¹ Zofin rȩjȩ Ramataim ötahuiyänä̧ ya̧tȩ ubó kinö̧, Efrain idepiyu de'a jo̧me, ja̧u̧ i̧mimä̧ mi̧cuinö̧ Elcana, Jeroham i̧tti̧, Eliú ö̧do̧, Tohu i̧tti̧, Suf i̧tti̧, Efrain isotö i̧sa̧ ji̧na̧'a̧. ² Ja̧u̧mä̧ i̧rȩcua̧mö̧ ta̧ju̧ru̧ ku̧nä̧ri̧nö̧; i̧rȩcua̧muttö̧ ä̧cuo̧menä̧ isaju micuinä̧ju̧ Ana, o,ca'anä̧ isaju micuinä̧ju̧ Penina. Peninamä̧ ki̧tti̧murö̧ ku̧nä̧ri̧nä̧ju̧, ja̧hua̧nö̧ ja̧'a̧nä̧ Anamä̧ ki̧tti̧mö̧ to'inä̧ju̧. ³ Pide ubomä̧ ichi'änö̧ ötahuiyära̧'a̧ttö̧, a̧'ȩ ö̧ta̧'a̧nö̧, ja̧rȩyu̧nu ocuotö jȩpö̧ ja̧hua̧ta̧'a̧nö̧ i̧sa̧rö̧ cuä'ö icu iyö o'catoi'önä̧ TTU̧RU̧HUA̧RÖ̧ Silottö. Elí i̧tti̧mu ta̧ju̧, Ofni ja̧hua̧ta̧'a̧nö̧ Finees, sacerdote TTU̧RU̧HUA̧ hue'ähuoto'inä̧ juhuȩnȩtä̧ ka̧cui̧nä̧tö̧. ⁴ Elcana i̧sa̧rö̧ cuä'ö iyähuä pä̧nä̧ pätecuächomenä̧, a̧'ȩ jö̧ ta̧'a̧nö̧ jȩo̧menä̧mä̧, 'cuäopö̧nä̧ iyi'änö̧ idepä irecua Peninarö̧, ja̧hua̧ta̧'a̧nö̧ i̧tti̧mö̧ u̧mä̧tö̧ nä̧tö̧rö̧'inä̧. ⁵ Ja̧'hua̧nö̧ ja̧'a̧ ja̧u̧mä̧ 'cuä'opömä iyinäcua̧ ya'ute 'cuäo'önänö Anarö̧ iyinö. Anarö̧ röäinä repeinä̧cua̧ ja̧'hua̧nö̧ ja̧'a̧nä̧ TU̧RU̧HUA̧mä̧ ki̧tti̧rö̧mä̧ iyococua pinäju̧. ⁶ Peninamä kahuaruhuajure suronä ucuocu mȩ'o̧pä̧ri̧nä̧ju̧ ya̧'a̧cuä̧hua̧ju̧ jö̧nä̧ ku̧ji̧ya̧ju̧ pä'ö TU̧RU̧HUA̧ ki̧tti̧rö̧ iyococua. ⁷ Ja̧'hua̧nö̧ ja̧'a̧ ja̧u̧nu̧ pä̧nä̧ jahuäjumä TU̧RU̧HUA̧ ö̧jodera̧'a̧ huö̧mi̧pi̧nä̧ju̧ ki̧tti̧mu̧cu̧, kahuaruhuaju suronä ucuocuäjumä (Penina) 'cuäopönä mȩjo̧pä̧ri̧nä̧cua̧. Ja̧'hua̧nö̧ jä̧cua̧ ajautä ajahuinä̧ju̧ ja̧'hua̧ta̧'a̧nö̧ ku̧cuä̧'inä cuocoju pinäju̧. ⁸ Kirecuo Elcanamä 'cuopönä jiähuinä̧cua̧ "Ana, ¿Dä̧bö̧ cujahuä? ¿Dä̧bö̧ cu̧cuä̧'inä cucuoca'attö̧? ¿Tta̧'a̧nö̧ pä'ö cuamiso'quinä cua̧'cua̧ tta̧cuȩcuä̧? ¿Ttömä̧cö̧ tä̧ji̧ cui̧tti̧mö̧ to̧mö̧rȩnö̧ huotöttö'inä abonänö repeda'amä? ⁹ Ji̧yȩnö̧ pänä̧ 'cuäopina̧'a̧, Ana Silottö ku̧cuä̧ kucuäji o'ca'a ja̧'hua̧ta̧'a̧nö̧ au'inä kahuäji o'ca'a ä̧rä̧mi̧'i̧näju̧. Elí sacerdote hua̧mä pinö i̧dȩä̧cä̧nä TU̧RU̧HUA̧ oju'isode apate ä'ca. ¹⁰ Jahuäjumä juiyó rö̧ä̧nä̧ ka̧'cua̧ tta̧'ȩcuinäju̧; KU̧RU̧HUA̧RÖ̧TÄ̧ ajuäunu jä̧'ȩpä̧ri̧nä̧ju̧. ¹¹ Jahuäjumä̧ isó jönä jȩchä̧cua̧ju̧sä̧ pä'inä̧ju̧: O'catoi'önä̧ TU̧RU̧HUA̧ ju̧ru̧hua̧, Cumuhuäyaju ka̧'cua̧ tta̧jȩcu̧ tocu'uttumä̧ ja̧'hua̧ta̧'a̧nö̧ cuä̧ju̧cu̧ttu̧mä̧, cumuhuäyajuru cu̧nichi'oca'a, chi̧tti̧ ya̧tȩrö̧ cuiyöttömä̧, ja̧u̧nutä̧ jȩchä̧cua̧ju̧sä̧ CHU̧RU̧HUA̧ 'cuäopunä̧ mo̧ro̧ pi̧jä̧nä̧ ö̧jä̧i̧mä̧, ja̧u̧mä̧ uhuo'che'inä̧ 'cui'ocuocö jä̧cua̧." ¹² Jahuäjumä TÖ̧Ä̧NÄ̧HUA̧rö̧ kucuocua'anä, Elímä känä to̧pä̧ri̧nö̧. ¹³ Anamä ka̧'cua̧nä̧tä̧ u̧cuocuinäju̧. Kä̧yä̧mä̧ yuppappa jö̧nä̧tä̧, ja̧'hua̧nö̧ kucuocua'anä kucuocumä rä̧mi̧po̧ca̧'a̧ ji̧na̧'a̧. Ja̧'hua̧nö̧ ji̧yä̧cu̧ Elímä tä̧'ä̧mä̧jö̧cö̧ pä'ötä amöcuädinö. ¹⁴ Elímä päinäcua̧: "¿Ti̧yȩnö̧ jubö tä̧cuä̧mä̧'chä̧cua̧'a̧ttö̧? ¡Täcö vinomä jua'a yabonömä cuähuä! ¹⁵ Anamä kädätinö̧cu̧: Ja̧'hua̧nö̧mä̧cö̧ chu̧ru̧hua̧, ttömä isajumä cha̧'cua̧ru̧hua̧nä̧ cha̧'cua̧ tta̧'ȩcuä̧ju̧sä̧. Vino'inä, koro ahuähuä juruhuö'inä ahuocoju päjäjusä, Ja̧'hua̧nö̧ ja̧ jueimä 'cha̧'cua̧nä̧ TÖ̧Ä̧NÄ̧HUA̧ ä'ca jo̧mȩ 'chä̧nö̧ jä̧'ȩpä̧rä̧'i̧jä̧ju̧sä̧." ¹⁶ "Ucu cumöhuäyajumä̧ ja̧'a̧tä̧ra̧'a̧ juo'ächäju pä'ömä cuamöcuädä; cha̧'cua̧ tta̧dȩcu̧ rö̧ä̧chä̧cua̧ ja̧'hua̧ta̧'a̧nö̧ ucuo jui'aju jö̧nä̧tä̧ tottäcua ucuocuä'ijäjusä." ¹⁷ Ja̧'hua̧nö̧ ja̧'a̧ Elímä ädätinö jahuätörö pä'inö: "Täi cua̧'cua̧ adiunä cu̧ja̧; Tö̧ä̧nä̧hua̧ Dios Israel ttö̧ja̧ Tu̧ru̧hua̧ jäcuepäjimä jäcuepäjita'anö jȩä̧cua̧." ¹⁸ Jahuäjumä ädätinäju̧: "Ja̧'a̧tä̧ topi ucu cumöhuä̧ya̧ kö̧'o̧cui̧'a̧nä̧ ucu ppä'ädipö jȩ'cu̧ cuä'ca jo̧mȩttö̧." Ja̧u̧nu̧ o'ca'a jahuäjumä ku̧mä̧nä̧nä̧ ppa̧'a̧chi̧nä̧ju̧ ja̧'hua̧ta̧'a̧nö̧ ku̧cuȩmä̧ cuinäju̧ ki'änämä täcö ka̧'cua̧ tta̧'ȩcuo̧ju̧ pinäju̧. ¹⁹ Jahuätömä porähuinätö̧ pä'ö mo̧ro̧ juoa'a ja̧'hua̧ta̧nö̧ ucuotönö jȩpi̧nä̧tö̧ tu̧ru̧hua̧ ä'ca jo̧mȩttö̧, ja̧'hua̧ta̧'a̧nö̧ ja̧u̧nu̧ o'ca'a jahuätömä pä'äjita'anö ppa̧'ä̧chi̧nä̧tö̧ ttoju isodera̧'a̧ Rama pä'ö micuome. Elcanamä ä'inö irecua Anacu̧, ja̧'hua̧nö̧ ja̧'a̧ Tu̧ru̧hua̧mä̧ ä̧ju̧cui̧nö̧ jäjepinö. ²⁰ Ji̧yȩnö̧ pä̧nä̧ ja̧'hua̧nö̧ 'cuäopina'a. Anamä muchaju juo'inä̧ju̧, ja̧'hua̧nö̧ ja̧'a̧ttö̧ o'caju juo'inänäju̧ ki̧tti̧ ya̧tȩ uborö. Imi ojinä̧cu̧ Samuel pä'ö. "Ja̧'hua̧nö̧ ja̧'a̧ chu̧ru̧hua̧rö̧ jädepinäcu̧. ²¹ Juhua'a yabonö Elcanamä irecua̧mö̧'i̧nä̧, i̧tti̧mö̧'inä o'catoi'önä 'cha'achinätö̧ Tu̧ru̧hua̧rö̧ i̧sa̧rö̧ ku icu iyähuome a̧'ȩ jö̧ta̧'a̧nö̧ iya päinöta'anö. ²² Anamä 'cho̧co̧ju̧ pinäju̧, juajumä pä'inäju̧ kirecuorömä ttömä 'cho̧co̧ju̧ chäcuajusä ji̧'qui̧cha̧hua̧ atate cädi'ome jubö päi'önä, juhua'amä chȩpä̧cua̧ju̧sä̧ 'cuäopönätä̧ TÖ̧Ä̧NÄ̧HUA̧ ä'ca jome ö̧jä̧cua̧'a̧ttö̧. ²³ Kirecuo Elcanamä juajurö pä'inö: "Ucurutä adihuomenä̧ jȩpi̧. Tta̧'a̧ri̧pi̧ atate cädi'ome jubö; suro TÖ̧Ä̧NÄ̧HUA̧tä̧ päinömä jȩä̧cua̧." Ja̧'hua̧nö̧ ja̧'a̧ttö̧ isajumä ki̧'i̧pö̧mä̧ tta̧'a̧ri̧nä̧ju̧ ki̧tti̧rö̧ atate cädi'ome jubö. ²⁴ Atate aú juiyönä̧ kä̧'ȩpö̧ kicuäji o'ca'a, ji̧'qui̧cha̧hua̧rö̧ 'chuhuädö o'ipinä̧ju̧, ja̧u̧cu̧mä̧ ȩpi̧nä̧ju̧ ya̧tȩ päcäyä buorö(toro) huäbodäcuä a̧'ȩ hua̧rö̧, ja̧hua̧ta̧'a̧nö̧ idepämä̧ 22 litro jo̧mȩ, vino i̧sä̧yu̧ ji̧yu̧tȩ, ȩpö̧ 'chi̧nä̧ju̧ TTU̧RU̧HUA̧ ojusode Silora̧'a̧cu̧. Ja̧u̧nu ki̧tti̧mä̧ ji̧nä̧ a̧'u̧cui̧nö̧. ²⁵ Jahuätömä̧ päcäyärö cuä'ö icú ja̧hua̧ta̧'a̧nö̧ ji̧'qui̧cha̧hua̧rö̧'inä̧ ȩpi̧nä̧tö̧ Elí ö̧jo̧mecu̧. ²⁶ Jahuäju pä'inä̧ju̧: "Iso, chu̧ru̧hua̧! ja̧hua̧nö̧ ucu cu̧ju̧ta̧'a̧nö̧, chu̧ru̧hua̧, ttötä ji̧na̧'a̧ yaju pinä̧ju̧ cuippeyänä̧ CHU̧RU̧HUA̧RÖ̧ jä'epö ucuocu pi̧nä̧ju̧mä̧. ²⁷ Pide ji̧'qui̧cha̧hua̧rö̧ iyattö pä'ö jä̧'ȩpä̧ri̧nä̧ju̧sä̧ CHU̧RU̧HUA̧MÄ̧ ä̧ju̧cui̧nö̧ jädepinö̧mä̧. ²⁸ Ttömä̧ iyäjäjusä CHU̧RU̧HUA̧RÖ̧; ji̧nä̧ a̧'cua̧rä̧i̧mä̧ U̧RU̧HUA̧NÄ̧TÄ̧ ö̧ja̧ pä'ö. "CHU̧RU̧HUA̧RÖ̧TÄ̧ ucuotönö̧ esehuäjusä juorö.