¹ بعدما كمل يسوع صلاته هذي، طلع وية تلاميذه وعبروا وادي قدرون. وكان هناك بستان، فدخله هو وتلاميذه. ² وكان يهوذا إللي خانه يعرف ذاك المكان لأن يسوع كان يجتمع بيه هواية وية تلاميذه. ³ فراح يهوذا هناك ماخذ وياه فرقة من الجنود وحرس الهيكل، إللي دزوهم رؤساء الكهنة والفريسيين، وهمه يشيلون مشاعل ومصابيح وسلاح. ⁴ وكان يسوع يعرف كل إللي راح يصيرله، فراح باتجاهم وكال: <<منو تريدون؟>> ⁵ فجاوبوه: <<يسوع الناصري>>. فكاللهم: <<آني هو>>. وكان يهوذا إللي خانه واكف وياهم. ⁶ فمن كاللهم: <<آني هو>>، إتراجعوا ووكعوا عل أرض! ⁷ فرجع يسوع يسألهم: <<منو تريدون؟>> جاوبوه: <<يسوع الناصري>>. ⁸ فكال: <<كلتلكم: آني هو، فإذا تريدوني آني، عوفوا هذولة يروحون>>. ⁹ وهذا علمود تصير الكلمة إللي كالها: <<إللي إنطيتهم إلي ما هلك منهم أحد!>> ¹⁰ وكان يم سمعان بطرس سيف فطّلعه وضرب بيه عبد رئيس الكهنة، فكطع إذنه اليمنى. وكان إسم العبد ملخس. ¹¹ فكال يسوع لبطرس: <<رجّع السيف لمكانه! الكاس إللي إنطاني الآب، ما أشربها؟>> ¹² فالفرقة والقائد وحرس الهيكل لزموا يسوع وقيدوه. ¹³ وأخذوه أول شي لحنّان وهو حما قيافا رئيس الكهنة بذيج السنة. ¹⁴ وقيافا هو إللي إقترح عل يهود بإنه من الأحسن أن يموت رجل واحد فدى الأمة. ¹⁵ وتبع يسوع سمعان بطرس وتلميذ ثاني كان رئيس الكهنة يعرفه. فدخل ذاك التلميذ وية يسوع لدار رئيس الكهنة. ¹⁶ بس بطرس وكف بالباب بره. فطلع التلميذ الثاني إللي كان رئيس الكهنة يعرفه، وكلّم البوّابة فدخلوه لبطرس. ¹⁷ فسألت الخادمة البوّابة بطرس: <<مو إنته واحد من تلاميذ هذا الرجل؟>> جاوبها: <<لا، مو منهم!>> ¹⁸ وكان الجو بارد، وشعلوا العبيد والحراس نار ووكفوا يدّفون دايرها، فوكف بطرس يدّفى وياهم. ¹⁹ وسأل رئيس الكهنة يسوع عن تلاميذه، وعن تعليمه. ²⁰ فجاوبه يسوع: <<علني حجيت للعالم، ودائما علّمت بالمجمع والهيكل وين يجتمع اليهود كلهم، وما كلت شي بالسّر. ²¹ فليش تسألني آني؟ إسأل إللي سمعوا باللي حجيت بيه إلهم، همه يعرفون إللي كلته!>> ²² فمن كال يسوع هذا لطمه واحد من الحراس وكاله: <<هيج تجاوب رئيس الكهنة؟>> ²³ جاوبه يسوع: <<إذا حجيت شي غلط فاشهد عل غلط، بس اذا ماكو شي، ليش تضربني؟>> ²⁴ بعدين دزه حنّان مقيد لقيافا رئيس الكهنة. ²⁵ وكان بطرس واكف هناك يدّفى، فسألوه: <<إنته مو همين من تلاميذه؟>> فأنكر وكال: <<مو آني>>. ²⁶ فكال واحد من عبيد رئيس الكهنة، وهو نسيب العبد إللي كطع بطرس إذنه: <<مو شفتك وياه بالبستان؟>> ²⁷ فأنكر بطرس مرة بعد. وباللحظة صاح الديج! ²⁸ بعدين أخذوا يسوع من دار قيافا لقصر الحاكم الروماني، وكان هذا من أول الصبح. فاليهود ما دخلوا للقصر علمود لا يتنجسون وبعد ميكدرون ياكلون من خروف الفصح. ²⁹ فطلع بيلاطس إلهم وسألهم: <<بشنو تتهمون هذا الرجل؟>> ³⁰ جاوبوه: <<لو ما كان مذنب ما كنا سلمناه إلك!>> ³¹ فكال بيلاطس: <<إخذوه إنتوا وحاكموه حسب شريعتكم>>. فجاوبوه: <<ما يحق إلنه أنه نكتل أحد!>> ³² وصار هذا حتى تتم الكلمة إللي كالها يسوع إشارة للموته إللي راح يموتها. ³³ فدخل بيلاطس قصره وصاح يسوع وسأله: <<إنته ملك اليهود؟>> ³⁴ فرد يسوع: <<إتكولي هذا من عندك، لو كالوه إلك عني الناس؟>> ³⁵ فكال بيلاطس: <<ليش آني يهودي؟ شعبك ورؤساء الكهنة سلّموك إلي. شنو سويت؟>> ³⁶ جاوب يسوع: <<مملكتي مو من هذا العالم. ولو كانت مملكتي من هذا العالم، كان حرّاسي يجاهدون علمود ما أصير بيد اليهود. بس هسة مملكتي مو من إهنا>>. ³⁷ فسأله بيلاطس: <<ليش شنو إنته ملك؟>> جاوبه: <<إنته كلت، آني ملك. وعلمود هذا إنولدت وجيت لهذا العالم: حتى أشهد للحق، وكل إللي هو من الحق يسمع لصوتي>>. ³⁸ فكاله بيلاطس: <<شنو هو الحق!>> بعدين طلع لليهود وكال: <<آني ما دا أشوفه مذنب! ³⁹ وصارت العادة يمكم إنه أحررلكم واحد من المسجونين بعيد الفصح. منو تريدون أحررلكم ملك اليهود؟>> ⁴⁰ فصاحوا كلهم كايلين: <<لا تحرر هذا، حرر باراباس>>. وكان باراباس حرامي!