¹ Ko Paula ai apositolo- e sega ni mai vei ira na tamata se i lesilesi vaka tamata, mai vei Jisu Karisito ga kei na Kalou a Tamada, ko koya e a vakayavuci koya cake tale mai na mate- ² kei ira a veiwekani era sa jiko vata kei au, kei nai soqosoqo lewe ni lotu sa jiko mai Kalatia. ³ Me omudou a loloma kei na vakacegu ni Tamada kei na Turaga ko Jisu Karisito, ⁴ o koya e a soli koya e na vuku ni noda valavala ca me rawa ni vakabulai keda kina mai na vuravura ca i ei me vaka a loma ni Kalou Ko Tamada, ⁵ vei Koya, me ona a vakarokoroko ka sega ni mudu. Emeni. ⁶ Au kurabui ni dou sa vuki tani vakatotolo ki na dua tani ai tukutuku vinaka, dou sa buiji koya kina sa kacivi kemudou e na loloma i Karisito. ⁷ Ni sa sega ni jiko e dua tani tale ai tukutuku vinaka, ia ka sa a tamata era via vakararouratakini kemudoue na nodra vinakata mera vakatanitka ai tukutuku vinaka kei Karisito. ⁸ Ia kevaka e dua vei keitou se agilosi mai lomalagi sa vunautakina vei kemudou e dua tani ai tukutuku vinaka ka sega ni vaka oqoi keitou a vunautakina vei kemudou, me rusa ko koya. ⁹ Me vaka a ka keitou sa kaya mai mada, au sa kaya tale vaka kina, kevaka e dua sa vunautakina vei kemudou e dua a i tukutuku vinaka sa sega ni vaka na ka dou sa vakabauta, me rusa ko koya. ¹⁰ Ia kau sa qai vakavinavinakatakina cei, a tamata se a kalou? Seu saga beka mera vinakaji au ko ira a tamata? Kevaka sa ko ga mera vinakaji au kina a tamata, au sa sega ni talatala i Karisito. ¹¹ Au vinakata mo dou kila a veiwekani ni tukutuku vinaka au vunautakina jiko e sega ni mai ka vakatamata. ¹² Niu sa sega ni rawata mai vua e dua a tamata, seu vaka tavulici kina. ia sa yaco vei au ni sa vakaraitakina ko Jisu Karisito. ¹³ Ni dou sa rogoca a qou i valavala i mada e na odra lotu a Jiu, ka niu a vakacacana vakalevu sara a i soqosoqo lewe ni lotu ni Kalou, ka vaqeavutakina. ¹⁴ Au sa uasivi cake e na lotu VakaJiu vei ira a qau rai era sa lewe levu era taba vata kei au, niu sa gumatua vakalevu sara jiko e na odra i tukuni a oqu qase. ¹⁵ Ia ni sa vinaka vua Kalou, o koya sa tawasei au mai na kete i jinaqu, ka qai kacivi au e na ona loloma walega, ¹⁶ me vakatakila a Luvena kina na lomaqu, meu vunautakini koya vei ira a veimatanitu tani, au sa qai sega ni bose vata kei ira na tamata. ¹⁷ Au sa sega ni lako cake ki Jeruisalemi, ki vei ira era sai apisitolo i mada vei au. Ia, kau sa lako sara kei Arepea ka lesu tale ki Tamasiko. ¹⁸ Ia ni sa oji e tolu a yabaki, au sa qai lako cake ki Jeruisalemi me keirau a jiko vata ka bogi jinikalima. ¹⁹ Ia kau sega ni raica e dua tani tale vei ira a i apisitolo, ko Jemesa ga a tacina a Turaga. ²⁰ Ia a ka kau sa vola vei kemudou, raica e na mata ni Kalou, au sa sega ni dai. ²¹ Au sa qai lako kina veiyasana mai Siria kei Sisilia. ²² A ra sa sega ni kilai au, ko ira a veisoqosoqo lewe ni lotu mai Jutia, era sa tu vota kei Karisito. ²³ Era sa rogoca ga, o koya ka vaka ca cani keta i mada, sa vunautakina jiko a vakabautaka a tovolea me vakarusa. ²⁴ Ara sa vakarokorokotakina a Kalou e na vukuqu.