¹ Ru̧hua̧mä̧ ja̧u̧nö̧ yodomä̧ ä'ocö pinö̧ ja̧'hua̧nö̧ jä̧cu̧ u̧mö̧huäyotörö ruhuo hueö tö'cö huȩyu̧cui̧'i̧nö̧ tti'cächiyarö pä'ö hue'inö̧, ja̧u̧ huȩnȩmä̧ ru̧hua̧ ä'ca jo̧mȩttö̧ pä̧i̧cunä̧ rä̧mi̧pö̧nä̧ ttucuocuiniyä̧cu̧. ² Ja̧u̧ huȩnȩmä̧ po̧cui̧pi̧nä̧tö̧ Mardoqueo ru̧hua̧ u̧mö̧huäyotö ta̧ju̧rö̧ Bigtánrö'inä̧ ja̧'hua̧ta̧'a̧nö̧ Teresrö'inä̧, ruhuode äpate ä'ca tta̧'a̧rä̧tö̧ ttötö'cö päinö ru̧hua̧ Asuerorö cuä'ö tticua pä'ö jȩttä̧ji̧yä̧cu̧. ³ Ru̧hua̧mä̧ jäepö ä̧ju̧cui̧nö̧: "¿Mardoqueo pi̧yȩ jȩi̧na̧'a̧mä̧ jȩi̧nö̧ mi̧cuä'i̧nä̧ ucuo'i̧nä̧ ttiyinä̧cu̧?" Päomenä̧ ru̧hua̧ u̧mö̧huäyotö möäyotömä̧ ädätinä̧tö̧: "Yoröiso iyähui'ococu pinö̧." ⁴ Ru̧hua̧mä̧ pä'inö̧: "¿Dijä̧ttö̧ umi isaränä̧ kö̧mä̧ ja̧u̧tä̧ pä̧nä̧ Amán mä̧ ru̧hua̧ ojosodenä̧ u̧mi isaränä rä'o'äji'ca̧ ki̧nö̧ ru̧hua̧cu̧ ucuocua pä'ö Mardoqueorö nu̧'u̧ icua pä'ö jo̧mȩnö̧ jȩpö̧ u̧ju̧nä̧ji̧ tö'cö. ⁵ Ru̧hua̧ u̧mö̧yotömä̧ ttädätinä̧cu̧: "U̧mi isaränä̧ kö̧mä̧ Amán ja̧'a̧". Ru̧hua̧mä̧ pä'inö̧: "doädätucuirö." ⁶ Amán doächia'a'a ru̧hua̧mä̧ päinä̧cu̧ "¿Däjetä jȩttö̧'a̧nö̧ttö̧ ya̧tȩ ru̧hua̧ ucuotö eseunä̧ hua̧rö̧mä̧?" Ja̧'hua̧nö̧ päcu Amánmä̧ a̧'cua̧nä̧ pä'inö: "¿Ru̧hua̧ma̧ dirö ucuotö esehua'anö̧ttö̧ ttörötä?" ⁷ Amánmä̧ ru̧hua̧rö̧ pä'inö: "Ya̧tȩ ru̧hua̧ ucuotö esehuäcurumä̧, ⁸ Isopäi'önä̧ 'ca̧tä̧cuä̧huä̧ta̧ ru̧hua̧ ö̧'ca̧tä̧huä̧'įjäta̧ i'cächätucui, ja̧'hua̧ta̧'a̧nö̧ caballo ru̧hua̧ huä̧nö̧ i̧'chä̧i̧jä̧cu̧ unä̧ diadema pättöjuei huȩnä̧rö̧rö̧'i̧nä̧. ⁹ Ja̧'hua̧nö̧ ja̧'a̧ 'ca̧tä̧cuä̧huä̧'i̧nä̧ ja̧'hua̧ta̧'a̧nö̧ caballorö'i̧nä̧ ru̧hua̧ u̧mö̧huäyotöttö ucuo ku̧nä̧rö̧rö̧ iyähuäcua'a. Ru̧hua̧ ucuotö esehuäcu ö̧'ca̧tä̧hua̧'a̧nä̧ ja̧'a̧tä̧ topätucui, ja̧'hua̧ta̧'a̧nö̧ caballorömä̧ ötahuiyättö mä̧nä̧nä̧ jäyänä̧ 'chä̧nö̧ cuettäda'a ä'ca 'chä̧nö̧ huotta'anä̧: ¡Pi̧ye jȩpö̧ chö ru̧hua̧ ucuotö esehuäcumä̧!" ¹⁰ Ja̧'hua̧nö̧ ja̧'a̧ ru̧mä̧ Amánrö̧ pä'inö̧: "Jurunä̧ rä'opächö, 'ca̧tä̧cuä̧ta'i̧nä̧ ja̧'hua̧ta̧'a̧nö̧ caballorö'i̧nä̧ ȩmo̧po̧'ä̧ji̧ jȩchä̧cua̧sä̧ päcuäjita̧'a̧nö̧, ja̧'hua̧nö̧ ja̧'a̧ttö̧ pi̧yȩ jȩpi̧ judío ttö̧ja̧'i̧sa̧ Mardoqueo ru̧hua̧ ojusode äpate ä'ca pö̧rö̧mä̧. Cucuocuäjimä̧ yoröiso ji̧qui̧nö̧i̧nä̧ jäyämä̧ jȩcuo̧". ¹¹ Amánmä̧ 'ca̧tä̧cuä̧huä̧ta̧'i̧nä̧ ja̧'hua̧ta̧'a̧nö̧ caballorö'i̧nä̧ ȩmo̧po̧'i̧nö̧. Mardiqueorö 'ca̧tä̧ji̧'ca̧ caballonä̧ u̧hua̧'a̧nä̧ jäyänä̧ 'chä̧nö̧ ötahuiyättö mä̧nä̧nä̧ cue'ädinö̧. ä'canä̧ 'chä̧nö̧ huotta'anä̧ "¡Pi̧ye jȩpö̧ chö ru̧hua̧ ucuotö esehuäcumä̧!" ¹² Mardoqueomä̧ ru̧hua̧ ojusode äpatecu ppa̧'a̧chi̧'i̧nö̧. Ja̧'hua̧nö̧ ja̧'a̧nä̧ Amánmä̧ jurunä̧ ojusodecu ppa̧'ä̧chä̧chi̧nö̧ a̧'cua̧tta̧'ȩcu̧nö̧ u tto̧'ȩcuä̧rä̧ya̧. ¹³ Amánmä̧ irecua Zeresrö'i̧nä̧ ja̧'hua̧ta̧'a̧nö̧ ahuaruhuärö'i̧nä̧ 'cuäopäjimä̧ o'cajuiyönä̧ ji'ähuinö̧. Ja̧'hua̧nö̧ ja̧'a̧ abuaruhuämä̧ huo̧juä̧tö̧ ja̧'a̧ ja̧'hua̧ta̧'a̧nö̧ irecua Zeres'i̧nä̧mä̧ pättinäcu̧: :"Mardoqueo judio ttö̧ja̧sa̧ ä'ca jo̧mȩ ma̧'a̧mä̧ji̧jä̧ ja̧u̧cu̧mä̧ cuihueyecuä̧cua̧jä̧ isopäi'önä̧tä̧ ja̧u̧ ä'ca jo̧mȩ ma̧cuä̧mä̧cua̧jä̧." ¹⁴ Ji̧nä̧ ja̧u̧cu̧ ucuocu ttö̧ja̧cua̧'a̧nä̧ ru̧hua̧ u̧mö̧huäyotömä̧ ichi'ö jurunä̧ ȩmipi̧nä̧tö̧ Amánrö̧mä̧ Ester päcäri jo̧mȩnö̧ jȩpö̧ cu̧ju̧nä̧ja̧'a̧cu̧.