¹ Da kuk sən, na sukwkuya bai se Yeso na muwanaucin geri da ɓanji rakan a vayak ɗa marəmamin na ɗa patatin a kagala na wazək labarr herr game na garva Səku. ² Na amatin ɗagai gawa, warra nda dekshi gaɓshu zuwawin na warra nda ngatakshi da fərarin dama-dama; Marryamu mi nda ɗaurau Magdaliya, mi Yeso detu zuwawin gatkasa, ³ na Yuwanna ama Kuza baci shala wənduwa Hirridus, na Suzana, na amatin jəgab gawa warra dlamikshi bana na bik amikshi. ⁴ Sartu mi algi gawa a təka cacpayi, ndawa ke təka ni i ri gəri ɗa dama-dama tənu, se Yeso da dlam rama i kun gagənawa ma, ⁵ "Baci zəgəm ɗagai ju i zəgəm zadak gəri. Aca kun zəgəm tənu, zadak gu jəgab, da pi baka dəvu, ndawa da tak'yidu na zəgər, se ɗutatin da cidu mak. ⁶ Jəgab da pi aɗa guguyak, zadak gu vəraeu tənu, da rawi, amman da wu'yingara, gaɗa na nasawa bai. ⁷ Gafkai ke vəgi kun jəjim, da rawi ɗagayi na jəjimgu da zhibinakshi. Amman ⁸ zadakgu gafkai da pi ɗa gagi bəlan da rawi bəlan da bari ɗi tlaparr nakkadabai." Daku Yeso damu na rama bayangu tənu, se da ramma, "Nən warra na aguɗ kəmu rama nin, da kəma." ⁹ Pukurraucingəri da jayaci da parrakcikshi rama na gagənawa warra aci dlamikshi gu. ¹⁰ Se aci da ramikshi ma, "Kun nda bardikun zəgaya ashərr garva Seku, amman i ndau jəgab, na rama i kun gagənawa, gaɗa, 'ko akshi ikau, a launau bai, ko akshi kəmau, a sanutau bai.' ¹¹ To so bee mi rama kun gagənawau tatku; ayawa zadakgu təlam Səku. ¹² Warra pe ɗak dəvugu, tatku ndawa mi kəma təlam Səku, amman ləspər danai da gumbuna na təlamgu da kun gəshakshi, gaɗa akshi da kasakta na təlamgu ba da bi ra. ¹³ Zadak mi pe aɗa guguyak tənu tatku ndawa mi kəma təlangu tin se da kasakci nakshi na atu na kuno. Amman akshu dlam awayau bai i kun kasaktakshu, lakwtu akshi kema kabine tin, se da kaci nakshida kau. ¹⁴ Zadak warra pe kun jəjimgu, a tataka ndawa mi kəma təlamgu da gən na ramau, amman ruwawaɗ na ləman na bəmtu kə duniya da zhibinakshi, halshi rawa bai i kun ɗəga təlamgu. ¹⁵ Amman zadak mi pe aɗa gagai warra bəlan tənuu,akshi ne ndiwa mi kəma ṭəlam gu, da gənyi na jirrewa na gəshi gaitak, a ɗəgau ke a wana na atu na kanadi, harr a parya a bari kutlai tlaparr nakkadabai. ¹⁶ Ngalte, go nən mi a ɓidla pətəle da cimdu na fəna ko da mpidi shi rakai, se dai da mpidi dəsku bee ɗagai. Gaɗa tike ika riwu nin, a lawan na ɓidlau. ¹⁷ Atərro go bee mi da dəɓsa warra nda dəmu zəgiwu bai. ko bee mi a kun ashərr warra nda diwu i patata nda zəgi bai. ¹⁸ Gaɗa kasən, a kərəmtina na akal; Seku a ɗawa akshi warra dlam iman na jirrewa da dlam sanuta wam tlaparr, amman ndiwa mi dlam iman na zəgi jirrewa bai tənu, zəgaya rrap mi akshi a tumangu akshi na atu gum, Seku a ɗawau nda gubudu. ¹⁹ Se mi Yeso na na yaganaucingəri da nai i rigəri, amman ba zaji i damtugəri bai gaɗa algi. ²⁰ Se nda ramici ma , " Mici na yaganaucinci darr'yi a vəda, anci lawanci. ²¹ Amman Yeso da ngumi da ramikshi ma, "Miga na yauganaucinga nin ndawa warra a kəmu ṭəlam Kakasəku a ɗəgau ke." ²² Gafo ɗagai wam se Yeso da gayi kun sawu am na pukuraucingəri, da ramikshi ma, "Arr'yi wa katirri baka anku da siwu. ²³ Akshi bandu rakan katarrgu tənu, se yuwan dami na Yeso. Na tasəna bai se so zuwak na awayau tlaparr da fuwe i ɗa anku, a wabat am i kun sawu amgu, ka a 'yamu nakshi, a kun hal kambeta. ²⁴ Se pukurraucin Yeso da nai i rigeri da tlatlaci, a ramau ma, "Baci martapa! baci martapa! Waye mutu nawa!" Se Yeso da tli da gərrnyi aɗa zuwak na am warra zuwakgu tlatttleu, se mak da kusamu nakshi. ²⁵ Se aci da ramikshi ma, "Imankun a rawan?" Se kalau da jəb na akshi, a japta bee mi wakatu, da jəb jaya i gatukshi ma, "Sutku zada nn tawan? Harr a gərin i ɗa zuwak na am, ke da dlamici nakwana." ²⁶ Akshi da ci kəma da zadai larrdi Garrasinaucin, mi a aku anku da Galili. ²⁷ Sarrtu Yeso a təka fuwayi da kun sawu amgu tənu, se so warrau ɗagai baci gaɓshu zuwak da kun marəm ɗagu da tase aci. Warrau sukwakuyingeri a rakan na shi gaɗau, ke a mbasu i wənduwa bai se i kun auɗaɗin dabak nda mutu. ²⁸ Warrau ika Yeso tin, se da dlam aɗan da gutki kəma Yeso, da sukci wura gəri tlaparr, da ramma, "Lambecin tam na iyu, Yeso, Wən Kakasəku Mulah? A marrci, ka ravvəravənayu bai." ²⁹ Gaɗa Yeso ramdi gaɓshu zuwakgu da vərengeri da ṭeka warrau. Gaɗa zuwakgu karrɓaci zəgər gawa zuwakgu a karɗagəri. Nda ɗawa wrrau i dəmbəl nda taushi na aci, nda jəb ankalta gəri amman dək na kasen, a gəji na bi tawas gəru, zuwakgu da dabi na aci kun fanfariya pata. ³⁰ Se Yeso da jayaci ma, "Dləgunci ma tam?" Acu da wurici ma, "Tlaparr," Gaɗa gaɓshu zuwawingu təfici gawa. ³¹ Ashi da jəb wiligəri aɗau-aɗau ma da jəmbəlakshi bai i kun vək mi go-dadəgəri. ³² Sarrtu na marəm biri aladadin ɗagai a dawa i ɗa sərrnəp zəgawu i damtu rəwu' Se gaɓshu zuwawingu da wili Yeso dabzakshi da təfi kun aladadingu, se dabzhi nakshi. ³³ Se gaɓshu zuwawingu da vərai da təka warrau da təfi nakshi kun aladadingu. Se bəru mak da fuwai da ɗa sərrnep zəgawu, da pinakshi i kun anku da 'yaminakshi. ³⁴ Makwtaucin aladadingu ika bee wakatu tənu, da vəri na rawa da yi kun ɗagu na larrdu bari labarrgu. ³⁵ Se ndiwa da vərai gaɗa lawan bee mi wakatugu. Ashi zade ri yeso da tase nən mi gaɓshu zuwawingu vəre da təka gəri, da mbasu i kema Yeso , na zanai i təkagəri, ke a kun ankalgəri tənu, se kalau da jəb na akshi. ³⁶ Ndawa mi ika lakwtu mi nda ngatu warrau tənu, se da jəb bari labarrgu i ndiwa. ³⁷ Se ndiwa mi a larrdi garrasinaucigu mak da rami Yeso ma da yingəri da ɗakshi, gaɗa kalau jébnakshi tlaparr. Se Yeso da téfi kun sawu amgu gaɗa da kaci nakkshi. ³⁸ Nən warra nda deci gaɓshu zuwawingu da wili Yeso ma dabzaci da yi na aci. Amman Yeso da ramici ma, ³⁹ "A kaci naci wənduwa, ka rami tamke mi Kakasəku dlamici." Warrau da yingəri, a kagala betawanke mi Yeso dlamici i rawanke i kun marəm ɗagu. ⁴⁰ Lakwtu Yeso kateu tənu, algu da ndəmaci na kuno, gaɗa akshi mak a zaga katayi gəri. ⁴¹ Se so nən ɗagai baci dləgun Yayirrus, gayi da kun ndawa gazgaraucin kə kun ləma ri cacpa yahudaucin, da nai da gutki i kəma Yeso , da wilaci ma da nai i wənduwagəri, ⁴² gaɗa wunyagəri gaitakgara, amangara guma ayawo shirin, aye mutungara. Sartu mi Yeso a ɗa dəvu nya i riwu tin, se algagin ndawa da cacpai i ɗagayi i bakagəri. ⁴³ Ikun algu ke na ama ɗagai warra təka pi dədəm harr kə aman guma ayawo shirin, ke təku na dagwdagara mak i ri likətatin, amman ba ngata bai da ri ko gayi da ri likətatingu. ⁴⁴ Atu da ni aku yeso da lənci miya armamagəri, na tasəna bai se payi dədəmgu da rr'yingara. ⁴⁵ Se Yeso da ramma, "Tai ləntayu?" Tike da dlam na gamɗaya ləntagəri tin, se Bitrrus da ramma, "Alangubrro, algagin ndawa rro mak vaikənaci, ke a zhibaci." ⁴⁶ Amman Yeso da ramma, "Dagai jaɓ ləntayu, gaɗa na kəma kərrmai vəru da təkaga." ⁴⁷ Amau ika asherrgara a vərangara tənu, se da nai da pi kufugara i kəma Yeso, təkara a jəganta. Se atu da rami i kəma tike, dalil warra atu ləntaci, na go-sukwkuya mi atu ngata. ⁴⁸ Yeso da ramitu ma, "Wunyaga, iman kəm ngatu na kəm. Aji bikəm i kun salam." ⁴⁹ Sartu Yeso a kun rama tənu, ɗagai da nai da wənduwa nəngazgara kun ləma ri cacpa yahudaucin, da rami warrau ma, "Ka ravəna maləmgu bai, wunyacu bakotəngara." ⁵⁰ Amman Yeso kəma kasau tin, se da wuri Yayirrus ma, "Ka kalwa bai, a bari jirrewa jaɓ, atu a ngatangara." ⁵¹ Yeso zade wənduwauYayirrus tin, da dapcina tike da təfi ɗagaayi na aci, se Bitrrus na Yahai na Yakub, na afək wunyau na miwu rukshi. ⁵² Lakwtu ndawa mi a kun wənduwa mak a kurwa a ɗanu wunyau, amman Yeso da ramikshi ma, "Kwa ɗana bai; atu mutu bai a yiwan." ⁵³ Amman akshi dadlamici gamas , na zəgaya ma atu mutungara. ⁵⁴ Yeso dayi ri wunyau da sukci amigara da dlam ɗara ma, "Wunya, tlu! ⁵⁵ Nənwa gara da katengara, na tasəna bai se atu da tli. Aci da ɗawakshi da makitu bee da ci. ⁵⁶ Ma'yawawin gara da dlam ajap, amman yesogu daramikshi ma kwa rame nən waambai be warra wakatu.