¹ तु ता हारा शिक्षणाल सोबनाऱ्या गोठ्या आखजे, ² तो एहेंकी का डायो मांहु समयाआरी विश्वासाम आन सोमजदार रा जोजे, आन विश्वास माया आन केल्ली बी गोठ सहन केनुम मोजबुत रा जोजे, ³ तेहेंकीज डाया बाया बी पवित्र जीवन जीवनाऱ्या रा जोजे ते चुगल्या केनाऱ्या आण हारो शिक्षण हिकवुणाऱ्या रा जोजे, ⁴ आन आपुहूमनु तरुण बाईहीन एहेंडो शिक्षण दा जोजे का तियुहिय तियुहू कोअवालाप आने पोयराहाप माया केरा जोज, ⁵ आन ते सोमजदार आन पवित्रता की रेनाऱ्या कोअेने बादा कामाहां देखरेख केनाऱ्या मोयालया आन तियोहा कोअवाला गोठ मानीन चालनाऱ्या रा जोजे ताहा परमेश्वरा वचना निंदा नेय वेनारी. ⁶ आन तेहेकीज तरुण माहांय बी सोमदार मना वेरा जोजे तियाहाव तु तियाहान हुचरावज, ⁷ तु आख्यी गोठीम हारा कामा नमुनो एहेंकी सोताल देखाव तोअ हिकनुम निर्मळपणा आने हुचारी रा जोजे, ⁸ आन हिकवुनूम खेरोपण देखाया दे तियाहाल तोप चुक्या केनाराल तो बद्दल गोगुलो कायज खोटो नेय मिलनारो तो नायवाय जानारो ⁹ आन सेवकाहाय आख्यी गोठीम तिया मालिका गोठ मानीन चाला जोजे तियाहान खुस केरा जोजे तियाहान उलटों गोगा नेय जोजे, ¹⁰ ते चोऱ्या नेय केरा जोजे, ता आख्खा लोकाहांम गोठीम एक हारो विश्वासुपणा देखावा जोजे, आण आपु तारण केणारा पेरमेश्वरा हिवुनुम आख्या लोकाहांम तियाहाय सेाबा लावा जोजे एहेंकी तु तियाहान होमंजावजे. ख्रिस्ती चेलाहाखातोर हारो उद्देश ¹¹ काहाका आख्या लोकाहांन तारणारी परमेश्वरा कृपा प्रगट वेली हाय, ¹² ती आपुहून एहेंकी हिकवे का खटीभक्ती आन जागीक जीवनाल सोडी दीन आमी ईया युगा मोन ताबाम राखीन आन नितीमानाकी आन खेरी भक्तीही की वागा जोजे. ¹³ आन आपुहू खेरी आशाहाकी म्हणजे आपु महान परमेश्वर आन तारणारो येशु ख्रिसत ईया गौरवी आगमना खातोर वाट जोवा जोजे. ¹⁴ आपुहू खातोर तियाय सोता जिव देदोलो ईया खातोर का आपुहू आख्खी अडचणमनु सुटका केरावी, आण हारा कामाम आलेहे वेरी आपु सोता लोक आपुहू खातोर हारे केरा जोजे, ¹⁵ तु ऐ गोठ्या होमजावीन आख, बोध के आन बाठ्ठा अधिकार पुर्वक दोष पदरीम काल, केडाई तो गोम्मत केरा नाय जोजे.