¹ याकोब देवाआ आणे प्रभु येशुख्रिस्ता सेवक, याहोवोनी होगा जगामे फेअलायला विश्वास थोवणारा बारा यहुदी वंशाले नमस्कार ² मा पावुहू जीया जीया वेले तुमापे जुदया-जुदया परिक्षा आवत्याहा, ताहा तुमा खुशीज मानजा ³ तुमाले माहीत हाय का, तुमा विश्वासाआ परिक्षालिदे सहनशिलता उबजेहे. ⁴ आणे तीया सहनशिलाले आपु कार्म पुरो केरा द्या. याकेताअता का तुमा पाक्का, पुरेपुर आणे केल्लीबी बाबत कोमी नैय अेहेडे पुरे केरा जोजे. ⁵ काहाका जर तुमाहीमेने केडो ज्ञानाकी कोमी वेरी ते त्याये देवापेनी मागा जोजे काहाका तो त्याले मिली काहाका तो दोष नैय लागुवता बादाले मोनमोकलो देहे. ⁶ पेण त्याये विश्वासाकी मागा जोजे आणे सौवशय तेअडाे नाहा काहाका जो सौवशो तेहे तो वाराकी उडीजाणारा आणे दोऱ्यामेनी उचे उडणाऱ्या लाफासारखो हाय. ⁷ अेहेडा माहाये अेहेडो विचार केरा नै जोजेका प्रभुपेने त्याले काय मीली का ? ⁸ काहाका तो बेन मोनाआ हाय तो होगा मार्गा मे निट नाहा. ⁹ गोरीब हाय त्या पावुहू आपु मोठापणा विषयी अभिमान केअजा ¹⁰ आणे श्रीमंत पावुहूये गोरीब समया विषयी अभिमान होमजुजा काहाका तो ऐगाहा चाराआफुला सारखे रेणारो नाहा. ¹¹ दिही (सुर्य) तीयाआ मोठा उजवाडा की उग्यो आणे त्याय चारो कोमायो हाती तीया फुल गोली पोड्यो आणे तीया रुपा शोभा जातीरिई तीया होच श्रीमंत माहाबी तीया कामा भारामे कोमाय जाये. ¹² जो वोखो सहन केहे तो आशिर्वाद हाय, काहाक वोखो सहन किईन वेहे ¹³ केडाबी परिक्षा वेती नाहा त्याये ओकी आखानै जो जे का देवाय माल लोबीमे टाक्यो काहाका देवाले वाईट गोठी लोब पोडती नाहा. ¹⁴ हाती एक एक जावाले तीया स्वौताआ इच्छाकी लोबीमे पोडे हे आणे फुलवाय जाहे ¹⁵ हाती इच्छा डेडीआरी रिई जायेने पापाल जन्म देई आणे पापाआ (दिही) पुरो वेईन मरण उबजावे हे. ¹⁶ माआ माेयाला पावुहू सौताह फसवनुक वेरा नाहा दयाहा. ¹⁷ एक ऐकाले हारो दान आणे पुरो दान देवातयनी हाय, जो बोदलु तो नाहा आणे फिरणारी सावली की नाहा अेहेडा होरग्या उजवाडा रेणारो बाहाका मेने तो उतेहे. ¹⁸ आपु तिया उबजावलामे पेअेलो फोल वेरा जोजे तियाहाल तिया सत्यवचना की सौताहा इच्छा की आपुले जन्म देदो. ¹⁹ माआ मोयाला पावुहू ई मानामे थोवा अेकअेक माहाव उनाउलामे उतवाल्यो हाचवीन गोगणारो जोजे आणे रोग कोमी जोजे ²⁰ काहाका माहा रोग मे देवाआ हारीगोठी कार्य वेअतो नाहा. ²¹ म्हणुन तुमा चोमखी बाद्या खराब गोठी मेने पुरेपुर सौताहा सुटको केई ल्या आणे जो तुमा आत्माले तारण केरुलामे समर्थ हाये ती देवा वचन तुमा अंत:करणामे (मोनामे) पाक्को प्रये ती नम्रतेमे लिल्याआ (मानील्या) ²² वचनाप्रमाणे पालणकेणारे व्या पेण फक्त उणाणारेज ऱ्याहा नाहा तेर ज्या प्रमाणे केरा काहाका जर तुमा फक्क उनाता तर तुमा सौता आरी लोबडी केअता. ²³ जो केडो देवावचन उनाहाये पेण तीया नुसार वागतोनाहा तो आरसामे आपु शारीरिक मुय वेणारा माआ होच हाय. ²⁴ तो माहावे सौताहोवे लक्ष दिईन वेअेहे पासे निगी जाये आपे आपु केहेडो आथो तो लगेच विहीराय जातेहे. ²⁵ पेण जो छुटाराे पुरेपुर बारकाईकी नियमाले पालेहे आणी वचन उनायने तो विहीराय नै जाय तियानुसार चालेहे तो माहा जो काय केहे तो तियामे आशिर्वादीत वेरी. ²⁶ जेहेकी अेगोही माहावे सौताले भोक्ती (धार्मिक) होमजे आणे तेबी सौताहा जीभे वे ताबो थोवतो नाहा ते सौताहा मोनाले (अंतकरनाले) ठोगावे तिया माहाआ भोक्ती (धार्मिक) कावींज कामी नाहा. ²⁷ सौताले जगामेनी बिगडुल्या चाली रितीमेने दुर थोवेहे. अेहेडा माआहा भोक्ती (धार्मिकता) देवा हुबूर शुध्द (चोखी) आणे केल्लो बी खराब नै ठेरे.