuwiru, ntni anwe kapi ngamu kara palivhu, ntjene anwe ngamu tegherere kudimuragho dendi Hompa Karung wenu evi nina kumu rawira ame namuntji, mukukwama ntani kuvirughana, ¹⁴ ntani ntjene kapi ngamu tunda muyende kunkango dapeke edi nakumurawira namuntji, kurulyo ndi kurumondjo, mukuyenda kuvakarunga navo peke nakukarera. ¹⁵ Ene ngoli ntjene kapi ngamu tegherera kuliywi lyaHompa Karunga wenu, mposhi mu tikitemo dimuragho dendi ntani namarongo ogho nikumupa namuntji, mpo shi ngoli mafingo ghenu naghantje ngagha ya kukwenu kumwe nakumu pitura kumeho. ¹⁶ Vakufinga ngamu karo mushitata, ntani lifingo ngali kara mulifuva. ¹⁷ Lifingo ngali kara muvikumba ntani mumatemba ghenu. ¹⁸ Lifingo ndjo ngali karo nyango yamarutu ghenu, nyango ya livhu lyenu, likuwederero lyalivhu lyenu, ntani nandjwighona damu ndjwi denu. ¹⁹ Lifingo ngali kara apa ngamu ngena, ntani lifingo ngali kara apa ngamu rupuka. ²⁰ Hompa nga tuma papenu lifingo, lipiyagano, ntani lishweno navintje evi mwa turanga mumaghoko ghenu, dogoro ngamu djonaghurepo, dogoro ngamu djonaghukepo wangu mukonda ghudona wavirughana vyenuovyo muna ntjuvire ame. ²¹ Hompa nga tura mahepekoa kakatere kukwenu dogoro ngamu djonaghupo kutunda kushirongo eshi muna kuyenda muka weke. ²² Hompa ngamu hona nalihamba lyamukaghu, naghupyu, nakudunda, ntani rukukutu ntani nahupyu waghunene, nampepo yaghupyu ntani ndaghu. Evi mbyo ngavi mu kwama kwamo dogoro ngamu djonaghuke mo. ²³ Liwiru olyo lyamufiko ngali kara ngoporo, ntani livhu eli lyakaro kuntjiyenu ngali kara shikugho. ²⁴ Hompa nga renka mvhura ya rokango mushirongo shenu ghutura ntani mbundu; kutunda kumawiru ngali ghurumuka papenu, dogoro ngamu djonaghukepo. ²⁵ Hompa ngamu renkita anwe vamudipaghe vana nkore venu; anwe ngamu yenda ndjira yimwe kumwe navo ene ngoli ngamu ntjwayuka kukwavo mundjjira ntambiri. Anwe ngamu ngava murendeda kumeho nakuruku mukatji kamaghuhompa ghapalivhu. ²⁶ Marutu ghenu ghakufa nga gha kara ndya davidira navintje vyamuliwiru ntani vikashama vyamuwiya vapalivhu; ako kapi ngaku kara ogho ngava tjilito. ²⁷ Hompa ngamuhomwena matemba ghamu Egipute ntani nevi vya kushumaura mulipumba, shekesha, ntani nakuyuwa, oko ngamudira kuveruka. ²⁸ Hompa ngamuhomwena upurumuke, nautwiku ntani nalipiyagano pauruvi. ²⁹ Anwe ngamurendarenda kungurova yiva shitwiku ana kurendarendo mu mundema, ntani kapi ngadimutompoka ndjira denu, ntani kapi ngapakara nampili umwe wakumuyowora. ³⁰ Ngamuvandekera mukamali, ano ngoli mukafumu wapeke ngamuwapa mumpangera yendi kumwe nakumukwatera kunkondo. Ngamudika ndjugho ngoli kapi ngamutunga mo, ngamutura shikunino ngoli kapi ngamupembura nyango yamo. ³¹ Hove denu ngadifa kumeho yenu, ngoli kapi ngamumakera kunyama yado; vidongi vyenu ngava vimughupa kunkondo ntani kapi ngavi kavyuka kwenu. Ndjwi denu ngavaditapa ku vanankore venu, kapi ngamukara naumwe wa kumuvatera. ³² Vana venu ngavavatapa kuvantu peke, mantjo ghenu ngagharoroka mukuvashana mwi nauntje, ngamukara nalikuyuvo yira muvamone ngoli kapi ngavitikamo. Kapi ngamukara na nkondo mumaghoko ghenu. ³³ Liyanguro lya shirongo shenu ntani viruwana vyenu navintje- muhoko ogho mwadira kuyiva ngava vimulyerapo; anwe ngava muhepeka kehe pano na kumubaura, ³⁴ mposhi ngamupiyagane pakumona ovyo vinakushoroko. ³⁵ Hompa ngamurwita na matemba murongo na maghuu kumatemba gha madidi ogho ngagha diro kuveruka,kutundilira kuntji ya mpadi denu dogoro pawiru ya dimutwe denu. ³⁶ Hompa ngamughupa kumwe na hompa wenu owo ngamutura mpitameho yenukushirongo osho mwapira kuyiva, shikare shi anwe ndi vanyakulya vanyakulyenu; ko nko ngamukakarera vakarunga venu va vitondo na mawe. ³⁷ Ngamuyakara vakakukora na likorangedo, ntani na mulyo, pakatji kavantu ovo ngamu twalidira Hompa Karunga. ³⁸ Ngamutura mbuto ya yiyingi mushikunino, ngoli ngamuyangura mbuto ya yisheshu, mukondashi shhimbonde ngayilya mo. ³⁹ Ngamukuna mandjembere kumwe na kuyangura, ngoli kapi ngamu nwa kuvinyu, ndi mutulike ogho mandjembere, mukondashi mavinyo ngavagha lya. ⁴⁰ Ngamukara navitondo vya ndjwe mumavango ghenu naghantje, ngoli kapingamugha kukwita, mukonda vitondo vyenu vya ndjwe ngaviganda nyango yavyo. ⁴¹ Ngamukara na vana, ngoli kapi ngavakarera venu, mukondashi ngavavakwata. ⁴² Vitondo navintje na nyango nayintje ya mulivhu lyenu- vimbonde ngavavihupo. ⁴³ Vantundwa virongo ovo ngavakaro mukatji kenu ngavamupitira kuwiru na kuwiru; anwe naumwenu ngamu ghurumuka na kughurumuka. ⁴⁴ Ngava mughupa nkondo, vene ngoli anwe kapi ngamutapa makongo kwavo, ngavakara mutwe wenu, ntani nka ngamukara kughuhura. ⁴⁵ Mafingo naghantje ngaghaya pa penu ntani na kukwama kumwe nakumupititira kumeho dogoro ngamudjonauke. Evi ngavi mushorokera mukonda kapi mwateghelire ku liywi lya Hompa Karunga wenu, mukutikitamo dendi ntani na matjangwa ogho amurawilire. ⁴⁶ Agha mafingo ngagha kara na vineghedito ntani na vitetu, ntani na kuvanyakulya vanyakulyenu naruntje. ⁴⁷ Mukondashi kapi mwakalilire Hompa Karunga wenu na ruhafo rwa runene ntani narupandu mu mutjima opo mwakalire nakuyenda kumeho, ⁴⁸ mpo ngoli shi ngamuruwanena vanankore venu ovo Hompa ngamutumina, ngamuruwanena na ndjara, na linota, ruturutu, ntani na murunyando. Ngamutura djoko ya shikugho pa ntingo dogoro ngamu djonauke. ⁴⁹ Hompa ngamuyitira muhoko wa kughure mulipiro kuyuva, kumauhura gha pantunda ya livhu, yira mpungu ana kutukiro munankore wendi, muhoko ogho mwadiranga kukuyuva mu maraka, ⁵⁰ muhoko wa kupira nkedi kufumadeka vakurona,ntani nakukwatako shi vanantjoka. ⁵¹ Ngavalya vimuna ghona vyenu na nyango ya mulivhu lyenu ngli djonauka. Kapi ngavamushuvira mo rukokotwa rwa ngandi, vinyu ya yipe,ndi maghadi,vimuna ghona ndi vindjwi, dogoro ngavimu djonaure. ⁵² Ngava muhepekera munda ya heka denu, dogoro makuma ghenu gha mare na lipopero ngaghawe mushirongo shenu nashintje, makuma ogho mwatulire lihuguvaro. Ngavamuhepeka muheka da vitata vyenu navintjeovyo Hompa Karunga amupa. ⁵³ Ngamulya ngango ya marutu ghenu, na nyama ya vana venu,ovo Hompa Karunga amupa, mulipaterero ntani namu maghayadaro ogho ngavamutura vanankore venu. ⁵⁴ Murume wa muwa na ukaro wa uwa unene pakatji kenu- mutjima wendi ngaudompa kuvawina ntani na mukamali wendi, ntani kehe uno monendi ahupopo. ⁵⁵ Kapi ngapakara kehe uno wavo vana vendi mukondashi ne ngavalya po mwene mundjira peke, mukondashi kwato evi ngavimuhuparero po murunyando ntani na mumaghayadaro ogho ngavamutura vanankore venu munda ya vitata vyenu. ⁵⁶ Mukadi wa muwa ntani na ukaro wa uwa pakatji kenu, ogho ngapiro kukupura mukulyatera palivhu mukonda ya uwa na ukaro wa uwa- ngadompera vyendi, monendi wa mumati, ntani monendi wa mukadona, ⁵⁷ ntani kwa monendi oghu ngashampuruka mwene, ntani na vana ovo ngakara navo.Ngavalyera mulihoramo mukonda yakupira vimweya vyapeke, murunyando ntani na mumaghayaro ogho ngavamupa vanankore venu munda da vitata vyenu. ⁵⁸ Ntjene kapi ngamukwaterera kunkango odo vatjanga mumbapira ya mwenyo, mposhikufumadeka eli lidina lya uyerere ntani na woma woma, Hompa Karunga wenu, ⁵⁹ Hompa ngarenka masheteko ghenu ngaghakare gha madito ntani nogho gha vanyakulya vanyakulyenu ; ngaghakara masheteko gha manene, pa shirugho sha shinene, ntani na mauvera gha kudira kutwara mwapeke, pashirugho sha shire. ⁶⁰ Ngamuyitira mauvera naghantje agha mwatjilire mu Egipute; ngaghakara pa penu. ⁶¹ Ntani nka mauvera naghantje na masheteko ogho vapira kutjanga mumbapira yino ya veta, ogho nagho Hompa ngaghayita pa penu mukumudjonaura. ⁶² Ngamuhuparapo va vasheshu,nampilingoli mwakalire yira ntunguru da muliwiru muungi wenu, mukondashi kapi mwategherera liywi lya Hompa. ⁶³ Mbyevi apembulire Hompa rumwe mumwenu op mwaruwanine uwa, mukumuyingipita, ngamu pembwira mukumu dongonena ntani nakumu djonaura. Ngava mughpa mushirongo shenu osho ngamukakara nasho. ⁶⁴ Hompa ngamuhanaura kutunda kughuhura umwe wa pantunda ya livhu dogoro kughuhura umweya wa palivhu; oko nko ngamukakarera vakarunga venu vamwe ava mwayiva, anwe ndi vanyakulya vanyakulyenu, vikarunga vya vitondo na mawe. ⁶⁵ Kapi ngamuwana ureru pakatji kadimuhoko, kapi ngakukara lipwiyumuko kuntji ya mpadi denu, mulivango, Hompa ngamupa likankamo mutjima, mantjo gha kudira kutikitamo kumona, ntani monyo wa ruguvho. ⁶⁶ Liparu lyoye ngalikara mumatamangero kumeho yenu; ngamukara nautjirwe mwi na matiku ntani kapi ngamukara ushili mumaparu ghenu naghantje. ⁶⁷ Kungurangura ngamughamba ashi, 'Ndi linakara ngurova!' ntani kungurova ngamughamba ashi, 'Ndi linakara ngurangura!' Mukonda ya utjirwe mudimutjima denu na vininke evi ngamukenga na mantjo ghenu. ⁶⁸ Hompa ngamutwara nka shimpe mu Egipute na vikepa, mundjira oyo namutantilire, 'Kapi ngamumona Egipute nka.' Oko nko ngamukakughulita naumwenu ku vanankore venu yira vapika va vakamali na vakafumu, mukondashi kwato ogho ngamughuro.