¹ Ni sa oji e vica tale a bogi sa qai lesu tale mai ki Kapenaumi ko Jisu, ka sa rogovaki yani a ona sa jiko i vale. ² A ra sa lewe levu sara e ra soqoni vata mai, a sa sega kina a jikina me rauji ira, a sa sega bau ena mata ni katuba, a sa vunautakina a vosa vei ira ko koya. ³ A sa lako mai e lewe va a tamata ka colaji koya a tamata tauvi paralase. ⁴ Ni ratou sa sega ni rawa ni kauta voleka vua baleta ni ra sa rui osodrigi a tamata; e ratou sa mani basuka a doka ni vale ka tukuci koya sobu a tamata tauvi paralase ki loma ni vale. ⁵ Ni sa raica ko Jisu a odratou vakabauta, sa kaya ki na tamata tauvi paralase, "Luvequ sa boko a omu i valavala ca". ⁶ Ia e so a Vunivola era ece jiko kina ka ra veinanuyakina i lomadra, ⁷ "E rawa vakacava vua a tamta oqo me vosa vaka i ei? Sa vosa vakacaca ko koya! Ko cei sa rawata me vosota ai valavalaca ia a Kalou duadua ga?" ⁸ Sa kila sara e lomana ko Jisu na veika era sa veinanuyakina e lomadra. Ka sa kaya vei ira, "A cava dou sa veinanuyakina e lomamu dou ? ⁹ A cava e rawarawa meu kaya kina tamata paralase, "Sa bokoci a omu i valavala ca, se taura cake a omu i kotokoto ka lako?" ¹⁰ Ia mo dou kila kina, a Luve ni Tamata sa tu vei koya a kaukauwa e na vuravura i ei me bokoca ai valavalaca, ¹¹ "A sa kaya kina, tucake, taura cake a omu i kotokoto, ka lako kina omu vale". ¹² A sa tucake vakasauri, taura cake a ona i kotokoto ka lako kina ona vale e matadra a lewe levu, a ra sa kurabui kina ka vakarokorokotakina a Kalou ka kaya," Eda se sega ni raica a veika vaka i ei ." ¹³ A sa lako tale yani ko koya ki matavura, a ra sa lako mai vei koya era lewe levu, ka sa vakavulici ira ko koya. ¹⁴ Ia ni sa lako tu, sa boki Livai na luve i Alifio sa jiko vata kei ira a dau kumuna ai vakacavacava, a sa kaya kina," Muri au ." A sa tucake ka muri koya. ¹⁵ A sa kana jiko ko Jisu ena vale i Livai kei ira a lewe levu ra dau kumuna ai vakacavacava kei ira a tamata i valavala ca era kana vata kei koya kei ira a ona tisaipeli, ni sa levu ko ira kei ira ka muri koya. ¹⁶ Ia ra sa boki Jisu ko ira a vuni vola, ka ra Farisi, ni sa kana vata ko Jisu kei ira, ra sa kaya kina vei ira a ona tisaipeli," A cava sa kana vata kina ko Jisu kei ira a dau kumuna ai vakacavacava kei ira ai valavala ca?" ¹⁷ Ni sa rogoca ko Jisu a meca era kaya, sa kaya vei ira," A tamata e bula vinaka, e sega ni gadreva a vuniwai; ko ira ga era sa baca. Au sa lako mai, e sega baleji ira a tamata yalododonu, ia ko ira ga ai tamata valavala ca." ¹⁹ A ra sa lolo jiko ko ira a tisaipeli i Joni kei ira a Farisi. A ra sa lako mai eso ka tukuna kina," A cava era sa dau lolo kina ko ira i ei ka sega ko ira a omu tisaipeli?" ¹⁸ A sa vosa ko Jisu ka kaya vei ira,"Era sa lolo rawa beka a weka ni tagane sa qai vakawaji ni sa jiko vata kei ira a tagane sa qai vakawati?" Ni jiko vata kei ira a tagane sa qai vakawaji , era na sega ni lolo. ²⁰ Ena yaco a gauna ena qai kau tani vei ira a tagane sa qai vakawaji . Ena veisiga mai ei, era na qai lolo kina. ²¹ Ia sa sega a tamata e cula vata a jiki sulu vou, kei nai sulu makawa: ke sa vaka kina e na dresuka na kena makawa ai sulu vou sa botani kina. ²² Sega bau a tamata sa taloca a waini vou kina tavaya kuli ni manumanu makawa. Me vaka kina, e na vakacabotetakina a tavaya a waini vou , ka na tasova a waini ka kavoro a tavaya, e vinaka ga me taloci a waini vou kina tavaya vou. ²³ Ena siga ni vakacegu sa lako voli ko Jisu ena loma ni veiwere ni sila. Ia ko ira a ona tisaipeli era sa tauca na veisola ni sila. ²⁴ Ni ra sa raica a Farisi a meca era sa valata, era kaya kina," Raica, cava era sa valata kina a veika i ei ena siga ni Vakacegu?" ²⁵ Sa qai kaya vei ira ko koya," Kemuni sega beka ni wilika a veika e a valata ko Tevita kei ira era a tiko vata kei koya ena siga mai ei ni ra sa via kana?" ²⁶ Ni sa curu ko koya ki na vale ni Kalou e na gauna ni Epaiaca a bete levu, a sa kania a madrai douraici ka sa sega ni tara me laukana, sa tara duaduaga vei ira a bete kei ira era sa jiko vata kaya. ²⁷ Sa kaya talega vei ira," Sa vala a Siga ni Vakacecegu ena vukudra a tamata, e sega ni vala a tamata e na vuku ni siga ni Vakacecegu. ²⁸ Ia a luve ni tamata sa turaga talega ni siga ni Vakacecegu.