¹ A sa kacivi iratou mai a ona jisaipeli ko Jisu ka sa solia kivei ratou me ratou vakatulewatakini ira a vei yalo velavela kecega, me ratou wakuri ira tani mai vei ira ka ra curumi tu, ka me ratou ia talega a veivakabulai kivei ira era baca tu kei na vei mataqali baca kecega. ² Ka i a yacadratou a le jinikarua a i apositolo. Ai matai ko Saimoni (a yacana talega ko Pita) kei na tacina ko Adriu, ko Jemesa a luvei Sepete kei Joni a tacina. ³ Ko Filipi kei Pacolomiu; ko Tomasi kei Maciu sa dau kumuna a i vakacavacava; ko Jemesa a luvei Alifio kei Cateo. ⁴ Ko Saimoni, e dua vei ira sa dau vakatokai a gumtua kei Jiutasa Iskarioti, ko koya ena soli koi Koya yani. ⁵ Sa talai iratou i ei ko Jisu ka sa vakaroji ratou ka kaya," Dou kakua ni lako ena vanua era jiko kina a kai matanitu tani, dou kua talega ni lako ki na odra koro a kai Samaria. ⁶ Dou lako ga kivei ira a sipi ka yali mai na vuvale i Isireli, ⁷ ia ni dou sa lako, dou vunau, ka kaya 'Sa voleka mai a matanitu vakalomalagi.' ⁸ Dou vakabulai ira era baca, dou vakaduri ira sa mate tu, sou vakasavasavatakini ira a vukavuka, ka dou wakuri ira talega a jimoni. Ni sa soli walega vei kemudou, mo dou solia wale talega. ⁹ Dou kakua ni kauta a koula, se siliva, se a parasa ina omudou paosi. ¹⁰ Dou kakua ni kau kato talega ni veilakoyaki se sulu, se i vava, se jitoko, ni sa dodonu me soli ki na tamata daucakacaka a kena kakana. ¹¹ A koro kecega dou curuma, taroga se ko cei a tamata ka kilai ka yaga e jiko kina, dou jiko vei ko koya ka yacova ni dou sa lako tani mai kina. ¹² Ni ko sa curuma a ona vale, mo kidavakina. ¹³ Ke vale yaga koi koya: qoya mo vakasobura kina a omu vakacegu. Ia ke vale tawa yaga, mo taura lesu tale a omu vakacegu. ¹⁴ Ko ira era tawa ciqomi iko se vakarorogo kina omu vosa, ni ko sa lako tani mai a vale se a koro mai, mo kureitakina laivi a kuvu ni qele mai a yavamu. ¹⁵ Au sa kaya vakaijina ni a ca vakalevu cake mai vei Sotoma kei Komora a koro mai ena siga ni lewa. ¹⁶ Raica, au sa talai kemudou yani me vaka a sipi ena kedra maliwa a olifa, koimkoya ona mo dou qai valavala vakavuku me vaka a gata yalovinaka me vaka a ruve. ¹⁷ Mo dou qarauni kemudou mai vei ira a tamata. Era na biuji kemudou ki na mataveilewai ka ra na vakanakuitatakini kemudou ena odra valenilotu. ¹⁸ Dou kau talega yani e na matadra a kovana kei a tui ena vukuqu mei vakaijinajina vei ira kei ira a veimatanitu tani. ¹⁹ Ia ni ra sa soli kemudou yani, dou kakua ni lomaleqatakina a meca dou na kaya ni na soli vei kemudou ena gauna mai a meca mo dou na kaya. ²⁰ Baleta ni sega ko iko ka na vosa, a Yalo ga i Tamamudou ena vosa mai a lomamudou. ²¹ Era na dui soli ira yani a veitacini me ra vakamatei a tama kei a luvedra; a gone era na vakacaucautakini ira a odra i tubutubu me ra vakamatei. ²² Dou na caji mai vei ira a tamata kecega ena vuku ni yacaqu, ia ko koya ena vosota me yacova ai vakataojioji, ena vakabulai. ²³ Ni dou sa vakacacani mai a dua a koro, dou tuba ki na koro ka tarova; au sa kaya vakaijina ni dou se bera ni vakaojia a koro taucoko I Isireli, e sa na lesu mai a Luve ni Tamata. ²⁴ A jisaipeli e tawa levu cake mai vua a ona dauniveivakatavulici, kei a dauveiqaravi e tawa uasivi cake mai vua a ona turaga. ²⁵ Sa na rauta ki na tisaipeli ke rau sa tautauvata kei a ona dauniveivakatavulici ka na vaka talega kina a dauveiqaravi kei ona turaga. Kevaka era vakatoka a itaukei ni vale ko Pielisipupi, e sa na vakaivei sara vei ira a ona lewe ni vale! ²⁶ Koi koya ona mo dou kakua ni rerevakini ira, ka ni ta dua a meca e vunitaki me na sega ni vakaraitakina mai a meca e tawa laurai me ta kilai. ²⁷ A meca kau kaya kivei kemudou ena butobuto, mo dou kaya ena rarama, kei a meca dou rogoca lo ina daligamudou, dou kailavakina ena dela ni vale. ²⁸ Kakua ni rerevakini ira era na vakamatea a yago ka ra ta rawa ni vakamatea a yalo. Ia mo dou rerevakina ga ko koya e rawa ni vakarusa a yalo kei a yalo mai Eli. ²⁹ E tawa volitaki e rua a separo me dua ga a peni lailai? Ia ka sa sega bau ni dua vei rau ena lutu ki na qele me tawa kila ko Tamamudou? ³⁰ Ia a drauniulumu yaduadua madaga e rawa ni wiliki. ³¹ Mo kua ni rere, ko iko e uasivi cake mai a levu a separo. ³² Ena vakakina, koi koya yadua ga e dau vakatusai au kivei ira a tamata, au na dau vatusai koi koya talega e mata i Tamaqu ko koya ka jiko mai Lomalagi. ³³ Ia ko koya ena cakitakini au e matadra a tamata, au na cakitakini koya talega e mata i Tamaqu ko koya ka jiko mai lomalagi. ³⁴ Mo kua ni vakasamatakina niu lako mai meu kauta mai a veivinakaji ki vuravura, au ta kauta mai a veivinakaji, ai seleiwau ga. ³⁵ Ni kau a lako mai meu tawasei ko tama kei a luvena tagane, ko jinana kei a luvena yalewa, ko vugona yalewa kei a ona nei. ³⁶ A kena meca e dua, kai koya ga a ona matavuvale. ³⁷ Koi koya ka lomani tamana se ko jinana vakalevu cake mai vei au sa tawa yaga vei au; ka vakakina vei koya ka lomana vakalevu cake mai vei au a luvena tagane se luvena yalewa e sega ni yaga vei au. ³⁸ Ko koya ka sega ni colata a ona kauveilatai ka muri au e sega ni yaga vei au. ³⁹ Ko koya ena maroroya a ona bula ena vakayalia. Ia ko koya ena vakayalia a ona bula ena vukuqu ena taukena tale ⁴⁰ Ko koya ena ciqomi iko ka vakacegui iko e sa ciqomi au ka vakacegui au talega; ia ko koya e ciqomi au ka vakacegui au e sa ciqomi koya ka vakacegui koya talega ka talai au mai. ⁴¹ Ko koya e ciqoma ka vakaceguya e dua a parofita ena taukena a ona i votavota a parofita; ko koya sa ciqoma ka vakaceguya e dua a tamata yalododonu ena rawata a kena i sau. ⁴² Ia ko koya ena solia e dua a bilo wai liliwa me unuma e dua vei ira a tisaipeli lalai i ei, au sa kaya vakaijina vei kemudou, ena sega sara ni yali jina a kenai sau.