¹ Aku Yeso damuna rama tamke i ndawa mi a kərrəmta tənu, se da kacingəri kaparrnahum. ² I ɗagu na marəm askarrabu ɗgai mi na guzəɓ warra aci a ntutugu tlaparr. ³ Guzəɓgu nga bai harr a miya mutu. Marəm askarrabu kəma labarr Yeso tənu, se da wanyi gazgaraucin yahudaucin i rigəri, da jayaci da nai da ngaci gabayi gəru. ⁴ Akshi zade ri Yeso tənu, se akshi da jayaci wilaci da ramma, "Ai marəm askarrabu batadu ka dabi banaci, ⁵ gaɗa acu baci ntu larrdawa, harr ləmiija ri cacpa yahudaucin." ⁶ Se Yeso rakənyi na akshi i ɗagayi. Aci dengəri damtu wənduwau tənu, marəm askarrabu da wanyi mangaucingəri da ramici ma, "Məgənyi, ka ravəna aɗaci bai, gaɗa na bata bai ka təfai i wenduwa ganai. ⁷ Gaɗa kasən, na batawəmbai harr na nai i rici, amman a dlam rama jaɓ, gabayi gagu a ngatangəri. ⁸ Gaɗa iyu ke na ɗagai a dəskuga warra dolle na dlamici nakwana, ke na askarrabaucin a deɗaga. Na rami nənangu ma, 'Ajin,' se da yi, i dama ma, 'Ayan nin' se da nai, i gabayiga ke ma, 'Adlam kasau nin,' se da dlami." ⁹ Yeso kəma kasau tənu, se da japci warrau, se da məstai da məsci i ri algi warra a ɗəga gəru, da ramma, "Na ramekun, ko i kun Isrraila, ngalte naika zada iman kasau bai." ¹⁰ Lakwtu ndawa warra marəm askarrabu wanugu kalakteu i wənduwa tenu, se da tase gabayigu ngatungəri. ¹¹ Dakuk sen, na sekwakuya bai, se Yeso da yi ɗa ɗagai mi nda ɗaurau ma Nayin, pukurraucingəri na algi gawa a rakan i ɗagayi na aci. ¹² Aci zade damtu miya mavgi ɗagu tenu, se so nda meu guvu warrau ɗagai, mi acu gaitakgeri wən guduguM ɗagai, na ndawa gawa ke da kun ɗagu a ɗagayi na atu. ¹³ Məgənyi ikatu tənu, se gəshi gəri da niyingara na kanjəno gara, se da ramitu ma, "Ka ɗana bai." ¹⁴ Se aci da yi da lenci maɗanba ma guvugu, se nda kakar guvu darr'yi nakshi. Yeso da ramma, "Mpəndi, na ramici, atlu." ¹⁵ Se guvu da tli da ɓanji rama, se Yeso da bari na aci miwu. ¹⁶ Se kalau da jəb na ndau mak, akshi da jəb sakərrta Kakasəku, a ramau ma, "Nda tlatla na marəm nabi i wita wa," ke "Kakaseku shalu na ndagəri." ¹⁷ Ndiwa da jəb bari labarr bee mi Yeso dlamu təku i rawanke i larrdi Yahudiya na baka gara mak. ¹⁸ Pukurraucin Yahai baci baptisma da ramici labarr bayangu mak. ¹⁹ Se Yahaigu da ɗauri pukurraucingəri shirin da wanyakshi i ri Məgenyi Yeso da ramici ma. "Ci ne nən warra aye ni tənu, ko ja launyi ɗagi dama? ²⁰ Ndau da yi ri Yeso da ramma, "Yahai baci baptisma wane ja, ja jayi ci ko ci ne warra mi aye ni, ko ja maki agai dama?" ²¹ I kun lakwtu, Yeso ngatu ndawa gawa da dagas na fərarin na gaɓshu zuwawin, dluguyayi gawa cam ba lawan na dakshi. ²² Se Yeso da ngumi da ramikshi ma, "Kwa zada nakun nin, a rama i Yahai bee warra kwaikau na warra kwa kəmau, Dluguyayin a təka bi lawan, ɗukdadin ke a rakan, agurrdadimamin a təka bi cəlta, dakuyayin ke a təka kəmu rama, ndawa mi mutu ke a təka tlayi na arro, nda wazək labarr herr ke i ndak tluwa. ²³ Barka i nən warra bəzu dlama nai iman bai gaɗa wana warra na dlamau." ²⁴ Aku ndawa warra Yahai wanau gu jinakshi tənu, se Yeso da ɓanji rama i algagin gu iɗa Yahai ma, "Tam kwa ji lanau i kun fanfariya pata? Azəm, warra zuwak a rəɓgu? ²⁵ Amman kwa ju gaɗa lawan gəmo? Nən baci ta'yi kacum bəlan sarral? Aiki, ndawa mi a ta'yi bəlan kacum, warra a kunbəmtu ke, rro a ngwapate dgamcin. ²⁶ To kwa ji lawan gəmo? Nabi? Auwo, na ramekun, ɗəka na nabi. ²⁷ Yahai aci ne mi nabaucin dlam tarran i ɗagəri tin kaɗe ma, "Aikina, naye wanyi sakwtuga i kəma ci, warra a sapərrateci dəvu i kəmaci. ²⁸ Jirre na ramekun, i kun ndawa mi 'yawakshin amatin mak, go-nən warra ɗəka Yahai baci baptisma. Dək na kasən, aci warra gambotak i garva Seku ɗəka na aci. ²⁹ Sarrtu ndawa warra yahai dlamikshi batisma mak , harr na ndak gən arrajo cam, kəma kasən tənu ,se da ramma, lalle Səku baci adalta. ³⁰ Amman parrisaucin na malamcin dumaya kurna dlama bee warra Kakasəku ancakshi da dlami, gaɗa akshi kurna baptismak Yahai. ³¹ "To na tam na kaktla ndak zaman tuku na atu? Akshi dlam gənawa na tam? ³² Akshi a gənawa na mamau mi a kawa a miya aṣək, warra a rama na gatukshi a ramau ma, 'Ja fiyi kun shila , kwa dlam səwari bai. Ja dlam aɗan mutu, amman kwa ɗanu na ja bai.' ³³ To yahai baci baptisma deu ata burodi bai, a sa aam inabi bai, kwa ramau ma, 'Acu na zuwkak.' ³⁴ Wəngənən deu a tau na sau, se kwa jəb ramau ma, 'Aiki, acu baci mbamba na kuyo, manga ndak gən arrajo na ndak aipapin.' ³⁵ Amman asəm Səku tatkəna aɗagara kalkal da ri kutligara. ³⁶ Gafo ɗagai nən parrise ɗagai da ɗaure Yeso i wənduwagəri da ci masana na aci. Yeso təfu tənu, se da mbashi ri ta masanau. ³⁷ Na ama ɗagai mi aipu tlaparr i kun ɗagu. Amau kəma ma Yeso a ri ta masana i kun wənduwa nən parrisegu tənu, se da nai na kwalɓa atərrshan mi na dagwda tlaparr. ³⁸ Atu rriɗi aku gəri i gəre zəgər gəri a ɗanau tənu, se da ɓanji rridla zəgər gəri na sauraigara, a saspau na yaɗ aɗagara, da mpi miyagara i aɗa zəgəru, da jəb zuwa atərrshangu i zəgərgu. ³⁹ Nən parrise warra ɗaure Yesogu ika kasau tənu, se da rami gəṣḥɩgəri ma, "Nənangu nabi nən, daa a zəgi na tai na zada amau tawan a ləntagəri gu; mi aipu." ⁴⁰ Se Yeso da ngumici ma, "Simon , iyu na bee na rameci." Aci da ramma, "A rami, maləm!" ⁴¹ Se Yeso da ramma, "Na nən shirin warra ma basa da ri ləman ɗagai. Warrau gayi ma dinarr danamak vaɗ, gayi ma dinarr gumu vaɗ. ⁴² Akshi dəma ngumu gu bai tənu, se warrau da tupti dikshi mak. I kunakshi, tai a rəmudii tatka ntau i baci ləmangu? ⁴³ Simon da ngumici da ramma, "I tuman ganai, nən mi da tuptici gawau." Yeso da ramici ma, "Ka ramdu kalkal." ⁴⁴ Yeso da launyi amau, da rami Simon ma, "Kaika amangu, na təfe kunu wənduwaci, ko am vəya zəgər ka bara bai. Amman atu vəyu da zəgərga na saurai gara da sau'yi da na yaɗgara. ⁴⁵ Ka dlama zada lale kə ntu bai, amman tin təfayi ga i ritku, atu bəzu mpi miya gara i ɗa zəgərga bai. ⁴⁶ Ka paa mərak i aɗaga bai, amman atu pa atərrshan i zəgərga. ⁴⁷ Gaɗa kasən na rameci, dək na aipapin gara gawa warra atu dlamu, nda tuptu ditu; gaɗa atu tatku gawa ntau. Amman nən mi nda tuptici rrap, tatku ntu rrap." ⁴⁸ Se Yeso da ramitu ma, "Nda tuptu dikəm aipapin kəm." ⁴⁹ Ndau warra a ri ta masana na aci da ɓanji ramau i gatukshi ma, "Sutku warrau tawan harr ma a tuptaaipu, ka aci Kakasəku? ⁵⁰ Se Yeso da rami amau ma, "Iman kəm ra na kəm, aji kun salam."