¹ Naa rama jiirewa ii kunu Masipu. Naa dlama papiya bai, kurrarram ga dlamǝn gara saida ga ii kunu Nənuwa Səku ke. ² gaɗa iyu naa dlǝmatu gəshi tlaparr naa dləra gəshi ke. ³ Aa dlaman gara nən da ndaami na barrka gaanai nda ɓəri naa iyu naa Masipu gaɗa yaaganaucin ga, wara nda ganai kə təka. ⁴ Waato akshi Israilaucin. Dlaɓə nakshi kutli Səku, na kərrmai gəri, na alkawarr, na aayaɗ (bari) shariya duumaya, na nakwana ii Səku, na gagzhin alkawarr mak kakshi. ⁵ Atərro Masipu vəreu ii kunu təka dari kakancin shi- A ci warra Səku kə tiike. Saksakta da dlaɓa kəri harr dəmmarro. Amin ⁶ Atərro gaɗa alkawarr Səku mbotə bai. Atərro mak ndawa waarra a kunu Isrraila akshi Isrrailaucin kə jiirrewa bai. ⁷ Kadugum Ibrrahim ke mak kutli gəri kə jiirrewa bai. Amman, "Nda ɗaura kadugum ci ke darik Ishaku." ⁸ Kaasən ke, kutli təka rro kutli Səku bai. Amman kutli alkawarr tənu kadugum nən akshi. ⁹ Atərro rama alkawarr nən sutku; "Wayak yaagənangu naa katayi, Sarratu ke aa 'yawu naa wən gara." ¹⁰ Su tuku rrugara bai amman aku Rrifkatu cam dlamu na madau dari nən ɗagai, afək wa Ishaku - ¹¹ atərro nda 'yawu mamu gu bai dəgo kurru akshi dlamu be bəlan ko gaɓshu ke bai, gaɗa be waarra Səku ancu dari cikəɗ da wakaci, gaɗa be mii nda dlamo bai, amman gaɗa baaci dlama ɗaura - ¹² nda rami tu ma, "Gazgarau aa dlama butkəna ii gədən gu." ¹³ Kalkal kakə mii da tarrna: "Na ntutu Yakubu, amman na ngubtu Esua." ¹⁴ To waa ramau ma tam? Səku aa buuka adalta bi? Ngalte aa dlama bai. ¹⁵ Atərro aci rami Musa, "Naa dlama kanjino ii nən waarra naa dlamawu kanjino, naa dlama mugurum ke ii nən waarra na dlamawu mugurum." ¹⁶ Kasən nən, kaane gaɗa bee mii nəngaiwa ancu bai, ko gaɗa ɗaawa aɗa gəri bai, amman gaɗa Səku, baci dlama kanjino. ¹⁷ Kakkadi rama Səku ramu ii Firra'una, "Gaɗa kasən na saksaktə ci, gaɗa na tatki garva ga ii aɗa ci, gaɗa nda yayaci dləgun ii kunu duniya mak." ¹⁸ Gaɗa sən, Səku aa dlama kanjino ii nən waarra aci ancu, nənwaarra aci ancu ke, aa ɗaawa na aci da dlaɓu baci gauɗak aɗa. ¹⁹ Kwaaye rama nai ke maya, "Gusku yaye aci aa maaka aipu gaɗa gəmo?" Aa dlama gamɗaya naa ntu gəri nən tai?" ²⁰ Amman nən, ci tai ka dlam gamɗaya naa Səku? Be waarra nda ləmu aa dəmu naa rame baci ci ləma gəri bi maa, "Ka dlamu iyu kasau gaɗa gəmo? ²¹ Ko ba ci ləma dawai a dəmu gu bai dangwi rəba zada gayi da ləmi dawai kə wana marrtapa, zam da ləmi dawai kə wana mii ga mbotak? ²² Aa dlama bai Səku, aci ancu da tatki shiitan gəri da ɗawu garva gəri da dlaɓə gazəgayak, da dlami kəmarr tlaparr naa ndaawa waarra shiitan gəri aaɗak shi waarra aa dərri mətu? ²³ Wate aci tatku gaawa saksakta gəri iiɗak ndawa waarra ba naa kanjino gəri nən wam, wato ndawa waarra waaci aci sapərrtə naa akshi gaɗa saksakta? ²⁴ Wate aci dlami wa kasau nən wam, waarra aci ɗauru cam, da gadava Yahudauci rrukahi bai, amman kapa da gadava ndaawa waarra zəga Səku bai cam? ²⁵ Kakə mi aci rami ii kakkadi Hosaya: "Ndaawa waarra akshi kanai bai na kaci naa akshi da dlaɓə nakshi kaanai, naa ntuta naa atu mii waaci aa ntuta ga bai. ²⁶ Aa dlaɓan gara rii waarra waaci nda ramikshi maa, 'kun ndaawa ga bai; nda ye daurak shi 'kutli Səku baaci arro." ²⁷ Nabi ishaya ngum suktə wura gəri iiɗak Isrraila da ramu maa, "Kutli Isrrailaucin gawa kakə aisawu miya anku yaye, dək na kasən aa bi ra nən rrap ɗagai da kunak shi." ²⁸ Atərro Səku aa dlama naa hagata gəri iiɗak duuniya mak go dlimit laktu." ²⁹ Kakə mii Nabi Ishaya ramu waci, "Daa Məgənyi baaci dəsku daive wa kadugum bai nən, daa waa dlama naawa kakə nda Sadoma, daa zam waa dlaɓu naawa kakə Gomarrata." ³⁰ Wate waa rama gəmo? Maa ndawa waarra Yahudaucin bai, waarra maakə adalta bai, da bi naa adalta, adalta da ri bari jiirrewa. ³¹ Amman Isrraila, warra makə duumaya kə adalta, akshi dəma biwu bai. ³² Gaɗa gəmo? Gaɗa akshi maku da dəvu jiirrewa bai, amman dari dlama wana laada. Akshi da kkəmu naa zəgər shi da dagamu nakshi iiɗa guguyak dagamu, ³³ Kakə mii nda tarrnu, "Aikina, naa təka dəba guguyak kə dagamu ii Sihiyona naa guguyak kə dlama aipu ke. Nən waarra bari diitu jiirrewa nən nadaa ye zhirwa gəri bai."