7 ¹ Ja̧'hua̧nö̧ ja̧'a̧, Ru̧hua̧ ojusodenä ö̧jä̧mä̧di̧ o'ca'a, ja̧'hua̧ta̧'a̧nö̧ TÖ̧Ä̧NÄ̧HUA̧'i̧nä̧ ttaboiyotö ttipeyänä ka̧cuä̧tö̧ o'catoi'önä jua'a yabonö̧ tturohuäu juiyönä jȩi̧nö̧ o'ca'a, ² ru̧hua̧mä̧ TÖ̧Ä̧NÄ̧HUA̧ttö̧'i̧nä̧ ttö̧ja̧ttö̧'i̧nä̧ kä'co päte'ö adicuä ttö̧ja̧sa̧ Natánrö̧ pä'inö: "Topittö, Ttömä̧ cedro dauhuiyättö adicuodenä̧ ku̧sä̧, ja̧'hua̧nö̧ chö̧ja̧'a̧nä̧ TÖ̧Ä̧NÄ̧HUA̧ esecuinö ȩco̧ca̧mä̧ isode recuo huocodenä̧tä̧ kä'co päte'ö pa̧'a̧." ³ Ja̧'hua̧nö̧ ja̧'a̧ Natánmä ru̧hua̧rö̧ pä'inö: "A̧ jȩpi̧, jȩ'cua̧ pä'ö cua̧mö̧cuädäjimä̧, isopäi'önä̧ TÖ̧Ä̧NÄ̧HUA̧mä̧ ucutäcu kö̧." ⁴ Ja̧'hua̧nö̧ päji o'ca'a ja̧u̧tä̧ yodo TÖ̧Ä̧NÄ̧HUA̧mä̧ Natáncu ucuocumä̧ pä'inö: ⁵ Chu̧mö̧huä̧ya̧ Davidrö ji'ähuäji, TÖ̧Ä̧NA̧HUA̧mä̧ pa̧'a̧nö̧ pä'ö: ¿Ucu jä̧cua̧'a̧ ttö chö̧jä̧cuode cuaditäcua̧mä̧? ²¹ Cui̧huȩnȩ re kä̧cuä̧huä̧ cucuocunämä̧, ja̧'hua̧ta̧'a̧nö̧ ucutä cui̧rȩbȩhua̧ päcuinö ji̧nö̧ isojuocuepa pä'ömä̧, ucumä pi̧yȩ rö̧ä̧ö̧ jähuä i̧ȩpi̧nö̧jä̧ ja̧'hua̧nö̧ jȩpö̧ ttö cu̧mö̧huä̧ya̧ päi'ö́nä̧ hua̧rö̧mä̧ i̧jȩpi̧nö̧jä̧. ²² Ja̧'hua̧nö̧ ja̧'a̧ttö̧ ucumä̧ juiyo buojä̧, Chuä̧nä̧hua̧. Isopäi'önä̧ ucu'anö hua̧ ka̧ra̧mä̧ toa'a, ja̧'hua̧ta̧'a̧nö̧ ucu'anö hua̧ TÖ̧Ä̧NÄ̧HUA̧ ka̧ra̧mä̧ to'ätöjä, ja̧'hua̧ta̧'a̧nö̧ ujutu ta̧mö̧nä̧ tä̧ja̧nä̧ tä̧ju̧cui̧nö̧'a̧nö̧ hua̧mä̧. ²³ ¿Ja̧'hua̧nö̧ ja̧'a̧mä̧ korotö cumöhuäyotö Israel ttö̧ja̧ jö̧'a̧nö̧ huotö'i̧nä̧ ttö̧ja̧cua̧'a̧, pi̧jä̧nä̧ ka̧cuä̧tö̧ ttö̧ja̧ttö̧mä̧ jahuätötä jo̧ca̧'a̧, ucu TÖ̧Ä̧NÄ̧HUA̧ ucutä cumöhuäyotö pätti'önä̧ surojöttö rä'epö cuicuinä̧u̧mä̧? Ucumä jahuätörömä̧ ucutätä cu̧mö̧huäyotö pätti'önä̧tä̧ jȩpi̧nö̧jä̧, ucu cui̧mi̧ ttö̧huä̧jua̧cu̧ pä'ömä̧, ja̧'hua̧ta̧'a̧nö̧ rö̧ä̧nä̧ jähuä jȩ'cua̧ pä'ömä̧ jua'atäcu cumöhuäyotö yettecua pä'ömä̧. Ucumä̧ cumöhuäyotö Egiptottö rä'epö cuicuinä̧u̧ ttä'ca jo̧mȩttö̧ ttö̧ja̧rö̧'i̧nä̧ ja̧'hua̧ta̧'a̧nö̧ ttö̧ä̧nä̧huo̧tö̧rö̧'i̧nä̧ rä'epö icuinöjä̧. ²⁴ Ucumä̧ Israel ttö̧ja̧rö̧mä̧ 'cuäopönä̧ cu̧mö̧huäyötö jö̧nä̧ ttö̧ja̧cu̧nä̧tä̧ ku̧ni̧nö̧jä̧ ja̧'hua̧ta̧'a̧nö̧ ucu TÖ̧Ä̧NÄ̧HUA̧mä̧ jahuätö TTÖ̧Ä̧NÄ̧HUA̧ jö̧nä̧tä̧ juo'ecuinöjä̧. ²⁵ Ja̧'hua̧nö̧ ja̧'a̧ttö̧ jitämä, Ucu TÖ̧Ä̧NÄ̧HUA̧ cu̧mö̧huä̧ya̧ ucu'cö jȩchä̧cua̧sä̧ päcuinömä̧ ja̧'hua̧ta̧'a̧nö̧ ahuaruhuä'i̧nä̧ 'cuäopönä̧ ttö̧jä̧cuo̧tö̧ päcuina'amä̧. Cucuocuinöta'anö̧ jȩpi̧. ²⁶ Ucu cui̧mi̧mä̧ 'cuäopönä̧tä̧ rö̧ä̧u̧ jö̧nä̧tä̧ jä̧cua̧'a̧, su̧ro̧da̧u̧ TTÖ̧Ä̧NÄ̧HUA̧mä̧ Israel ttö̧ja̧'i̧nä̧ TTÖ̧Ä̧NÄ̧HUA̧ jö̧nä̧tä̧ hua̧ pättäcua'anö̧; ttö ucu cu̧mö̧huä̧ya̧ David chahuaruhuä ucu cuä'ca jo̧mȩ adiutä ttö̧ja̧cuä̧i̧mä̧. ²⁷ Isopäi'önä̧ ucumä̧, su̧ro̧da̧u̧'i̧nä̧ ttu̧ru̧hua̧jä̧, Israel ttö̧ja̧'i̧nä̧ ttu̧ru̧hua̧ Diosjä̧, i̧jȩpä̧ji̧jä̧ cu̧mö̧huäyotö cu̧mö̧huä̧ya̧rö̧ ucutä ja̧'a̧ ja̧u̧rö̧ isode aditö cuiyä̧cua̧mä̧. Pi̧yȩ ja̧'a̧ ucuruttö ucu cu̧mö̧huä̧ya̧ cha'attö̧, ucuru jä'epäjisä yedoca'a ucuocu ucuru. ²⁸ Jitämä tu̧ru̧hua̧ Dios. Isopäi'önä Diosjä̧, ja̧'hua̧ta̧'a̧nö̧ cui̧huȩnȩmä̧ isopäi'önä̧tä̧ ja̧'a̧, ucumä̧ adihuä huȩnȩ iyäjijä̧ cu̧mö̧huä̧ya̧rö̧. ²⁹ Ja̧'hua̧nö̧ ja̧'a̧ttö̧ jitämä esehuächi'ö adiunä ja̧ pä'ö ucu cu̧mö̧huä̧ya̧ ojusode, ja̧'hua̧ta̧'a̧nö̧ yabocutä 'cuäopönä̧ ö̧jä̧cua̧'a̧ttö̧ ucu cuä'ca jo̧mȩ. Isopäi'önä̧ ucumä̧ tu̧ru̧hua̧ Dios pä'äjijä̧ pi̧yȩ jähuä, ja̧'hua̧ta̧'a̧nö̧ ucu päcuome adiu ja̧ pä'ö cu̧mö̧huä̧ya̧ ojusode adiu ja̧ pä'ö 'cuäopönä̧.