¹ Pakujinae dajjita jiwi nikabalia Jordán mene. Dioso jumaitsi Josué jawabelia: ² "Itapetsianame doce (12) pawiria jiwitonibeje. ³ Rojure peitorobibajjuto pakueneta jjaniwaetsia nubenajitsia: "Papitsianame doce (12) pa übotobeje Jordán mene tutujita jota nubena sacerdotemonae petsewi ira jawata. Pakaponaename pajjami jawabelia, jota peyametawibinejatsi" ⁴ Juakujinae Josué junata ara pa doce (12) jiwitonübeje ponibeje Israel tomara jawata pita, dajitawiriowi. ⁵ Josué jumaitsi: "Poponaename Dioso pija arca Jordán mene tutujíjawalia. Kaejiwikanakujitsiaüboto pitsiana peyotsinejja pewitakorata pawiria beje Israel jawata kajjitajaraba. ⁶ Jjua nejjata pe pakatsitajitsikuene tsane pakujinae pakayanijobiana panepotsimatokabü: '¿Dejjua jumaitsijitsia ara pa üboto jjaünejja? ⁷ Nejjata pajumaitsimitsane: 'Jordán mene natsaneka Dioso pija arca itabarata. Pakujinae ara jjua naitojita Jordán jawata nejjata mene natsaneka. Nejjata pa übotonü Israel monae nejja peyaitaeüboto jota ba nawajika Dioso jawabelia." ⁸ Israel tomara jumekowinita peitorabikueniatsi Josué nejjata arapamonae püta doce (12) paübotobeje Jordán mene tutujita pakuenia baja Dioso itoroba Josué jawabelia. Arapamonae nejjata üboto jeba pawiriabeje baja Israel tomara jowata jinawanapa kapona ara pa übotonü pejinawanapaejawabelia arajota baja jeba ara pa übotonü. ⁹ Juakujinae Josué buata arapa doce (12) paübotobeje Jordán mene tutujita, jota nubena otopa sacerdote monae pekaponaewi Dioso pija arca ajenata ara paüboto tsiteka arajotaboka. ¹⁰ Sacerdotemonae pekaponaewi Dioso pija arca nubenaotopa Jordán mene tutujita pejumekowinitsiwi baja jjua Dioso jumaitsi. Pakuenetabaja Moisés itoroba Josué. Nejjato baja arapakuenia itsamonae baja nikaba ara pa Jordán mene. ¹¹ Pokujinae baja dajjita wereta nikabalia, Dioso pija arca yajawa sacerdotemonae dajjita jiwi jawalia nikaba. ¹² Rubenwiriamonae, Gadmonae itsawiria baja yajawa pakueneta Monasés monae Israel jawa baja mikabalia be wajabitsai tsabuataponae, pakueneta baja Moisés jumaitsi. ¹³ Pina baja pepobitsaito jiwimonae na wajabitsaita Dioso peitabarata petsimajjiponoenejja Jericó jawabelia. ¹⁴ Arapamatakabü Dioso rajuta pesaü Josué pe aitatsakatsanukaenejja yajiwi Israel monae. Nejjata yaitanetsi, pakuenia yaetanetsi Moisés dajitamatakabü. ¹⁵ Juakujinae Dioso barranatsipaeba Josué: ¹⁶ "Itoroba sacerdotemonae pekajinopaenejja Dioso pija arca pepitsapaenejja Jordán mene jawelia." ¹⁷ Josué nejjata itaweta sacerdotemonae: "Papitsapare Jordán jawelia." ¹⁸ Nejjata pakujinae sacerdotemonae pitsapa Jordán mene jawerena iraberena baja nubena- ikatsiabaja pejanakuenia ikatsia mene pata baja ikatsia pekowikuenia. ¹⁹ Nejjata baja jiwi pitsapeka kopioyo mataka bianita anijakobe kueniabeje matakabita kopiaya juometota. Nakopaba nejjata Gilgal jawata, Jericó ümojjoyo jawata. ²⁰ Pa doce (12) übotobeje juta Jordán mene jawata Josué buata Gilgal jawata. ²¹ Araponü jumaitsi Israelmonae jawabelia: "Pakujinae nejjata yanijobianatsi pemomojji pajjajiwi jawabelia- ara pamatakabi najaetoruka: '¿De pitsa übotonü?' ²² Tsipaebare nejjjijawabelia: "Jjuya nikaba Israel monae pakujinae menetsewa." ²³ Dioso raja Jordán mene tsewaejjana jjamünejja nenikabinejja petsewijalia, pakuenia Dioso ejjana Mar mene (Mar petsobiamene), Dioso nakato tsewiapa mene waja nikabineja, ²⁴ dajjita jiwi peyapitaenejja wojja Dioso kuene kaipatsi dajjita kuene pe ejjanaejawa, nejjata pataitaename pajumekowinitsianame wajja Dioso pejume liwaisi dajjita matakabü.