¹ Mpo ngoli ashi muna hepa kuhora Hompa Karunga wenu na kuyuvha mapukururo ghendi, ntangwaveta dendi, marawiro ghendi, na dimuragho dendi. ² Nongononenu ashi ame kapi nakughamba ku vana venu, ovo vadiro kuyiva ndi kumona kashitiko atapanga Hompa Karunga, unene wendi, unankondo wendi, ndi uwonyonoki wa lighoko lyendi, ³ vitetu na viruwana evi aruwanine mukatji kashirongo sha Egipute kwa Farawo, Hompa wa Egipute, nalivhu lyendi nalintje. ⁴ Ano nka kapi vamonine evi arughanine kuvakavita va Egipute, kunkambe davo, ndi kutukarukara twavo twa vita, omo arenkire mema gha lifura lya ligeha livaminite opo vamushupilire, nomo avadjonawire Hompa dogoro na namuntji lino, ⁵ ndi mauwa ogho amuruwanine mu mburundu dogoro muye kuno kukulivango lino. ⁶ Kapi vamonine ovyo arughanine Hompa kwa Dathana na Abiram, vana va Eliyabi, va vakafumu lira lya Rubeni, omo lya gaunukire livhu na kuvamina, kumwe na mapata ghavo, tende davo, navimuna vyavo navintje ovyo vya vakwamino mukatji ka Israeli. ⁷ Ngoli mwa vikumoninine na mantjo ghenu viruwana vya vinene ovyo aruwanine Hompa. ⁸ Mpo ngoli shi tikitenumo dimuragho nadintje nakumurawira lya namuntji, ngamukare na nkondo, nakuyenda mukaghupe shirongo osho ngamukaunga, ⁹ ntani ngamukara shirugho sha shire mushirongo shino atumbwidira Hompa vasha venu na ruvharo rwavo, shirongo sha kupupa mashini na ushi wa mpuka. ¹⁰ Mbyevi shi shirongo osho muna horo kughupa, kapi sha fana yira Egipute, oko munakutunda, oko kamukunanga mbuto na kuditekera na mpadi denu, yira shikunino sha vishwa; ¹¹ Ene ngoli shirongo, osho muna kuyenda mukaghupe, shirongo sha ndundu na dimuramba, ntani shirongo shino kunwa mema gha mvhura gha kutunda kuliwiru, ¹² shirongo osho apakeranga Hompa Karunga mbili; mantjo gha Hompa Karunga kehe pano pasho gha kara, kuvareka kuntundiliro ya mwaka dogoro nange kuuhura wagho. ¹³ Ngavishoroka, nange shi ngamutegherera nawa kudimuragho dande odo nakumurawira namuntji, ashi muhore Hompa Karunga wenu na kumuruwanena na dimutjima denu nadintje na mwenyo denu nadintje. ¹⁴ Ame nganituma mvhura mushirongo shenu pa shirugho shayo, mvhura ya muntango neyi ya kuhulilira, mposhi ngamuyangure ndya, vinyi yenu yayipe ntani na maghadi ghenu. ¹⁵ Nganimupa mushoni a ngombe denu mumafuva ghenu, nakulya mukute. ¹⁶ Vangarenu mposhi dimutjima denu di dire kupuka, mupirukire kwa peke mutongamene na kunyongamena vakarunga peke; ¹⁷ mposhi Hompa kapishi ngamugarapere; ntani mposhi ngadire kughara liwiru mvhura yidire kuroka; waro nka livhu ngalidire kutapa muyangu, makura ndi ngamufa wangu mushirongo sha shiwa osho a namupa Hompa. ¹⁸ Mpo ngoli shi turenu dino nkango dande mu dimutjima na mumwenyo denu, dikumangererenu pa maghoko ghenu dikare shiyivito, mudirenke dikare ndo vipititiro mukatji ka mantjo ghenu. ¹⁹ Ngamudishonge vana venu na kudivatantera pa kukara mu mundi, pakuyenda mundjira, pakurara ntani na pakurambuka. ²⁰ Ngamuditjange pa mavero gha ngundi da ndjugho denu ntani na pamavero gha nkurumbara, ²¹ mposhi mayuva ghenu na mayuva gha vana venu ngaghakuwederere mushirongo osho atumbwidira Hompa vakurona venu ngamutunge mo shirugho osho liwiru kuliwiru lya livhu. ²² Nange shi mukwame dimuragho nadintje dino nakumurawira, nakuditura mushiruwana, ashi muhore Hompa Karunga wenu, muyende mundjira denu ntani nakukakatera kukwendi, ²³ makura Hompa ngatjida mo dimuhoko nadintje kumeho yenu, anwe ngamughupa shirongo shino sha dimuhoko da nkondo da kupitakana denu. ²⁴ Kehe livango ngadilya mpadi denu ngalikara lyenu; kutundilira kumburundu dogoro kushirongo sha Lebononi, kutundilira kumukuro, wa lidina lya Eufrata, dogoro kuutokero wa lifuta nko kumurudi. ²⁵ Kwato umwe ogho ngavhuro kumukondera. Hompa Karunga wenu nga renka vantu vamutjire mushirongo nashintje osho munakuyenda, yira momo avimutumbwidira. ²⁶ Kengenu, namuntji naturapo litungiko na lifingo kumeho yenu: ²⁷ Litungiko, nange mulimurukwa kudiragho da Hompa Karunga odi nakumurawira namuntji, ²⁸ ano lifingo, nange mudira kulimburukwa kudimuragho da Hompa Karunga wenu, nakurwanita evi nakumurawira namuntji, mukwame vakarunga navo peke ovo mwadira kuyiva. ²⁹ Ngavishoka, apa Hompa Karunga ngamuyita mushirongo osho ngamukatunga, ngamukature litungiko pa ndundu ya Gerizimu, ano lifano pa ndundu ya Ebali. ³⁰ Nani kapishi kwakara musheli munya ya mukuro wa Jorodani, kuutokero wa kundjira ya kuutokero, mushirongo sha vaKanani ovo vatungo mu Araba, ruhambindakano na livango lya Giligali, lyakukundamo navitondo vya kupongoka vyamu More? ³¹ Makura anwe munakona kuruta ngoli mukuro wa Jorodani nakukaghupa shirongo osho anakumupa Hompa Karunga wenu, mukatunge mo. ³² Amwe munakona ngoli kulimburukwa kuntjangwa veta na marawiro ogho naturapo namuntji kumeho yenu.