¹ Mwe batemwikwa, uyu nomba ekalata wa cibili uyo nembele mwebo, na muli yonse yabili fibukisho fya kwibulula imitima yenu iyabufuma cumi. ² Pakwebati mukebukishe ifyebo ifyalandilwe akale kuli bakasesema bamushilo ne funde lyakwa Shikulwifwe kabili Umupusushi ilyapelwe ukupitila mu batumwa benu. ³ Icantanshi ishiba ici ukutila abakupumya bakoisa mu nshiku shakulekelesha. Bakapumya no kutwalilila ukulingana no bufwayo bwabo. ⁴ Bakalanda ati, " Ukulaya kwa kubwela kwakwe kuli pii? ukufuma ulo bashifwe balele mutulo, ifinfu fyonse fyalibafye fimo fine, ukufuma kukutampa kwa bubumbo." ⁵ Balalabo mumbo ati kukale ku cebo cakwa Lesa imyulu ne sonde fyalishile kubako ukufuma mu menshi no kupitila mu menshi, ⁶ umo icalo pali ilya nshita ca lyonawilwe, mu kubundwa na menshi. ⁷ Ku cebo cimo cine imyulu ne sonde fyalisungilwa ku mulilo, fyalisungilwa ubushiku bwa bupingushi no konaulwa kwa bantu abataishiba Lesa. ⁸ Taufwile ukukana ishiba ici, we mutemwikwa, ukwebati ubushiku bumo kuli Lesa bulilingene ne myaka ikana limo, ne myaka ikana limo ili kubati bushiku bumo. ⁹ Lesa talafya lafya ukukonka ifyakulaya fyakwe, kubati fintu bamo bamona ati efyo ukulafya lafya kwaba. Lelo alitekanya kuli mwebo. Takofwaya nangula umo muli ba mwebo ukonaika, Lelo kuli onsefye ukwisa ukulapila. ¹⁰ Lelo ubushiku bwakwa Shikulu bukoisa kubati ni kabolala: Imyulu ikapita ne congo icikalamba. Nefyabamo fikapya ku mulilo, ne sonde ne ficitwa fikaba pa mbilibili. ¹¹ Apo ifi fintu fikonaulwa munshila iyi, mufwile mwaba abantu bamusango shani? Mufwile mwaikala abamushilo no kwikalilila muli bu Lesa. ¹² Mufwile mwasubila no kulolela ubushiku bwakwisa kwakwa Lesa. Pali bulya bushiku imyulu ikonaulwa ku mulilo, ne fyabamo fikasungulika ku cikabilila icikalamba. ¹³ Lelo ukulingana ne cilayo cakwe tukololela imyulu ipya ne sonde lipya, umukaba ubololoke. ¹⁴ Eico, mwe batemwikwa, apo mukosubila ifi fintu, mulekubombesha mukasangwe abakubula akalema kabili abakaele ku cinso cakwe, mu mutende. ¹⁵ Nakabili, ishibeni ukutekanya kwakwa Shikulu wesu ukuba ipusukilo, kubati fintu umutemwikwa wesu Paulo alembele kuli mwebo, ukulingana na mano ayapelwe kuli ena. ¹⁶ Paulo akolanda pali ifi fintu munkalata shakwe shonse umo umwaba ifintu ifyakukosa ukwishiba. Abantu abashakwata amano na batashipa basusha ifi fintu,nga ifyo kabili bacita ku malembo yambi, kukukonaula kwabo abene. ¹⁷ Eico, mwebatemwikwa, apo mwalisha ulwapali ifi fintu libela, isungeni pakwebati tamulufiwe ku bufi bwa bantu abataishiba ifunde no kulufya bucishinka bwenu. ¹⁸ Lelo mukule mu kusenamina na mukwishiba kwakwa Shikulu kabili Umupusushi wesu Yesu Kristu. Ubukata bube kuli ena nomba ukufika no bushiku bwa muyayaya. Ameni!