6 ¹ Ja̧'hua̧nö̧ ja̧'a̧ Davidmä̧ pä'äjita'anö̧ Israel ttö̧ja̧ttö̧ treinta milnö̧ huotö u̧mä̧tö̧ pojopö ȩmä̧huo̧tö̧ o'catoi'önä̧rö̧ ca̧ca̧ti̧pinö. ² Davidmä̧ ä̧rä̧mä̧chö̧ u̧mö̧huäyotö chutäcu ka̧cuä̧tö̧ o'catoi'önä̧cu̧ 'chi̧nö̧ Judá rȩjȩnä̧ Baala pättomecu̧ juorötä TÖ̧Ä̧NÄ̧HUA̧ esecuinö ȩco̧ca̧ ȩpa̧ pä'ö, TÖ̧Ä̧NÄ̧HUA̧ su̧ro̧da̧u̧ ttu̧ru̧hua̧ i̧mi̧nä̧ ucuo ko̧mȩ pä'ö ottinomȩ querubines pä̧ttä̧u̧ ttö̧'cä̧tȩ jo̧mȩ. ³ TÖ̧Ä̧NÄ̧HUA̧ esecuinö̧ ȩco̧ca̧mä̧ carucä jareäcänä rutinä̧tö̧. Jahuätömä Abinadab ojusode mö̧ä̧'canä̧ huo̧dȩttömä̧ u̧mi̧cu̧ rä'epö icuinätö̧. I̧tti̧mö̧ Uza'i̧nä̧ ja̧'hua̧ta̧'a̧nö̧ Ahío'i̧nä̧ carucä jareäcä juȩ'ȩpä̧rö̧ o'ipinä̧tö̧. ⁴ Jahuätömä̧ carucä Abinadab ojusode mö̧ä̧'canä̧ huo̧de TÖ̧Ä̧NÄ̧HUA̧ esecuinöca̧ kä̧'i̧jodettömä u̧mi̧cu̧ rä'epö icuinätö̧. Ahíomä TÖ̧Ä̧NÄ̧HUA̧ esecuino̧ca̧ ȩco̧ca̧ ä'ca ja̧'a̧nä̧ 'chi̧nö̧. ⁵ Ja̧'hua̧nö̧ ja̧'a̧ Davidmä ja̧'hua̧ta̧'a̧nö̧ Israel ttö̧ja̧mä̧ o'catoi'önä̧ TÖ̧Ä̧NÄ̧HUA̧ to̧ä̧ro̧mȩttö̧ kä̧mä̧dö̧ eseu ra̧'i̧nä̧tö̧ dauttö adicuänä̧'i̧nä̧, arpas pättönä'i̧nä̧, liras pättönä̧'i̧nä̧, panderetas pättönä̧'i̧nä̧, cascabeles pättönä̧'i̧nä̧ ja̧'hua̧ta̧'a̧nö̧ címbalos pättönä̧'i̧nä̧ cuäö́ kä̧nö̧. ⁶ Nacón u̧cuȩ cuähuä ko̧mȩ tti̧rȩbȩhui̧'o̧mȩnä̧, pä̧cä̧yu̧mä̧ äcuächi'inä̧tö̧, ja̧'hua̧nö̧ ji̧yä̧cu̧ Uzamä 'chuäda pä'ö u̧mö̧ ki̧'ä̧di̧nö̧, ja̧'hua̧nö̧ jȩpö̧ 'chu'ädinö̧. ⁷ Ja̧'hua̧nö̧ ja̧'a̧ TÖ̧Ä̧NÄ̧HUA̧mä̧ Uzarö rö̧ä̧nä̧ ocurä jä̧'i̧nö̧'a̧nö̧ päi'önä ra̧huä̧ri̧pi̧nö̧. TÖ̧Ä̧NÄ̧HUA̧mä̧ päocö jä̧ji̧ jȩi̧yä̧cu̧ cuä'ö icuinä̧cu̧. Uzamä TÖ̧Ä̧NÄ̧HUA̧ esecuinö ȩco̧ca̧ jäyättö 'coru pä'i'inö̧. ⁸ Davidmä rö̧ä̧nä̧ ra̧huä̧ri̧nö̧, TÖ̧Ä̧NÄ̧HUA̧ Uzarö cuä'ö icuäjiyäcu, ja̧'hua̧nö̧ ja̧'a̧ttö̧ juȩnȩ i̧mi̧mä̧ Pérez Uza pä'ö oínö̧. Ja̧u̧nö̧ mo̧ro̧ oinömä̧ jitä mo̧ro̧ jubö päi'önä̧ Pérez Uza pä'o o'inö. ⁹ Davidmä̧ ja̧u̧nö̧ mo̧ro̧mä̧ TÖ̧Ä̧NÄ̧HUA̧rö̧ ye'ecuinö. Ja̧u̧mä̧ pä'inö: "¿Ttömä̧ tocu chȩpö̧'a̧nö̧ttö̧ TÖ̧Ä̧NÄ̧HUA̧ esecuinö̧ ȩco̧ca̧mä̧?" ¹⁰ Ja̧'hua̧nö̧ ja̧'a̧ttö̧ Davidmä̧ TÖ̧Ä̧NÄ̧HUA̧ esecuinö̧ ȩco̧ca̧mä̧ chutä idepiyu jacuämä ȩpa̧mä̧ pä'ocö pinö̧. Juhua'a ȩpa̧jueimä̧ geteo ttö̧ja̧sa̧ Obed Edom ojusode jäyä rötipinö. ¹¹ TÖ̧Ä̧NÄ̧HUA̧ esecuinö̧ ȩco̧ca̧mä̧ geteo ttö̧ja̧sa̧ Obed Edom ojusodenä ki̧no̧ca̧ huämetucuä jo̧mȩnä̧. Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧mä̧ ja̧u̧rö̧'i̧nä̧ ja̧'hua̧ta̧'a̧nö̧ ahuaruhuärö'i̧nä̧ o'catoi'önä̧rö̧ adihuomenä̧ ppä'ädinö̧. ¹² "TÖ̧Ä̧NÄ̧HUA̧mä̧ adiu ppä'ädäji Obed Edomrö̧'i̧nä̧ ja̧'hua̧ta̧'a̧nö̧ u̧ju̧nä̧rö̧mä̧ o'cajuiyönö rö̧ä̧chö̧nä̧ TÖ̧Ä̧NÄ̧HUA̧ esecuinö ȩco̧ca̧ jähuänä̧mä̧ pä'ö jittähuinäcu̧ Ru̧hua̧ Davidmä̧: 'chä̧ji̧'ca̧ TÖ̧Ä̧NÄ̧HUA̧ esecuinö ȩco̧ca̧mä̧ Obed Edom ojusodettö chutä David idepiyura̧'a̧cu̧ esehuä̧ya̧ i'cächinö. ¹³ TÖ̧Ä̧NÄ̧HUA̧ esecuinö ȩco̧ca̧ huä̧do̧huä̧tö̧ seisnö jo̧mȩ 'chä̧nö̧ tti̧jä̧dä̧ji̧ o'ca'a, ja̧u̧mä̧ päcäyärö'i̧nä̧ ja̧'hua̧ta̧'a̧nö̧ i̧tti̧ bärepa̧rö̧ cuä'ö icu Ö̧Ä̧NÄ̧HUA̧rö̧ iyinö. ¹⁴ Davidmä̧ TÖ̧Ä̧NÄ̧HUA̧ to̧ä̧ro̧mȩttö̧ ujuru o'cajuiyönä̧ tö'inö̧; chutätä lino pättöjueittö adicuä̧ta̧ efod pättäta̧ 'ca̧tä̧hui̧nö̧. ¹⁵ Ja̧'hua̧nö̧ ja̧'a̧ttö̧ David'i̧nä̧ ja̧'hua̧ta̧'a̧nö̧ Israel ttö̧ja̧'i̧nä̧ o'catoi'önä̧ eseu huopö kä̧nö̧ trompeta ppötta'anä TÖ̧Ä̧NÄ̧HUA̧ esecuinö ȩco̧ca̧ i'cächinä̧tö̧. ¹⁶ Ja̧'hua̧nö̧ ja̧'a̧ TÖ̧Ä̧NÄ̧HUA̧ esecuinö ȩco̧ca̧ David idepiyöra̧'a̧cu̧ dottäda'anä, Saúl ittiju Micalmä̧ ventananä u̧mi̧cu̧ topinäju̧. Jahuäjumä tojomenä̧ ru̧hua̧ David TÖ̧Ä̧NÄ̧HUA̧ tö̧ä̧ro̧mȩttö̧ tö'inö̧. Ja̧'hua̧nö̧ jȩi̧yä̧cua̧ ka̧'cua̧nä̧ cöjö'cö juiyönä̧ topinäju̧. ¹⁷ Jahuätö TÖ̧Ä̧NÄ̧HUA̧ esecuinö ȩco̧ca̧ ka̧ pä'ö ji̧no̧mȩ jacuäcu ȩpö̧ ku̧ni̧nä̧tö̧, juo̧ca̧ ka̧ pä'ö David aditinodenä̧ kä'co. Ja̧hua̧nö̧ ja̧'a̧ Davidmä̧ iäre iyähuä kuhuö icu iyähuä ja̧'hua̧ta̧'a̧nö̧ iäre iyähuä huȩnȩ juiyönä̧ kä̧cuä̧huä̧ TÖ̧Ä̧NÄ̧HUA̧ to̧ä̧ro̧mȩttö̧ iyinö. ¹⁸ David iäre iyähuä kuhuö icu iyähuä'i̧nä̧ ja̧'hua̧ta̧'a̧nö̧ iare iyähuä yo̧mȩtȩnä̧ a̧mö̧cuädäcuähuä iyö cä'ädö, ja̧u̧mä̧ su̧ro̧da̧u̧ TTÖ̧Ä̧NÄ̧HUA̧ i̧mi̧nä̧ ttö̧ja̧rö̧ adiutä ji̧ya̧rö̧ pä'inö̧. ¹⁹ Ja̧'hua̧nö̧ ja̧'a̧ ja̧u̧mä̧ ttö̧ja̧ recuätö Israel ttö̧ja̧rö̧mä̧ o'catoi'önärö̧ u̧mä̧tö̧rö̧'i̧nä̧ ja̧'hua̧ta̧'a̧nö̧ nä̧tö̧rö̧'i̧nä̧ iyä'chinö̧, cuäcuähuä'i̧nä̧, idepä'i̧nä̧ ja̧'hua̧ta̧'a̧nö̧ uvattö ȩttä̧huä̧'i̧nä̧. Ja̧'hua̧nö̧ ja̧'a̧ ttö̧ja̧ o'catoi'önä i̧hui̧nä̧tö̧, yotucupönä ttojusodera̧'a̧cu̧. ²⁰ Ja̧'hua̧nö̧ ja̧'a̧ Davidmä̧ ppa̧'a̧chi̧'ä̧ji̧'ca̧ i̧tti̧mö̧rö̧ adiunä ji̧ya̧rö̧ pä'ö jȩpi̧nö̧. Saúl ittiju Micalmä̧ Davidcu ki'ätecuächa pä'ö rä'o'ö pä'inäju̧: ¡Israel ttö̧ja̧ ttu̧ru̧hua̧mä̧ jitä mo̧ro̧ ucuo juiyönä, ö̧'ca̧tä̧huä̧ta̧ ko̧'ä̧dä̧cuä̧u̧ icu aditätö u̧mö̧huäyotö nä̧tö̧ to̧ttä̧ro̧mȩttö̧, ja̧'a̧tä̧ i̧sa̧ 'cua̧rö̧nä̧ ö̧'ca̧tä̧huä̧ta̧ ko̧'ä̧dä̧cuä̧u̧ i̧cuäji dä̧'ä̧rö̧jö̧nä̧!" ²¹ Davidmä Micalrä ädätinö: Ja̧u̧mä̧ TÖ̧Ä̧NÄ̧HUA̧ to̧ä̧ro̧mȩttö̧ jȩchä̧ji̧, cuä'orö ja̧'hua̧ta̧'a̧nö̧ cuahuaruhuärö'i̧nä̧ pojopö ȩma̧jueimä ttörö pojopö ȩmö̧ TÖ̧Ä̧NÄ̧HUA̧ u̧mö̧huäyotö Israel ttö̧ja̧rö̧ ruhuonä̧ hueda pä'ö ttörö ku̧ni̧rö̧. ¡TÖ̧Ä̧NÄ̧HUA̧ to̧ä̧ro̧mȩttö̧mä̧ eseutä chu̧jä̧cua̧sä̧! ²² Ttömä yabonä̧nö̧ hui̧dä̧chi̧'a̧'a̧nä̧, ja̧'hua̧ta̧'a̧nö̧ ja̧'hua̧ta̧'a̧nö̧ cha̧mö̧nä̧ pa̧ja̧tö̧mä̧ ucuomä te'ähuocö̧ chä̧cua̧sä̧. Ja̧'hua̧nö̧ ja̧'a̧nä̧ pitö nä̧tö̧ chu̧mö̧huä̧yo̧ ucu cucuocuäu̧mä̧, ttömä chucuo chu̧ju̧nä̧rä̧cua̧sä̧. ²³ Ja̧'hua̧nö̧ ja̧'a̧ttö̧ Mical Saul ittijumä 'corujuojächome jubu päi'önä ki̧tti̧mö̧mä̧ to'inäju̧.