¹ بعد هذا كشف يسوع نفسه للتلاميذ مرة ثانية يم شط بحيرة طبرية. وكشف نفسه هيج: ² اجتمع سمعان بطرس وتوما، المعروف بالتوأمن ونثنائيل، وهو من قانا بمنطقة الجليل، وأولاد زبدي، وتلميذين بعد. ³ فكاللهم سمعان بطرس: <<آني رايح للصيد!>> فكالوا: <<وإحنه همين نروح وياك>>. فراحوا وركبوا البلم. بس ما صادوا شي بذيج الليلة. ⁴ ومن طلع الفجر، وكف يسوع عل شط، بس التلاميذ ما عرفوا أنه هو يسوع. ⁵ فسألهم يسوع: <<يا شباب، عدكم سمج؟>> جاوبوه: <<لا!>> ⁶ فكاللهم: <<ذبوا الشبجة على يمين البلم، تلكون!>> فذبوها، وبعد ما دا يكدرون يسحبوها من كثر ما بيها من سمج! ⁷ فكال التلميذ إللي كان يسوع يحبه، لبطرس: <<هو الرب!>> وكان بطرس مصلخ، فمن سمع إنه ذاك هو الرب، إتستر بملابسه، وذب نفسه بالماي سابح. ⁸ وإجه باقي التلاميذ بالبلم وهمه يجرّون شبجة السمج، لأنه ما كانوا بعيدين عن الشط إلا حوالي ميتين ذراع. ⁹ فمن نزلوا للشط، شافوا هناك جمر وسمج محطوط عليه، وخبز. ¹⁰ فكاللهم يسوع: <<جيبوا من السمج إللي صدتوه هسة!>> ¹¹ فصعد سمعان بطرس للبلم وجاب الشبجة للبر، فطلع بيها مية وتلاثة وخمسين سمجة من السمج الجبير، ووية هاي الكثرة ما إنشكت الشبجة. ¹² وكال يسوع للتلاميذ: <<تعالوا أكلوا>>. ومحد إتجرأ من التلاميذ أن يسأله: منو إنته؟ لأنهم عرفوه هو الرب. ¹³ بعدين إتقدم يسوع وأخذ الخبز وناولهم، وهمين السمج. ¹⁴ هاي هيه المرة الثالثة إللي أظهر بيها يسوع نفسه لتلاميذه بعدما كام من الاموات. ¹⁵ وبعدما أكلوا سأل يسوع سمعان بطرس: <<يا سمعان إبن يونا، إتحبني أكثر من ما يحبوني هذولة؟>> فجاوبه << اي يا رب، إنته تعرف آني أحبك!>> فكاله: << أكّل خرفاني!>> ¹⁶ سأله مرة ثانية: <<يا سمعان إبن يونا، إتحبني؟>> فجاوبه: << إي يا رب. إنته تعرف آني أحبك!>> كاله: << إرعى خرفاني>> ¹⁷ فسأله مرة ثالثة: <<يا سمعان ابن يونا إتحبني؟>> فحزن بطرس لأن يسوع كاله للمرة الثالثة: <<إتحبني>>. وكاله: <<يا رب، إنته تعرف كل شي. إنته تعرف آني أحبك!>> فكاله يسوع: <<أكّلهم لخرفاني! ¹⁸ الصدك الصدك أكولك: إنه من كنت شاب كنت تربط حزامك على خصرك وتروح وين ماتريد. بس من تصير شايب فإنت تمد ايدك، وواحد ثاني يربط حزامك ويوديك المكان إللي ما تريده!>> ¹⁹ وكال إله يسوع هذا إشارة للموته إللي راح يموتها بطرس فيمّجد بيهه الله. ومن كاله هيج، كاله: <<إمشي وراية>>. ²⁰ وباوع بطرس وراه، وشاف التلميذ إللي كان يسوع يحبه يمشي وراهم، وهو التلميذ إللي مال على صدر يسوع بوكت العشه وكاله: <<يا سيد، منو هو إللي راح يخونك؟>> ²¹ فمن شافه بطرس سأل يسوع: <<يا رب وهذا، شنو مصيره؟>> ²² جاوبه يسوع: <<لو ردت يبقى الى أن ارجع، شعليك؟ امشي وراية إنته!>> ²³ فانتشر خبر بين الأخوة إنه ذاك التلميذ ما يموت. بس يسوع ما كال لبطرس: <<هو ماراح يموت!>> بس كال: <<لو ردت أن يبقى الى أن أرجع، شعليك؟>> ²⁴ هذا التلميذ هو اللي يشهد بهاي الأمور، و هو كتبها إهنا. و احنه نعرف إنه شهادته حق. ²⁵ وبعد أكو أمور هواية سواها يسوع، لو كانت انكتبت وحدة وحدة، كان العالم ما يكفي كل الكتب اللي انكتبت!