¹ मा पावुहू आपु प्रभु येशु ख्रिस्ता आवनु आन तिया पाही आपु एक जागे टाेलवायनु इया बद्दल आमा तुमाहान ऐहकी विनंती केताहाका, ² तुमा एकदम चमकायन बी नाह जाहा आन काबरायाहा नाहा प्रभु येशु आवुलो दिही आल्लो हाय, ऐहेकी आखनाराल आत्माकी नेता जेहेकी काय आमा इहीने आल्ला वचनाहाकी अचानक पत्राहाकी बीया नाहा, ³ केल्ली बी गोठीम केडाहाकी बी ठोगाया नाहा काहाका तिया दिह्या पेहेला विश्वासा त्याग विन तो अनीतीमान माहु नाश केनारो पापी माहु आवी, ⁴ तो नाश केनारा पयरो म्हणजे आय देव हाय अेहकी सोता देखवीन देवा मंदिरामे बोहोनारो अेहकी हाय. ⁵ माय तुमा आरी आथो ताहांज तुमाहान आखतुलो एहेंकी इया तुमाहान इत नाहा का ? ⁶ तो तिया ठोरवुला ठेमा वेज आवा जोजे बिहिरा टेमा वेरा नेय जोजे तियाहाल जो आमी ओटाकाव केलो हाय तो तुमाहान मालुम हाय, ⁷ काहाका खोट्या गोठ्या आमी बी दोबीन चालु हाय पेन जो आमी आडपायो की रियोहो तो माजनु काडीली तावलुग आडपायो केतो री ⁸ फांसे तो पापी माहुव आवी ताहा तियाल प्रभु येशु तिया मुखा मेने श्वासा की माय टाकी आन तो आवताज तिया महिमा की तियाल नष्ट केरी, ⁹ सैतान कामाहाकी तिया आवुलो री तो आखी गोठीहीकी खोटे सामर्थ्य देखावी तेहेकीज अद्भुत चिन्हे केतो आवी, ¹⁰ तियाहा नाश वेतो चाल्योहो तियाहान बादी खोटी गोठीही की ठोगनु की बी री काहाका तियाहांय वाचायां खातोर खेराकामापे मोया कीन माननु आथो तो नाहा केअयो, ¹¹ तियाहाय खोटी गोठीही पे विश्वास केरा जोजे इयाखातोर परमेश्वराय तियाहां मोने भारेमावीने कामी चाली एहेडो केरी. ¹² तियाहांय खेरापणा पे विश्वास नाहा केयो आन खोट्या गोठ्या खुशी की मानी लेद्या इयाखातोर तियाहान शिक्षा मिली म्हणुन ऐहेंडो वेरी. ¹³ प्रभु येशु मेराला लोकांहा आमाहाय कायमुज तुमा बाबतीम परमेश्वरा आभार माना जोजे, काहाका आत्माम पवित्र वेनु की आण खेरा पवित्र विश्वास किअनु की परमेश्वराय तुमाहान तारणा खातोर पेअलेंज नीवडुले हाय, ¹⁴ अन तियाय तुमहान आमाहाय आखली हारी गोठीही की आपु प्रभु येशु ख्रिस्ता महिमा मिलवी ला खातोर हादले हाय. ¹⁵ इया खातेार मा पावुलांहा विश्वासाम मोजबुत रीन जे गोठ्या तुमा वचन उनायान नेता पोत्रों वाचीन आमा तुमा तियाम टिकी रेजा. ¹⁶ आपु प्रभु येशु ख्रिस्त आन जियाप आपुहूपे माया कि होगीवेले शांती आने हारी आशा कृपा दी तो परमेश्वर आपु बाहको, ¹⁷ तो तुमा मोनाम शांती दीन बादा हारा कामाहाम तुमाहान आन वचनाम वादावे.