¹ Salomón öadihuä u̧ru̧hua̧ i̧mi̧nä̧ i̧rȩbȩhui̧nö̧ ä̧ju̧cui̧nä̧ju̧ Sabá rȩjȩ ttö̧ja̧ tturuhuajumä, jäecuänä 'quiyö juäicu ichinä̧ju̧ ka̧cuä̧mö̧ tojarö pä'ö. ² Ja̧'hua̧nö̧ ja̧'a̧ Jerusalénra̧'a̧ ichinäju̧ huo̧juä̧huä̧ ttö̧ja̧ recuätucu, a̧mȩu̧ juäi'inä, oro'inä rö̧ä̧nä̧ camellosnä i'cächinätö̧ rö̧ä̧nä̧ inä adiu'inä, Salomón ö̧jo̧mȩ ki̧'chi̧'o̧mȩnä̧ o'cajuiyönä kamiso'quinä ku̧ju̧nä̧rä̧ji̧mä̧ ucuocuinäju̧. ³ Ja̧'hua̧nö̧ ja̧'a̧ Salomónmä o'cajuiyönä jäjepäjimä ädätinäcua̧ ji̧yȩtȩ'i̧nä̧ ki̧'i̧po̧ca̧'a̧ ji̧na̧'a̧ ru̧hua̧ ädätocö juäimä. ⁴ Ja̧'hua̧nö̧ ja̧'a̧ Saba rȩjȩ ttö̧ja̧ tturuhuajumä Salomón u̧huo̧ju̧ o'cajuiyönä, isode aditinode'inä topinä̧ju̧. ⁵ Juhua'a jö̧ta'anö u̧cuȩ cuäcuähuodänä cuäcuähuä ka̧'a̧'i̧nä̧, umöhuäyotö ttä'ome'inä churutä ppä̧'ä̧dä̧rä̧tö̧ ttö̧'ca̧tä̧huä̧ti̧yu̧'i̧nä̧ adihua'a, umöhuäyotöttö jue'ipotö u̧cuȩ iyähuä ttö̧ja̧rö̧'i̧nä̧, juhua'a jö̧ ta'anö u̧ru̧hua̧ ojosodettö i̧sa̧rö̧ cuä'ö icu jȩä̧'i̧jö̧'i̧nä̧ topö rö̧ä̧nä̧tä̧ ye'ecui'inäju̧. ⁶ Ja̧'hua̧nö̧ ja̧'a̧ ru̧hua̧rö̧ päínäju̧: Isopäi'önätä̧ ja̧'a̧ ucu cuiärettö'inä, cu̧huo̧ju̧ttö̧'i̧nä̧ chi̧rȩjä̧ttö̧ chä̧ju̧cuä̧'i̧jö̧mä̧. ⁷ Ja̧'hua̧nö̧ ja̧'a̧ chichome jubö, ji̧nä̧ estocoju päjäjusä, ja̧'hua̧ta̧'a̧nö̧ chi'äriyänä topö ju'totämä pä'ocojusä, chä̧ju̧cuä̧'i̧jo̧mȩttö̧'i̧nä̧ abonänö rö̧ä̧nä̧tä̧ adihuaja cu̧huo̧juö̧mä̧. ⁸ Cumöhuäyotömä eseu ka̧cuä̧tö̧, pi̧yȩ eseu ka̧cuä̧tö̧mä̧ huecu jȩä̧cuä̧huä̧ ttö̧ja̧tä̧ ja̧'a̧, 'cuäopö cuä'ca jo̧mȩ kä̧tö̧tä̧, ja̧'hua̧ta̧'a̧nö̧ cu̧huo̧juö̧ ä̧ju̧cuä̧tö̧tä̧. ⁹ Cu̧ä̧nä̧hua̧ Diostä adihuä i̧sa̧mä̧ ucuru eseunö topinötä̧ Israel ttä̧ja̧ tturuhuo dȩä̧cä̧nä̧ öta pä'ö Diosmä 'cuäopönä̧tä̧ repe'inö Israel ttö̧ja̧rö̧mä̧, ru̧hua̧ päcui'önä jȩi̧nä̧cu̧jä̧ jueönä jȩä̧cuä̧huä̧'i̧nä̧ adiunä jȩä̧cuä̧huä̧'i̧nä̧ jȩpö̧ ku̧ji̧ya̧rö̧ pä'ö. ¹⁰ Ja̧'hua̧nö̧ ja̧'a̧ 120 talentos jo̧mȩnä̧ oro rö̧ä̧nä̧ adiu a̧mȩu̧ jähuä'inä rȩbȩhuo̧ca̧'a̧ ji̧na̧'a̧ pä'äjimä, Sabá ttö̧ja̧ tturuhuaju kiyäji'anömä. ¹¹ Juhuene yabonä Ofir rȩjȩttö̧ Hiram uhuoi'ca'inä oro'inä, sándalo dauhuiyä'inä inä adiu'i̧nä̧ i'cächinätö̧. ¹² Ja̧'hua̧nä̧ ja̧'a̧ ru̧hua̧mä̧ Dios ojusode'inä, ru̧hua̧ ippeyänä ka̧cuä̧tö̧ ttoju odehuiyä'inä sándolo dauhuiyä odättö aditinö. Juhua'a jö̧ta'anö ra̧huä̧huä̧ ttö̧ja̧ ttiäre 'porähuä oba arpas pähuä'inä, salterios pähuä'inä aditinö sándalo dauhuiyä'anö jö̧mä̧ yori'isotä ichoca'a ji̧na̧'a̧, jitä pi̧yȩ mo̧ro̧ jubö päi'önä toäcuöhuoca'a. ¹³ Ja̧'hua̧nö̧ ja̧'a̧ ru̧hua̧ Salomón sabá rȩjȩ ttö̧ja̧ tturuhuajuru o'cajuiyönä pä̧huä̧ tojä'inä, jäjepäji'inä iyinä̧cua̧, ja̧'hua̧nö̧ ja̧ji̧ o'comenä ruhuajumä cumöhuäyotucu ki̧rȩjä̧ra̧'a̧ ppa̧'ä̧chi̧nä̧ju̧. ¹⁴ Ya'ute du'o rȩjȩ micuä ttimitömä Salomón u̧ju̧nä̧rö̧ oromä (666) talentos jo̧mȩnä̧ a̧mä̧qui̧na̧'a̧do. ¹⁵ Järe micuämä iyä'chätö, adiu ameu ttadita pä'ö hueähuä ttö̧ja̧, Arabia rȩjȩttö̧ o'catoi'önä ruhuotö, jä̧ttä̧yä̧jä̧ rȩjȩttö̧ jue'ipotö ttiyä'ijö pa̧ja̧cuä̧ juiyönätä̧. ¹⁶ Juhua'a jö̧ta'anö ru̧hua̧ Salomónmä 600nö tto̧ȩcuäräcuähuä bäreu obi oro isähuattö aditinödo, 6 kilos oro jomenä jȩpö̧ icu aditinödo jibicu pönämä. ¹⁷ Juhua'a jö̧ta'anö oro isähuattö aditinödo 300nö tto̧ȩcuäräcuähuä ppo̧ö̧ obi, jibicu pönämä 3 libras oro jomenä jȩpö̧ icuinö. Ojusode'inä Libano de'iyunä aditö ku̧ni̧nö̧. ¹⁸ Juhua'a jö̧ta'anö ideäcä ruhuonä hue'ö ö̧'ö̧ ocä 'quiyö juäi marfil pähuättö aditinö ru̧hua̧mä̧, juhuäcä deäcämä juäocuä̧ri̧na̧'a̧ päcuäi orottö. ¹⁹ Ruhuo deäcära̧'a̧mä̧ koromöttö̧nö̧ yochetenö 'chahuächäcuähuä ocä ki̧na̧'a̧, ji̧nä̧ isocu ju'toju jo̧mȩ ö̧'o̧mȩmä̧ yoräteunä ö̧'ä̧cänämä ki̧na̧'a̧ kara'anä'inä, kara'anä'inä öjo rötähuome, juhuenemä ta̧ju̧ bärepätö yä̧hui̧tö̧ rutähuotö ki̧nä̧tö̧. ²⁰ koromöttö̧nö̧ yochetenö o'ca ocä 'chahuächäcuähuä ocänä tom'rettö to'cherenö bärepätö yä̧hui̧tö̧ rutähuotö ki̧nä̧tö̧, kara'anä'inä pätecutä ruhuonä hueähuomettö̧mä̧ koromettö̧'i̧nä̧ ja̧'hua̧nö̧mä̧ adicuoca'a ji̧na̧'a̧ ruhuo deäcämä. ²¹ Juhua'a jö̧ta'anö ru̧hua̧ Salomón ahuähuä o̧'ta̧mä̧ orotä ji̧na̧'a̧ ojusode Libano de'ara̧'a̧ ko̧de jacuä jähuä'inä, Juhua'a jö̧ta'anö päcuäi orotä ji̧na̧'a̧, pärätättö adicuämä juiyina'a, Salomón ö̧ji̧nö̧ pä̧nä̧mä̧ ttöjö'cocö ja̧'a̧ttö̧. ²² Ru̧hua̧mä̧ aje röoto̧nä̧ ku̧nä̧ri̧nö̧ aje huoi'quiyu Tarsi rȩjȩra̧'a̧ttö̧ ichö'inä, Hiram rȩjȩra̧'a̧ttö̧ ichöcu. Huäbodäcuä du'o jo̧mȩnä̧mä̧ ya'utenätä̧ ichina'a huoi'camä Tarsi rȩjȩra̧'a̧ttö̧mä̧, jahuä'ca huoi'canämä ä'cächinätö̧ oro'inä, plata'inä marfil pättö'inä ji̧chu̧tu̧cu̧í̧nä̧, Juhua'a jö̧ta'anö i'cächinätö̧ pavo real pä̧ttä̧u̧rö̧'i̧nä̧. ²³ Pa̧'a̧nä̧tä̧ rö̧ä̧chi̧na̧'a̧ ru̧hua̧ Salomón uruhuomä, u̧huo̧juö̧'i̧nä̧ o'catoi'önä rȩjȩ ruhuotö ttoju odönä. ²⁴ Rȩjȩ jä̧ttä̧yä̧jä̧ jö̧ttö̧tä̧ totta pä'inätö̧ ru̧hua̧ Salomón ö'ä u̧huo̧juö̧'i̧nä̧ ttä̧ju̧cua̧ pä'inä̧tö̧ Dios amiso'quinä u̧ju̧ni̧nö̧mä̧. ²⁵ Juhua'a jö̧ta'anö o'catoi'önä du'o jo̧ta'anö ttö̧jö̧nä̧rö̧ juäi ȩpi̧nä̧tö̧, orottö adicuä'inä platattö adicuä'inä, 'ca̧tä̧cuä̧huä̧ o̧ta̧'i̧nä̧, rohuähuäcuähuä 'quiyöjuäi'inä, adiu a̧dö̧ juäi isoya'inä, cabayu̧tu̧rö̧'i̧nä̧ murotö̧rö̧'i̧nä̧. ²⁶ Salomón caruquiyä'inä, caballonä huä̧nö̧ rohuähuäcuähuä ttä̧ja̧rö̧'i̧nä̧ ca̧ca̧tö̧ ku̧ni̧nö̧ (1400)nö̧ jo̧mȩnä̧, caruquiyä'inä (12.000)nö jo̧mȩnä̧, caballonä huä̧nö̧ rohuähuäcuähuä ttä̧ja̧rö̧'i̧nä̧ ku̧nä̧ri̧nö̧. Ja̧u̧ juäimä rohuäcuähuä caruquiyä päjomȩtä̧ hue'inö, Juhua'a jö̧ta'anö hue'inö curä ru̧hua̧rö̧ Jerusalén ru̧hua̧rö̧ tta̧ttä̧ri̧ya̧rö̧ pä'ö. ²⁷ Ja̧u̧ ru̧hua̧mä̧ Jerusal'en pärätä rö̧ä̧nä̧ kö̧nä̧ jȩpi̧nö̧do, inä rö̧ä̧nä̧ ka̧'a̧ jä̧'i̧nö̧'a̧nö̧ päi'önä, Juhua'a jö̧ta'anö cedro dauhuiyä'inä yoähui'önä de'a pämärome ka̧cu̧ higuera dauhuiyä jä̧'i̧nö̧'a̧nö̧. ²⁸ Ja̧'hua̧ta̧'a̧nö̧ Egipto rȩjȩra̧'a̧ttö̧ i'cächinätö̧ Salomón ä̧ji̧mö̧ cabayu̧tu̧rö̧'i̧nä̧ öäre i̧sä̧ti̧yu̧ lienzo pähuä lino dauhuiyättö adicuä o̧ta̧, ru̧hua̧ öäre mitö micuänä iyä'chö adicuä ttö̧ja̧mä̧ ja̧huä̧jä̧ rȩjȩra̧'a̧ttö̧tä̧ mitö ä'cächinätö̧ cabayu̧tu̧rö̧'i̧nä̧, pö̧jä̧ti̧yö̧ lienzos o̧ta̧'i̧nä̧. ²⁹ Egipto rȩjȩttö̧mä̧ caruquiyänämä ichina̧'a̧ (600)nö plata jo̧mȩnä̧, Juhua'a jö̧ta'anö räopina'a cabayunämä 150nö jo̧mȩnä̧, Juhua'a jö̧ta'anö jahuätönätä̧ po̧cui̧pi̧nö̧ o'cajuiyönä heteos ttö̧ja̧ tturuhuotöttö'inä, siria ttö̧ja̧ tturuhuotöttö'inä.