¹ Wende ka manni niyoi shommoni Laajoro ye shikni bangum. Shii niyo Betaani, meno-mina ma Maryamu kan molaro ta Matta. ² Wo Maryamu tei ye deraa turaali ti kuuno Fo-mina in teglo shoi ka shok kuuro, yee molto ta Laajoro a bangum. ³ Ma molannii in shuri ti kuuno Yeesho, ya, "Fo-mina, gee, mogo lekai a bangum." ⁴ Bara ye Yeesho yaara kaa te, shii ya, "baushik tei we war mina murom, pene tene we shuk shokrono Yamma longku laano Yamma in we shokro longkwi." ⁵ Yeesho leka Matta kan molaro kan Laajoro. ⁶ Pene bara ye yaara ya Laajoroi bangum, Yeeshon shakilla palau tidang ti piree kan shii. ⁷ Nang ka biino te, in tewi ti me an yiu shubetni, "Kama ma Yawuudiya birang." ⁸ e an yiu shubetnii in tewi ya, "An shubet,bii diyo bakkum Yawuudawa yuwa ye po kpailoko ka shiila, ka ke ta me po tere birang wee?" ⁹ Yeeshon dewina, "A awa koddi kpumu-gei-palau ti ta darang maa? mo yuwa mere ka darang, a ta tura po shoonim, longku ti we aaran ta piri kubuk te. ¹⁰ Pene, ma ta ya merei ka yippo,ta tura shooni longku ye a doo aaro ti taaniim." ¹¹ Shii sheera we te, ka bi we te, in tewon ti shinui, "Jeeromu kama ta Laajoro yuwoni shaklo, pene ne ta warani longku nen wa pigron shii ti po shakloi." ¹² Me an yiu shubetnii in liginon ti shii, "Fo-mina, ma yuwoni ma shaklo, ta pigroni." ¹³ Wende Yeesho yuwai paaro muroi, pene shinee ti nyimminai shaklo nessho. ¹⁴ Nang Yeeshon tewon ti shinui ti ku dam, "Laajoro muroni. ¹⁵ Ne ta ya bere, longkuuma, a doo ne ti po terem longku man kumi. Kama war jelenii." ¹⁶ Toma, mo ti ye ka Didymus, in tewi ti ma molon an yiu shubetni, "Kama koon ti biinii longku kaman muri ka shaayi." ¹⁷ Bara ye Yeesho fooraa po tere, in peni ya Laajoro yuwaa shaklo pereu ti ta duwo. ¹⁸ Wende Betani nimmi kan Urshalima, shakki meel palau. ¹⁹ Yawuudawa gbe wanna jeleno Matta kan Maryamu, longku min nyee ka paaro moljui. ²⁰ Nang Matta, bara ye yaara ya Yeesho ta waru, in wara kpomit kan shii, pene Maryamu deenden ta minai. ²¹ Matta in tewi ti Yeesho ya, "Fo-mina, moda ke daa ka ke ti po te, mollo daa muronim. ²² Modaa wendei, ne penaa wee ke tela ding ti kirano Yamma, ta mingo." ²³ Yeeshon tewon ti tei ya, "Molji ta illoni birang." ²⁴ Matta in liginno, "Ne penaa ta illoni birang darang illit ta duwo ta wiilan darang." ²⁵ Yeeshon liginon ti tei, "Nei illit ta duwo kan kerang; mo kunnga kan ne, koo muroni, ta illoni; ²⁶ birang ding mo dii in kumi kan ne a ta muranim. Ma kunnga we te ya?" ²⁷ Tei in liginno, "Oo, Fo-mina, Ne kunnga kei Kiriti, laano Yamma, mo ta waru kubuk." ²⁸ Bara ye tei teka we te, in koona in wa yeeru molaro ta Maryamu te dokro. In tewon ta tei, "An-shubet wanna ti po yeeji." ²⁹ Bara ye yaara ta tei, in kuman illani peep in war jelenii. ³⁰ Wende tidang Yeeshoi ri tarang minaim pene bambirnii ti piree Matta weyan shii. ³¹ Nang bara Yawuudawa me ka shaayi kan tei ti ta minai me ti ku bau kenni kan tei, weya Maryamu illa shigro peep in yiu peroro pewe, in yiu biirei ta shinui, in ti nyimmina ya kaare ta warani ku duwoi ya kwee. ³² Bara ye Maryamu wanna piree kan Yeeshoi in we shiknii, in shuwon ti toomnii ta tei in tewon ti shii ya, "Fo-mina, moda ke daa ka ke ti po te, molno daa murum." ³³ Bara ye Yeesho weya tei ta ukko muru, kan Yawuudawa me wanna ka shaayi shinu maa in ti ukko muru, Shii in turmoni ti ta shoom; ³⁴ in ya telyo, "Ma liyaa shii tong?" In liginno ta shinui, "Fo-mina, waru ke gee." ³⁵ Yeeshon ukko muru. ³⁶ Nang Yawuudawan tewi ya, "Gee peen lewan ye shii lekan Laajoro!" ³⁷ Pene peddijui in tewi ya, "A lamoo maa, mo aka ado anfugum, a ta wessho lamoo in murim maa?" ³⁸ Nang Yeesho birang, mo turmoni kping ti ta shoom, in war ku duwoi. Nangii vuluk, kan shiila liin ti foki. ³⁹ Yessho ya, "Ma gbumlo shiilai." Matta, molano Laajoro, mo muronii, in tewi ti Yeesho, "Fo-mina, koddi te wende yikka ommoni, longku shii murai kan shaklo pereu." ⁴⁰ Yeeshon dewon ti tei, "Nei teuji na, shi ma kunnga, shi ta we shik shokranno Yamma maa?" ⁴¹ Nang in gbumlo shiilai ta shinui. Yeeshon shokro dooni in tewi ya, "Fowi, ne pammaa ye ge yaarano. ⁴² Ne penaa kpaliyo ding ke ti yaarono, pene ne teka we tei longku me shengrii ti jeleno, longku shinui in kumi ya ke shunnano." ⁴³ Bara ye shii teka te, in ya yee ka elen bang, "Laajoro, peru!" ⁴⁴ Mo muronii in peru; shooni kan kirai dabyani ka lanna, adoi dawani ka lanna. Yesshon tewon ti shinuii, "Ma piddo shii mo kooni." ⁴⁵ Nang Yawuudawa gbe me wanna kaa Maryamu in we shik wee Yeesho yuwa, in kumi kan shii. ⁴⁶ Pene peddijui in warju shik Parishaawa in tewon ti shinui wee Yeesho yuwa. ⁴⁷ Nang men gbidino ta ankpaa kan Parishawa in ye galo me an deppo paaro in tewi ya, "Kama ta yaani wen? Lamoo yuyyaa we maam gbe. ⁴⁸ Kama maa wesshan shii ka tei, memme ding ta kumani kan shii; Romawa ta waraa tappo kubukmu kama ding kan kpakan po shemu kamai." ⁴⁹ Pene, ka manni niyoi ti taajui, Keepash, mon gbo ankpaa ta sheno teere, in tewon ti shinui, "Mai peno wem. ⁵⁰ Mai nyimmo yuwa kpang niyo dok in muri longku memmei kan ye kubuki ding in koon shwal." ⁵¹ Wende Shii a tewo we tei po kuunim. pene, kaa ye shiimon gbo ankpaa ta sheno teere, shii yuwaai pigro ya Yeesho ta murani longku kubuk; ⁵² a ti kubuk waanim, longku shibono Yamma me kpaili mo yooju dok. ⁵³ Nang darangii in yiu gassho koko tuk Yeesho ta shinui. ⁵⁴ Yeesho birang a ti ya memmere waani-waani ti shakki Yawuudawam, nang in kooni ti po teere in warni manni piri ye nimmi kan ta shwee ye ti ye ka Ipireemu. In deeni ti po teere kan me an yiu shubetni. ⁵⁵ Bara ye koddi temre teelani we Yawuudawa yuwa nimmi, memme gbe ti ta buki in ammo Urshalima longku shiddo shikju in tang ya temrei ⁵⁶ Shinui in ti gassho biino Yeesho, in ti tenlo shaayi koddinee ye shengrii ti mina-aboi, "Ma nyimmai wen? a ta waru po temrei ta shii maa?" ⁵⁷ Pene mon gbo ankpaa kan Parishaawa mina kumen ya mo penaa piree kan Yeesho, mo teuju longku in yiu shii.