22 ⁵ Hua'are ppähuäbimä chippeyänä kärähuinäcu̧sä̧, ajiya juruhuoyamä a̧'ȩpö̧ icuattö pä'ö 'tö̧ȩ'i̧nä̧cu̧sä̧. ⁶ Hua'are rutähuome appiyämä chippeyänä kärähuäcusä; hua'are mattä̧chö̧nä̧ jȩpö̧ ku̧nä̧huä̧mä̧, 'chuädi'äcusä. ⁷ Cha̧'cua̧ tta̧'ȩcu̧ TÖ̧Ä̧NÄ̧HUA̧rö̧ huopinö; Ttömä CHÖ̧Ä̧NÄ̧HUA̧rö̧ huochomenä; ja̧u̧mä̧ chutä ö̧jodettö huochömä ä̧ju̧cui̧nö̧ ja̧'hua̧ta̧'a̧nö̧ ppädattö pä'ö huochömä ä̧ju̧cu̧nä̧ rȩbȩhui̧pi̧na̧'a̧. ⁸ Ja̧u̧nu̧ o'ca'amä rȩjȩmä̧ ttö̧ȩpö̧ cäyucuächina̧'a̧. Mo̧ro̧jä̧ 'chu̧huä̧ro̧mȩ'i̧nä̧ cäyucuächina̧'a̧ ja̧'hua̧ta̧nö̧ pporächi'ina'a, juhua'amä TÖ̧Ä̧NÄ̧HUA̧ öjö'cö juiyönä ja̧'a̧ttö̧. ⁹ Ocurä isoppamä i̧ji̧yu̧nä̧ räopina'a ja̧'hua̧ta̧nö̧ ocurä kuhuö icuarämä änä räopina'a. Ja̧u̧nä̧tä̧ rȩdȩcuä̧china'a ä̧ya̧ri̧samä. ¹⁰ Ja̧u̧mä̧ mo̧ro̧jä̧ ba'epinö ja̧'hua̧nö̧ ba'epö mȩyȩhui̧nö̧ ja̧'hua̧ta̧'a̧nö̧ ö̧jä̧pö̧ dȩa̧'a̧mä̧ rö̧ä̧nä̧ yo̧'cu̧ jo̧ppa ri̧na̧'a̧. ¹¹ Ja̧u̧mä̧ querubínä̧ huä̧mä̧di̧nö̧ ja̧'hua̧nö̧ huä̧mä̧dö̧ co'inö. Ja̧u̧mä̧ kä̧ru̧'coppa huä̧mȩnä̧ coa'a tottinä̧cu̧. ¹² Ja̧'hua̧ta̧'a̧nö̧ ja̧u̧mä̧ yo̧'cu̧ jo̧ppattö i̧sä̧ta̧ aditäji'ca̧ juä'ocuinö mo̧ro̧jä̧ ajiya isoppa rö̧ä̧nä̧ yo̧ppattö ca̧ca̧to̧po'ö. ¹³ Cu'upä urohuomettö̧ ä̧ya̧ri̧sa cuoäsa ja̧u̧ ä'ca jo̧mȩcu̧ ttahuähuina'a. ¹⁴ TÖ̧Ä̧NÄ̧HUA̧mä̧ mo̧ro̧jä̧ra̧'a̧ttö̧ cu'upä cöröa'a rä̧mi̧pi̧nä̧ jȩpi̧nö̧. Ja̧u̧ mo̧ro̧jä̧nä̧ kö̧mä̧ huopi'inö. ¹⁵ Ja̧u̧mä̧ 'po̧'a̧ri̧nä̧ 'po'inö ja̧'hua̧nö̧ 'po'ö ttaboiyotörömä pperetö icuinö, cu'upä rounä̧ dö'ecuächö ttiperecuächönä jȩpi̧nö̧. ¹⁹ Cha̧'cua̧ tta̧dȩcu̧ mo̧ro̧ ttö chaboiyotö jö̧nä̧ ichinä̧tö̧, ja̧'hua̧nö̧ ja̧'a̧nä̧ TU̧RU̧HUA̧TÄ̧ ttörö ppä'ädinö̧mä̧. ²⁰ Ja̧u̧'inä pȩnȩ cähueome i'cächinäcu̧sä̧, ja̧u̧ chu̧ji̧pö̧nä̧ ppä'ädinö ttörö. ²¹ TU̧RU̧HUA̧TÄ̧ adiunä ppädinäcu̧sä̧ yoyonö rö̧ä̧chi̧na̧'a̧ ttörö ro̧ȩcuä̧; ja̧u̧tä̧ ji̧na̧'a̧ pä'äjinö'anö yoyonö ttö chumöpi̧yä̧ töcö icuinö. ²² TU̧RU̧HUA̧TÄ̧ hua'adö ku̧ni̧nö̧ u̧mä̧nä̧nä̧ ja̧'hua̧ta̧'a̧nö̧ surojucumä ko̧cö̧sä̧ Diosttö 'quȩdi̧pä̧cha̧'a̧cu̧. ²³ O'cajuiyönä adiunä pä'ö ku̧nä̧huä̧mä̧ ttörö pätetö ku̧nä̧hui̧'i̧na̧'a̧ juhua'a jö̧ta̧'a̧nö̧tä̧ adicuä pätetö ku̧nä̧huo̧tu̧cu̧. ttömä 'quȩ'i̧pä̧cho̧cö̧sä̧ jahuätöttömä. ³² Ja̧'hua̧nö̧ ja̧'a̧ ¿Di jä̧ttö̧ Diosmä ja̧'hua̧nö̧ ja̧'a̧nä̧ Tu̧ru̧hua̧ ja̧'a̧? ¿Di jä̧ttö̧ tu̧ru̧hua̧ Diosttö'inä abonänö ido'qui jä̧'i̧nö̧'a̧nö̧ hua̧mä̧? ³³ Diostä ja̧'a̧ ttörö dajömä ja̧'hua̧ta̧'a̧nö̧ ja̧u̧mä̧ juȩ'ȩpä̧rö̧, mä̧nä̧ juȩ'ȩpä̧rö̧. ³⁴ Ja̧u̧mä̧ jȩpö̧ chi̧jä̧pi̧yä̧ yä̧mä̧ jä̧'i̧nö̧'a̧nö̧ chujuruhuönä ja̧'hua̧ta̧'a̧nö̧ möä'ca ju'toju isä'ca huä̧mȩ utäcusä. ³⁵ Ja̧u̧mä̧ u̧huo̧juȩtä̧cu̧sä̧ chumöpi̧yä̧mä̧ curä churohuähua pä'ö ja̧'hua̧ta̧'a̧nö̧ chö̧jä̧pi̧yä̧mä̧ bronce 'po'obö chisetäda pä'ö. ³⁶ Ucunä ra̧huä̧pi̧jö̧ttö̧ ki̧'ä̧cuä̧huä̧ ttoecuäcuähuäbi cuiyinä̧cu̧sä̧ ja̧'hua̧ta̧'a̧nö̧ ucu ppäcuädönämä adiu ppädä'ijäcusä. ³⁷ Chiquichächi'oca'a chö̧ja̧ pä'ö yo̧mȩtȩ rö̧ä̧mȩ ku̧ju̧ni̧nä̧cu̧sä̧. ³⁸ Ttömä chaboiyotörö tto'ca'anä ru'u si'epö icuinösä̧. Cho'ca'acumä ppa̧'a̧cho̧cö̧ pinösä̧ jo̧mȩnö̧ totte'ächome jubö. ³⁹ Ttömä ra'adi'ö kȩdö̧ chicuäjä̧u̧, jahuätömä ttä̧rä̧mi̧'ö̧ juiyönä huotö. Chö̧jä̧pi̧yä̧ dȩa̧'a̧ ma̧'ä̧mi̧nä̧tö̧. ⁴⁴ Ucu'inä cha̧mö̧nä̧ chahuaruhuä pättä'chomettö̧ rä'epö cuicuinäcu̧sä̧. Ttörömä ko̧ro̧jä̧ ttö̧ja̧ ttu̧ru̧hua̧ jö̧nä̧ chönä ku̧ju̧nä̧rä̧'i̧jä̧cu̧sä̧. Ttö̧ja̧ chi̧ȩru̧huä̧ö̧tä̧ ppä̧ttä̧dä̧rä̧cu̧sä̧. ⁴⁵ Ko̧ro̧jä̧ ttö̧ja̧mä̧ ttihue'quiyunä kä̧mä̧dö̧ ja̧rȩyu̧ jö̧nä̧ pätti'inäcu̧sä̧. Chi̧huȩnȩ pädö ttä̧ju̧cu̧ta'anö jahuätömä ttucuotinäcu̧sä̧. ⁴⁶ Ko̧ro̧jä̧ttö̧ ichäcuähuotömä dajahuächö ttö̧'ȩjo̧mȩttö̧ umicu̧ rä'opö ttöö̧'ä̧huä̧yo̧tö̧ ichinätö̧. ⁴⁷ ¡TÖ̧Ä̧NÄ̧HUA̧mä̧ 'cuäpönätä̧ kö̧! Chinähuämä ttesehuäcuähuä. Chö̧ä̧nä̧hua̧mä̧ ttö̧mö̧ cä'epö ttesehuäcua̧, ra̧huä̧pi̧ju̧ttö̧ chöjipönä ppädähuämä juähuätä ja̧'a̧. ⁴⁸ Pide ja̧'a̧ TÖ̧Ä̧NÄ̧HUA̧ ttörö suronä jȩpä̧tö̧rö̧ micuä jȩpö̧mä̧, ttö chi̧dȩa̧'a̧cu̧ ttö̧ja̧rö̧ ki'opö icumä. ⁴⁹ Chaboiyotö suronä jȩpä̧tö̧ttö̧ rä'epö icumä. Isopäi'önätä̧ ttörömä suronä jȩpä̧tö̧ ttu̧huä̧mȩnä̧ cä'epö ku̧ni̧nö̧jä̧. Ttö̧ja̧ surojuottepa pä'ätöttömä rä'epö cuicuinäcu̧sä̧. ⁵⁰ Pa̧'a̧nö̧ jo̧mȩttö̧ ucurumä adihua'a pä'ösä, TÖ̧Ä̧NÄ̧HUA̧ pi̧jä̧ ttö̧ja̧ ttö̧'kȩtȩttö̧ ucu cui̧mi̧nä̧ ra̧dä̧cua̧sä̧. ⁵¹ TÖ̧Ä̧NÄ̧HUA̧mä̧ ru̧hua̧rö̧ rohuäu isojuoepönä ppä'ädö ja̧'hua̧ta̧'a̧nö̧ eseu repeömä pojopö ȩmi̧nä̧cu̧ Davidrö'inä ja̧'hua̧ta̧'a̧nö̧ i̧tti̧mö̧rö̧'i̧nä̧ 'cuäopönätä̧ i̧jȩpö̧.