¹ तियाहान एहेंकी हाेमजाव का तियाहय सत्ताकेनारा आन अधिकारी ईया मानिन रा जोजे. तिया आज्ञा मानीन चाला जोजे केल्लोबी हारा कामाल तियार वेरा जोजे. ² केअडा बी निंदा केरानेय जोजे भानगड नेय केनारे पेन नम्र मोना विन बादा लोकाहा कआरी बादी गोठीम नम्रता की चालनारे रा जोजे इ तियाहान इतवी दे, ³ काहाका आपु बी आगले बिगर ओकली परमेश्वरा हुकूम नेय माननारे, पुलवाले, जुदी-जुदी जाती पापाहा इच्छा कीन शोकमोजी गुलाम आथे, विरुद केअणारे डोलनारे नीच आन एक विहराल नीच गोयन जीवन जिवतुले, ⁴ पेन आपु तारणारा पेरमेशरा दया आन माहाजातीप माया केअयी ⁵ ताहा आपुहू केला धार्मिक कामांहा की नेय पेन परमेश्वरा तिया दया की नवा जोल्मा की हारे कीन आन पवित्र आत्मा की नवे कीन आपुहून तारी लेदे, ⁶ आन आपु तारणारा येशु ख्रिस्ता की आपुहूपे तो आत्मो खुबूज रिसवी देदलो हाय, ⁷ तियाहाल आपु तिया कृपाहाकी धर्मी नि सार्वकालीक जीवना आशाहाकी वारिस वेरा जोजे, ⁸ ई वचन खेरो हाय आन मा इच्छा हाय का तु ए गोठ्या हिमतीकी आखा जोजे, तियाहाल जियाहाय परमेश्वराप विश्वास थोवलो हाय तियाहाय हारा कामाम रा खातोर काळजी ला जोजे, ए गोठ्या हाऱ्या आसीन आख्खा लोकाहा खातोर फायदा हाय, ⁹ पेन खोटी गोठीही खातोर भानगड्या आन नियमशास्त्रा बाबतीम भानगड्या इयो गोठीहीने दुर रेजा, काहाका ए गोठ्या नक्कम आन कावीज फायदा नाहा हाय, ¹⁰ तुमाहाम फुटकोळ पाळनारा माहाल एक दाव नेता बेन दाव होमजावेजे तो नेय होमजुतो वेरी ता तिया आरी मा रेतो, ¹¹ तु होमजुतो का एहेंडो माहू बिगडुलो रेहे आन तो तियाल तिया सोता पापाहा बद्दल तिया होवेनु तिया सोताज न्याय वेरेहे. सलाम ¹² जाहां आय तो इही अर्तमाल नेता तुखिकाल मोकलेहे ताहा मा इही निकापलीस सेहेराम आवा कोशिस केजे, काहाका पुरो हिंयालो आय तिहीज रेहे एहेंकी ठोराव्याहो, ¹³ जेना शास्त्री ओन अपुल्लोस इयाहान केल्लीज वस्तु कमी नेय पोडा जोजे एहेंकी तियारी कीन मा इही मोकली हे. ¹⁴ आने आपु लोकाहाय हारे कामे कीन बिहीराहान मोदत केनु हिकांवा जोजे ताहा जियाहा जीवन नक्कामो नेये वेनारो, ¹⁵ मा बादा हेंगात्या तुल सालाम आखताहा आमाहा पे जे विश्वास लोक मोया केताहा तिया बादाहान सलाम आखजे, तुमा बादाहा पे परमेश्वरा कृपा वेती रे.