¹ وباليوم الأول من الأسبوع، غبّشت مريم المجدلية لقبر يسوع، والظلام مخّيم، فشافت الحجر إنرفع عن باب القبر. ² فسرعت وجتي لسمعان بطرس والتلميذ الثاني إللي كان يسوع يحبه وكالتلهم: << أخذوا الرب من القبر، وما ندري وين خلوه!>> ³ فطلع بطرس والتلميذ الثاني وراحوا للقبر. ⁴ وكانوا يركضون سوية، بس التلميذ الثاني سبق بطرس فوصل للقبر قبله، ⁵ وانحنى فشاف الأكفان مشمورة عل أرض، بس ما دخل. ⁶ وبعدين وصل سمعان بطرس بأثره للقبر ودخل، فشاف همين الأكفان مشمورة عل أرض. ⁷ والمنديل إللي كان على راس يسوع لكاه ملفوف وحده بمكان منفصل عن الأكفان. ⁸ بعد هذا دخل التلميذ الآخر، إللي كان وصل للقبر أولاً، وشاف فآمن. ⁹ فالتلاميذ ما كانوا حتى هذا الوكت فاهمين إنه الكتاب إتنبأ بأنه لابد أن يكوم من بين الأموات. ¹⁰ بعدين رجع التلميذين لبيوتهم. ¹¹ بس مريم ظلت واكفة بره تبجي يم القبر. ومن هيه دا تبجي، انحنت للقبر. ¹² فشافت ملاكين بهدوم بيض، كاعدين وين ما كان جثمان يسوع محطوط، واحد يم الراس والثاني يم الرجلين. ¹³ فسألوها: << يا مره، ليش تبجين؟>> جاوبت: <<أخذوا سيّدي، وما أدري وين خلوه>>. ¹⁴ كالت هذا والتفتت وراها، فشافت يسوع واكف، بس ما عرفت إنه هو يسوع. ¹⁵ فسألها: <<يا مره، ليش تبجين؟ على منو تدورين؟>> فعبالها هذا البستاني، فكالتله: <<يا سيد، إذا كنت إنته اخذته كولي وين خليته حتى أخذه>>. ¹⁶ فصاحهه يسوع: <<يا مريم!>> فاندارت وصاحت بالعبرية: <<ربوني>>، يعني: يا معلّم. ¹⁷ فكاللها: <<لا تلزميني! لأنه بعدني ما صعدت يم الآب، بس روحي لأخوتي وكوليلهم: آني راح أصعد يم أبوية وأبوكم، وإلهي وإلهكم!>> ¹⁸ فرجعت مريم المجدلية وبشّرت التلاميذ كايلة: <<آني شفت الرب!>> وكالتلهم باللي كاله إلها. ¹⁹ ومن إجه ليل ذاك اليوم، وهو اليوم الأول من الأسبوع، كانوا التلاميذ مجتمعين إبيت سدوا أبوابه خوفاً من اليهود، وإذا يسوع يجي بوسطهم كايل: << سلام إلكم!>> ²⁰ ومن كال هذا، شوفّهم أيديه وجنبه، ففرحوا التلاميذ من شافوا الرب. ²¹ فكاللهم يسوع: <<سلام إلكم. مثل ما الآب دزني، أدزكم آني>>. ²² كال هذا ونفخ بيهم وكاللهم: <<إقبلوا الروح القدس. ²³ إللي تغفرون خطاياهم إنغفرت إلهم، وإللي تلزمون خطاياهم، تنلزم!>> ²⁴ بس توما، واحد من التلاميذ الاثنعش، وهو المعروف بالتوأم، ما كان وية التلاميذ، من إجه يسوع. ²⁵ فكالوله التلاميذ الموجودين: <<إحنه شفنه الرب!>> فجاوب: << إذا كنت ما أشوف أثر المسامير بإيديه، وأخلي أصبعي بمكان المسامير، وأخلي إيدي بجنبه، ما أؤمن!>> ²⁶ وبعد ثمنتيام، من كانوا مجتمعين مرة ثانية جوه بالبيت وتوما وياهم، إجه يسوع والأبواب مسدودة، ووكف بالوسط وكال: <<سلام إلكم!>> ²⁷ وبعدين كال لتوما: << جيب اصبعك إهنا، وشوف إيدي، وجيب إيدك وخليها بجنبي. ولا تكون غير مؤمن بس كون مؤمن!>> ²⁸ فصاح توما: <<ربّي وإلهي>>. ²⁹ فكاله يسوع: <<لأنه شفتني آمنت؟ هنيالهم للي يؤمنون بدون ما يشوفون.>> ³⁰ و سوه يسوع كدام تلاميذه معجزات ثانية هواية ما انكتبت بالكتاب. ³¹ بس هاي المعجزات انكتبت حتى تؤمنون بأنه يسوع هو المسيح ابن الله، وحتى تصير عدكم حياة باسمه من تؤمنون.