¹ Kapi ngamukengerera Hove ndi ndjwi dava Israel ngadikombane nakuvanda kwenu; ngauva vyute kwendi. ² Ntjene va Israel vaunyoye kapishi pepi nove,ndi kapi wavayiva, makura ngaukayite shikorama mumundi ghoye, ngashiya kare nove dogoro ngashivareke kushishana, ntani ngaushimuvyutira. ³ Ngoli nka ngauruwana kushidongi shendi; ngauviruwane nka kumarwakani ghendi; ngauviruwanenka shimpe kovyo vyakombano kuva Israel vaunyoye, kehe vino akombanita novyo awana; kapi ngauhorame. ⁴ Kapi ngaukengerere vidongi ndi hove dava Israel vaunyoye ngaviwere mushitaura ndi ngauvande kwavo; ngaumuvatere mukumudamunitako. ⁵ Mukadi kapi ngdwate vyuma ovyo vyawapero murume, ndipo murume kapi vyawapera kudwata vyuma vyavakadi; kwakehe uno ngaviruwano vino ngayita shitetu kwa Hompa Karunga wenu. ⁶ Ntjene shitunguru shashidira ngavishorokeshi shina kara kumeho yoye mushitaura, kukehe shitondo ndi palivhu, navidira vyavididi ndi mauta mo, ntani vawina vanashungiri pavanuke ndi pamauta, kapi ngaughupe nyokwavo kumwe navana vendi. ⁷ Ngaushuvilire nyokwavo ngayende, mara vana vendi ngauvashimbe. Kwama muragho mposhi ngavikuyende nawa, mposhi mayuva ghoye ngagha yingipe. ⁸ Opo wadikanga ndjugho yayipe, kuturangako mukindiro kuvipereki mposhi kapi ngauyitepo kushoshoma kundjugho yoye mpili kehe uno ngaweko. ⁹ Kapi ngaukune shipata shoye nambuto mbiri, mposhi muyangu nauntje kapi ngautundamo mulivango lyakupongoka, ntanga yo ngaukuna ntani narukokotwa mushipata. ¹⁰ Kapishi ngaupurure na hove ndi shidongi kumwe tupu. ¹¹ Kapishi ngaudwate vyuma vya kufabirika vya huki dashindjwi ndi vyashipapa kumwe. ¹² Ngauruwane naumoye nderera kumakovhu mane naghantje gha mudwato ghoye wapantunda. ¹³ Ndi murume kughupa mukadi, akarare naye, ntani nka ngamunyenga, ¹⁴ makura ngamurundire mukadi vininke vyakushwaukita nganyatikite mukadi, ngaghambe ashi, Namughupire ghu mukadi, mara opo nakara naye pepi, nawana ushiri shimpe mwanuke.' ¹⁵ Makura vashe navawina vogho mukadona ngavaghupa ushiri wendi ashi shimpe mwanuke kuvakondi vamushitata nashintje. ¹⁶ Vashe vamukadona ngavaghamba kuvakondi, namupire monande ogho murume ashi mukadendi, mbyo amunyengire. ¹⁷ Kengenu ana murundiri ana mushwaukita aghamba ashi, '' Kpi navimonine kwamonoye wamukadona ashi shimpe mwanuke. Mara pano ushiri wa monande wamukadona shimpe mwanuke.' Makura ngava yuvite mbudi ya marwakani kuvakondi vamushitata. ¹⁸ Vakondi vamushitata osho ngavamughupe ogho murume ngava kamutengeke; ¹⁹ ntani ngavakamupe ndjo yakutika kulifere limwe ntjako ya siliveri, ngavamutape kwaVashe vagho mukadona, mora ogho murume aruwana viruwana vyavidona kwa mwanuke wa Israel. Ndje ngakaro mukadendi; kapi ngamutume kwapeke mwakehe mayuva ghendi. ²⁰ Mara ntjene vino vininke ushiri, ashi ogho mukadona kapishi shimpe mwanuke, ²¹ makura ngava kamushimbe ogho mukadona palivero lyandjugho yavashe, makura varume vamo mushitata ngava mutoghone mawe dogoro ngafe, mukonda aruwana lipuko lya linene kuva Israel, amonekita rushonda; makura ngaghuupamo mpepo dona mukatji kenu. ²² Ntjene murume ngavawana anarara namukadi ogho akwaro murume wape, navantje vanahepa kufa, ogho murume araliro nogho murume kumwe nogho mukadi mwene; ntani ngamuvaghupemo mukatjikenu. ²³ Ntjene ogho mukadona vamuvandekera kwagho murume, makura murume umwe ngamuwane mushitata makura varare kumwe, ²⁴ vaupenu navantje vavili, ngamuvadipaghe namawe dogoro ngavafe. Mukadi ngafere morwa mukudira kulira, mpili ngoli akalire mushitata murume ngafera, mukonda kashwaukita mukadi wamaparambo ghendi, ntani ngaughupamo mpepodona mukatji kenu. ²⁵ Mara murume ntjene ngawane mukadi ogho vavandekera muvishwa, makura amukwatere munkondo arare naye, ndjegho murume tupu ndje wakudipagha. ²⁶ Mara kwamukadi kwato vyakuruwanako; pato ndjo yakuvhura kufera mukadi. Pavino kuna kara tupu yira murume anahomokero vamaparambo akavadipaghe. ²⁷ Konda kuna wana mukadi wakuvandekera muvishwa mbyo analili, makura kwato ogho anamuvatero. ²⁸ Ntjene murume awane mukadona ogho vavandekere, arare naye kunkondo vaviyuve, ²⁹ murume ogho kufuta 50 vimaliva vya siliveri kuvashe vagho mukadona makura ngakare vyendi, mukonda amushwaukita mukadi. Kapi ngamutjida mumayuva ogho ngavakara kumwe. ³⁰ Murume narumweshi ngaupe mukadi vaashe ashi ngakare mukadendi; kapishi ngaupe nkwara davashe ngadishwaukite.